James
The Tongue
3 Itupkomu, pay uma qa sohsoyam tūtutuqaynayaniqey anyuṅwni, it navotiʼyuṅwee: Itam tūtutuqaynayaqam pas pavan qaöwíyukuniwyani. 2 Itam sohsoyam hīhihta aṅ öwihinwisa. Haqam hapi lavayiy ep pas qa öwihiniwhtiqa pās pasiwtaṅwu; nihqe sohsok tokoy tuyqawiʼtaniqey tuwiʼtaṅwu. 3 Meh, hak kawayot sipmoyhtotoyna, put aw tūqaytaniqat ōviyʼo. Nihqe pan hak put tokoyat sohsok ponilaṅwu. 4 Pu uma kurs piw pākihut aw wūwayani. Nāmahin pi as puma qaanʼewakw yaṅsayoqw-nik̇aṅw, pu wukohuk̇aṅwuy akw hukhoyiwwisa. Nīk̇aṅw pay hihsakhoyat ponilanpit akw ponilantiwya, wárikniʼmaqa haqami ponilaniqey nāwaknaqw paṅsoqʼa. 5 Noqw pan hapi hakiy leñiat pas as tokoyat ep hihsayhoyanik̇aṅw hīhihta kwiviyuaataṅwu. Meh, qȫhi as hihsaynik̇aṅw hihta wukotaqtsokṅwu! 6 Noqw hakiy leñiat ūwiṅwuy anta. Itahtokoy ep pam yep nukpanhqatsit anta. Nihqe pam itahtokoy aṅ ahsupoq tuyoyʼewakwlawu. Pam maskiveq qȫhit akw taqtsokiwk̇aṅw itahtunatyay tataqtsokṅwu. 7 Pay as pi sinom sohsokmuy hihtuy popkotuy, pu masayʼyuṅqamuy, pu hihtuy hoyóyotinumyaqamuy tsūtsuʼtuy, pu pātuwaqatsit aṅqeʼ kiʼyuṅqamuy amumi tuyqawiʼyuṅwa. Puma pumuy sohsomuy amumi tuyqawiʼyuṅwniqey tuwiʼyuṅwa. 8 Nīk̇aṅw pay pas kurs hak leñiy aw tuyqawiʼtani. Pas pam qalolmanik̇aṅw, qatuqayvahsiʼta; pas k̇elmokiat hakiy nīnaṅwuqa-saa. 9 Itam put akw God Itanay lomayuaatota; pu pay put akw itam sinmuy God an yukiwyuṅqamuy qalomáyuaatota. 10 Lomalavayi, pu qalomálavayi sūkw moat aṅqw nȫṅanta. Itupkomu, pas hapi soon yantani. 11 Puyaw sen haqam pāhut nöṅaṅataqat ep kwaṅwa, pu tsīvo sūvaqw nȫṅantaṅwu? 12 Itupkomu, ya sen nönvospaltsoki olive-sipalat pölöyʼvani? Ya sen ovauyi nönvospalat himuyʼvani? Qae. Noqw pay pan hapi haqam pāhu nȫṅantaqa kurs hin suhut, kwaṅwat enaṅ nȫṅantoynani.
The Wisdom from Above
13 Hak sen umuṅaqw suan unaṅwtalwuwniʼta, pu hihta tuwiʼta? Pay pi pam suan hinmeʼ, hihta lolmat hintsakni, qa kwiviʼnaṅwayʼk̇aṅwo, súanwuwniʼk̇aṅwo. 14 Nīk̇aṅw kurs uma umuʼnaṅwpeq pas pavan unaṅwtutuyyak̇aṅw, nanaqastunatyawyuṅweʼ pay uma umuhsuanwuwniy ep qa himuiwyuṅwni. Pu uma it suan wuwnit pas antsanihqat ehpewi qa atsálalwani. 15 Taq pan hinmaqa qa ōṅaqw wuwnit aṅ hinma, soq yep qatsit aṅqw wuwnit áṅwata. Pam pantaqa wuwni hakiy tunatyayat ahpiyniṅwu, it Nukpanat ahpiyʼo. 16 Haqam pi hakim unaṅwtutuyk̇aṅw nanaqastunatyawyuṅweʼ puma piw qa unaṅwtalyaṅwu, pu hihta qalomátumalayʼyuṅṅwu. 17 Nīk̇aṅw ōṅaqw suan unaṅwtalwuwniʼtaqa mohti suan unaṅwayʼta; kwakwhat unaṅwayʼta; qa aʼnö unaṅwayʼta; pās suyan tūqaytaṅwu; pas núokwa; lolmat tumalayʼta; qa sinonuiña; piw qa nawipʼew hinma. 18 Noqw hak haqam pasiʼnaṅwayʼtaqa soñawnen pasiʼnaṅwat qatsit eṅem hihta uylaweʼ pam suan qatsit aniwnaṅwu