Hebrews

God Our Father

12 Noqw itam it akw moṅwvastotiqamuy akw ṅö́yakiwtaqe, ōviy itam qa náṅʼekniʼk̇ahk̇aṅw nanamunwani; nen aʼnö yuhtukni. Itam sohsok hihta puptut oʼyani, pu sohsok qaanhtiput itamuy ṅuyʼyuṅqata. 2 Itam Jesus aw-sa taywisni, itahqapevewniy yayhnaqat pu yúkuhqat awʼi. Pam hapi hahlayhpit makiwniqey tunatyawk̇aṅw nahoylehtsit ep mokqey aṅ kuyva, nahamanʼewakw qa hihtatatʼa, nihqe God moṅwʼatsvewayat putvaqe qatuptu. 3 Noqw ōviy uma put aṅ wūwayani, hin pam nakwhaniʼtaqata, hakim qaanhinwisqam put aw rohomhtotiqʼö. Uma put aṅ wūwayeʼ, soon wuwanmamaṅwuyʼyani, pu ókiwhtotini. 4 Uma qa haqawa qaanhtiput aw rohomnumhqey ep mōki. 5 Ya tutuveni umuy God tímatnihqat pan ökwhantaqat uma pay suhtokya? Ura yan peyʼta: Itii, Tutuyqawhqa uṅ ökwhantaqw, um put qa paysoqtani, pu pam uṅ sivintoynaqw, um put ep qa pas unaṅwmokmantani. 6 Pi Tutuyqawhqa hakiy aw unaṅwayʼteʼ, hakiy ökwhaṅwu, pu qa hakiy tiy kwúsuhqey qa wuvahtaṅwu. 7 Kurs uma ökwhaniwyaqey aṅ kuyyuṅqw, pep hapi puʼ God umuy tímuyʼtaniqey pan tumaltani. Puyaw haqam hakiy tiat nayat ahpiy qa ökwhaniwa? 8 Pi itam sohsoyam hīhihta ep ökwhaniwya; noqw kurs hak qa hihta ep ökwhaniweʼ, pep puʼ soñawnen pam pay hakiy qa puwsuṅwayʼk̇aṅw tihtaqat tiyat antani, nihqe pay qa God tíatni. 9 Yep qatsit ep itanam itamuy ökwhantotaqw, itam pumuy k̇aptsiʼyuṅwa. Noqw ya sen itam tis hīhikwsimuy yúkuhqat aw tūqayyuṅweʼ, soon qa yesni? 10 Itanam pi pay as antsa pan unaṅwtoteʼ, hihsavo itamuy ökwhantotaṅwu. Noqw God hapi itamuy akw moṅwvastotiniqat ōviy panhtiṅwu, itam put an qahováriwyuṅwniqat ōviyʼo. 11 Noqw nāp hak ökwhaniwhqey ep soon hahlayhtimantani; nīk̇aṅw pay atsva hak put aṅ kuyveʼ kwakwhat unaṅwayʼvaṅwu, piw suan hinmaṅwuniqey tuwiʼvaṅwu.

Instructions and Warnings

12 Oviy hakiy unaṅwmokq, maat súhayiwtaqw uma öqalayani; pu hakiy tamöat qaöqáwiʼtaqw uma put hoṅvitotani. 13 Nen uma soñawnen hakimuy kukyamuy eṅem suwip pöhtotani; nāp hisat hakiy kukʼat qa pasiwtaqat ȫqaat ruhpakni; pam qa panhtit qalaptuni. 14 Uma sohsokmuy amumum kwakwhat qatsit aṅ öʼqalyani, pu qahovársqatsit aṅʼa. Put uma ṅastayeʼ, soon Tutuyqawhqat aw yórikyani. 15 Uma pās tunatyawwisni, taq sen haqawa God núokwayat qa akw moṅwvastini, taq nāp hisat hak tūsaqat aʼnö tsīvot anhteʼ wūhaknihqamuy hovalani. 16 Uma tunatyaltotini, taq nāp hisat haqawa tokot sokoplawni; sen yep qatsit-sa aw tunatyawtani, Esaut anʼi. Ura pam motitinihqe makiway sūs nösniqey aw aptsiwtaqat ōviy put nāhoyṅwa. 17 Noqw ura ahpiy pantaqw, put naat put öqalaniqat pam nāwakna. Noqw pay ayo noiwa, soon kurs pam hiniwhtiqat alöṅtaniqw ōviyʼo, nāmahin pi as ura okiw pas pakk̇aṅw hin put alöṅtaniqey hepta. 18 Pi uma tūkwit Sinait qa aw öki, imuy Israel-sinmuy amúnʼi. Ura pam tūkwi uwiwik̇aṅw pamesit akw nömseekiwk̇aṅw, qatāla, pu piw hukʼohpokiwta. 19 Pu paṅqw hak tȫtökqe hiṅqawlawhq, puma put tönayat nanapta; nihqe puma put nanaptaqe, as pam pāpu qa pumuy amumi yuaataniqat okiw yan tūviṅtota, 20 Pas kurs puma soon hin tutaptiwhqat aṅ kuyyuṅwniqe ōviyʼo, pi ura paṅqawu: Nīk̇aṅw híkispi pay himuvohko tūkiwt aw toṅokq, pay tatam uma put tatatupninayamantani, sen lansat akw nīnayamantani. 21 Noqw ura kurs pi pas nuhtselʼewakw soniwhq, ōviy Moses paṅqawu: Pas nu pavan tsawnaqe, tururuyku. 22 Pi uma hapi tūkwit Zion aw öki, pu pas qátuhqat God wuhkokitsokiyat, ōveqatsit ep Jerusalem awʼi; God hoṅviaymuyatuy qaanʼewakw hintaqamuy amumii; 23 Pu sūmi tsovawtaqamuy mohti tihtiwhqat aw tōnawtaqamuy túṅwniam ōveqatsit ep peyʼyuṅqa pumuy amumii; pu sohsokmuy amuṅem hin yukiʼmaqat God awʼi; pu aṅ suan hinyuṅqamuy sinmuy hikwsiam hinyuṅwniqey aṅ pās pasiwhtotiqamuy amumii: 24 It puhuvasiwnit ep God-nik̇aṅw pu sinmuy amuhtsave hintsakqat Jesus awʼi; pu put uṅwáyat wiwtsiniwyaniqat Abel uṅwáyat epnihqe pavan hihta núnukṅwat tuawiʼtaqat awʼi. 25 Uma tunatyaltoteʼ hakiy ōṅaqw yuaataqat aw tūqayyuṅwni. Susmataqpi ima hakiy tūwaqatsit ep yuaaykuqat aw qa tūqayyuṅqam pas ayo qa nöṅa. Noqw pay tis itam hakiy ōṅaqw yuaaykuqat aw qa tūqayyuṅweʼ, kurs hin ayo nöṅakni. 26 Ura hakiy tönaat ephaqam pas tūwaqatsit tayayaykina; noqw puʼ hapi pam hinhtiniqey lavayhtiqe paṅqawu: Sūs piw nāt nu qa tūwaqatsit-sanit pay ōveqatsit enaṅ tayayaykinani. 27 Noqw pam sūs piw sohsok hihta tayayaykinaniqey paṅqawhqe, hihta tayayaykuqat sohsok súlawhtiniqat paṅqawu; pay aṅ hihta yukiwhqat hapi; noqw aṅ himu soon wayayaykuniqa hūrs hoṅvani. 28 Noqw ōviy hapi itam moṅwtunatyat pas soon wayayaykuniqat makiwyaqe, itam put ep God tsúyakyani; nen itam k̇aptsiʼk̇ahk̇aṅw pas hihtayʼk̇ahk̇aṅw put aw okiwlalweʼ, put unaṅwveyani. 29 Taq aw itahyantaqa God qȫhi hihta tsohtsoʼnaṅwuqat anta.