Galatians
Bear One Anotherʼs Burdens
6 Kurs uma haqawat qaanhtiqat núansasnaqw, haqawat tuptsiwnit aṅ öʼqalt pās unaṅwayʼk̇ahk̇aṅw lomavöhut aṅ put ahoy nakwsunayani. Hak nāmi tunatyawk̇aṅwmantani, taq nāp hisat pi hak tuwat unaheviwṅwu. 2 Uma umuhnamaṅʼiwuy aṅ nāvaaṅwayani; yan uma Christ tutavoyat anwisni. 3 Taq hak qa hímunīk̇aṅw pas hímunihqey namiwuwanteʼ nāmi yētaṅwu. 4 Pay hak nāp tumalay aw pohtamantani. Kurs pam lomahintaqw pam put ep tsúyakiwtani; nen ayam sukw qa amum namituwanlawni. 5 Pi hak nāp tumalmakiway, pu maqsoniy nawus yanmamantani. 6 Hak lomatuawit tutuqayhqa put tutuqaynaqat sohsok hihta nukṅwat himuy akw tuwat paaṅwantani. 7 Uma nāmi qa yētotani; kurs hin hak God aw tututsiwṅwu. Pi hak hihta ūyeʼ, piw put aniwnaṅwu. 8 Tokoy tuṅlayiyat eṅem hihta uyhqa hapi put ahpiy mokiwuy aniwnaṅwu; pu iʼ hak Hikwsit eṅem hihta uyhqa hapi Hikwsit ahpiy qatsit qa soʼtaqat aniwnaṅwu. 9 Itam hihta lolmat hintsatsk̇aqey aṅ qa naṅʼeknayani; pay itam soon hisat qa höqyani, qa ókiwhtotee. 10 Noqw ōviy pay itam sohsokmuy sinmuy haqam nukwáṅʼew paaṅwayaniqey tutweʼ, itam panhtotimantani, tis ōviy imuy aṅ tuptsiwniʼyuṅqamuyu.
Final Warning and Greeting
11 Meh, nu okiw hapi pas nāp imay akw yaṅwsaqwhaqam wukovena umumii. 12 Pay ima pas pavan mātaktotiniqey nānawaknaqam hapi uma poṅotkit akw tuvoylatiwyaniqat umumi öʼqalya; taq k̇a puma Christ nahoylehtsiyat yuaatotaniqey ep okiwsahsaniwyani. 13 Noqw hikis pi poṅotkit akw tuvoylaiwyuṅqam Moses tutavoyat aṅ qa ahsupoq hinwisa. Nīk̇aṅw puma umuy poṅotkit akw tuvoylatiwyaniqat nānawakna. Noqw uma pumuy amumi tuqayvastotaqw, puma umuy pihniʼyuṅwni. 14 Noqw nu hapi soon hihta pihniʼtani, hal pay Jesus Christ nahoylehtsiyat-saa. Nu put aw tunatyawk̇aṅw, yep qatsit pay pāpu aw qa tunatyawta; noqw yep qatsi qa inumi tunatyawta. 15 Pi poṅotkit akw tuvoylaiwtaqa qa pam hapi Christ Jesus sinoata, piw iʼ qa put akw tuvoylaiwtaqa qa pamʼi. Pi iʼ hak puhuyukiwhqa hapi put sinoata. 16 Noqw nam sohsoyam it aw nānakwhaqam, pan hinwisqamuy amumi kwakwha unaṅwa, pu núokwa pitsíwiwtaa, pu God sinomuyatuy pas antsa Israel-sínomnihqamuy amumii. 17 Yahpiy haqahpiy qa hak nuy yūyuyhnani; pi itoko tuvoylaiwta, Itahtutuyqawhqay Jesus tuvoylayat akwʼa. 18 Itupkomu, nam Itahtutuyqawhqay Jesus Christ núokwaat umuhʼunaṅway aṅ ahsalni. Nam antaa.