1 Corinthians

Servants of God

3 Pu nūu, itupkomu, kurs nu hin umuy Hikwsit aṅ hinwisqat pan umumi yuaatani. Pay nu umuy nāp tunatyay aṅ hinwisqat pan umumi yuaata, umuy Christ ahpiy qatsit aw puʼ pas tihtiwyaqat panʼi. 2 Nu umuy pīhut nopna, qa hurut nōvata, ispi uma pew pahsavohaqami kurs hin k̇ātotiniqʼö. Híkispi nāt uma kurs hin put k̇ātotini. 3 Taq uma nāt umuhtunatyay aṅ hinwisa. Pi yaw umuṅaqw haqawat nānami unaṅwtutuyyak̇aṅw, pu nāṅwuyʼk̇ahk̇aṅw, nātsikiwta. Ya uma qa nāp umuhtunatyay aṅ hinwisa? Ya uma yep qatsit ep sinmuy qa amún hinwisa? 4 Oviypi haqawa, Nuʼ Paul ámuma, yaw kitalawhq, pu suhk̇a, Nuʼ Apollos ámuma, yaw kitalawhq, ya uma panyuṅqe, qa nāp umuhtunatyay aṅ hinwisa? 5 Puyaw Paul hak hímuniqw ōviyʼo? Puyaw Apollos hak hímuniqw ōviyʼo? Pi uma pay pumuy ayaiwtaqamuy amuhpiy tūtuptsiwa. Pay Tutuyqawhqa hapi itamuy nanāp tumalhuyta. 6 Noqw ōviy soñawnen nu ūya; noqw Apollos aṅ hikwna. Noqw pay God put wuṅwna. 7 Noqw ōviy pay iʼ uylawhqa qa hímuu; pu piw aṅ hīhikwnaqa. Pi God put wuṅwnaqa pam pasʼi. 8 Noqw iʼ uylawhqa, pu aṅ hīhikwnaqa puma sun tumalayʼta. Nihqe puma nanʼik hin tumaltaqey ahsatiy ömahtani. 9 Pi itam God amum sumitumalayʼta. Noqw uma God ūyiyat anyuṅwa. Uma God kīyat anyuṅwa. 10 God núokwanik̇aṅw inuṅem pan yukuqw, nu pas wuwniʼtaqat kītuwiʼtaqat pan yayhniyat yuku. Noqw pu suhk̇a put atsve tukwlawu. Nīk̇aṅw hak put ep hin tukwlawhqey ep tunatyaltimantani. 11 Pam tukwyayhni pay yukiwa. Noqw kurs hin hak piw sukw tukwyayhnani. Pi Jesus Christ hapi pam tukwyayhni. 12 Noqw kurs haqawa it tukwyayhnit ep sik̇avalasivat, qötsásivat, aʼnö hihk̇ayʼyuṅqat oʼwat, kohot, tūsaqat, sen söhövosqatuṅwut akw tukwtaqw, 13 Sohsokmuy sinmuy aṅ nanāp tumalaam mātaktini, pi talöṅnit ep pam qȫhit akw suhputsniwni. Noqw qȫhi sohsokmuy sinmuy tumalayamuy aw pohteʼ, put hin hintaqat susmataqtani. 14 Kurs haqawat tumalaat put tukwyayhnit ep tukwtiwhqa qa hinhtiqw pam put ep hihta ahsatiy ömahtamantani. 15 Pu haqawat tumalaat ūwikq pam pas sohsok kwayhmantani. Nīk̇aṅw pay as pam ayo yámakiwtani; nīk̇aṅw pay hakiy qȫhit aṅqw ayo yámakqat pantamantani. 16 Uma hapi God kīyat anyuṅwa; noqw God Hikwsiat umuhpe kiʼta. Ya uma it qa navotiʼyuṅwa? 17 God kīyat hovalaqat God hapi put hovalani, pi God kīat pas hímuniqʼö; noqw uma hapi put kīmatu. 18 Uma hapi qa haqawa nāmi yētani. Kurs umuṅaqw haqawa yep qatsit ep aʼnö wuwniʼtaqey pan nāmi wūwanteʼ pam núanhimuniwhtini, nen puʼ pas antsa wuwniʼvani. 19 Pi yep qatsit aṅqw wuwantuwi God-niqw anʼewayʼo. Pi ura yan peyʼta: Pam aʼnö unatwiʼyuṅqamuy nāp unatwiyamuy akw pumuy kwihkwisna. 20 Pu piw yanʼi: Tutuyqawhqa aʼnö wuwniʼyuṅqamuy wuwniyamuy navotiʼtaqw pam haktonsaa. 21 Paniqw ōviy qa hak sukw sinot pas hímunihqat yuaatamantani. Pi sohsoy himu umuhhimu, 22 Sen Paul, sen Apollos, sen Cephas, sen tūwaqatsi, sen qatsi, sen mokiwu, sen himu puʼyaqa, sen himu nātoniqa. Pas sohsoy himu umuhhimu. 23 Noqw uma Christ himumatu. Noqw Christ God himuata.