Tyako
3 Net fiil fon aych, mayne priiter, miste leerer wëre, wayl tëyer wust tas mëyer tuun een xweere kericht kriin. 2 Wayl meyer al tuun fiil mools xtolpere. Wën yemant net in wërter xtolpere tuut, is tee een perfekt mënx, un khan aach sayn kans khërper kontroliire. 3 Wën mer een tsaum aan te kayl sayn maul tuun, tas tii uns aan heere, tuun mer aach tëne sayn kanse khërper lënke. 4 Tenkt mool aach aan te xif: tii sin mechtich kroos un sin fon xtarke winte kexupt; awer tii sin torich een kleen xtik hols kelënkt. Soo, khan te man woo tas xif lënkt, tas fiire tsum plats woo eyer wil. 5 In te selwich aat, is ti tsung een kleen teel fom khërper, awer tuut sich fon kroose tinge proose. Kukt wii ploos een kleen flam is kenuuch fer fayer in een kroos walt paue! 6 Ti tsung is soo wii tas fayer. Ti tsung representiirt een welt fon unkerechtichkheet tswixich ti teele fon unser khërper, wayl tii tuut te kans khërper petrefe un khan tas leepe fon yemant fernichte, un tuut fernichtung pringe, soo wii ti Xehena. 7 Wayl yeete saart fon wilt tiere, fon feechel, fon tiere woo kraule un fon tiere woo ins meer leepe, khan un tuut fon te mënxe kontroliirt kepe. 8 Awer khee mënx khan ti tsung kontroliire. Tii hot khee tisipliin, macht xaat un is fol fon xtërpliche kift. 9 Mit tëne tuun mer Yeehoowa, te Fater, loope, un aach ferfluuche ti mënxe woo “noo Kot sayn pilt” kemacht kep sin. 10 Aus tëm selwich munt khome seechen un ferfluuche. Mayne priiter, tas sol net pasiire. 11 Meecht fon te selwich waser kwel siis waser un pite waser raus khome? 12 Mayne priiter, meecht te fayche paam, oliiwe kepe, orer ti traupe krist fayche kepe? Soo aach ti kwel fon salsich waser khan net siis waser kepe. 13 Weer is kluuch un ferxtëntich tswixich aych? Eyer sol mit sayn kuut aanxtelung tsayche tas sayn aarwayte sin mit te tsaamheet, woo fon te kluucheet khomt, kemacht. 14 Awer wën tëyer pite ayfersuucht un xtrayt in ayre hërtse hot, tuut aych net proose un tuut net keeche ti woerheet liie. 15 Tas is net ti kluucheet woo fon oowe khomt; is fon te eyert, is fon te tiere, fon tëm Taywel. 16 Wayl woo ayfersuucht un xtrayt kept, tat kepts aach unortnung un ale saarte xlechte tinge. 17 Awer ti kluucheet fon owe is eyerst phuer, nochter friitlich, net xtreng, fërtich fer aan heere, fol mit parmhërtslichkheet un kuute friichte; tii suucht khee sayt raus un is net falx. 18 Un noch, ti frucht fon kerechtichkheet is in friit keseet fer tii woo friit xafer sin.