¿Jant’ó ti jaˈich lej alwaˈ ki k’ale ban junkuntalábtsik xi in t’ajál an óltsixtsik k’al a Jehová?

¿I kanidh ki k’ale ban junkuntalábtsik xi in t’ajál an óltsixtsik k’al a Jehová? Max yab jayk’i i k’alnek, neˈech xónaˈ ka ach’aˈ i tidhebél tam ki k’ale ban jidhtal junkuntaláb. Ani awich xónaˈ ka t’ajaˈ jechéˈ i konowixtalábtsik: «¿Janéy in t’ajál an óltsixtsik k’al a Jehová tam u junkunal? ¿Jant’ó ti jaˈich lej exbadh abal jajáˈtsik an junkuntaláb? ¿Koˈol neye kin k’ale?». Ba jechéˈ i ajumtaláb neˈech ka exóbnaˈ abal an junkuntalábtsik neˈech ti tolmiy ki utey k’al an Ok’oxláb ani jeye neˈech ti tolmiy ba na xeˈchintal.

1. ¿Abal jant’ó tu junkunal an óltsixtsik k’al a Jehová?

Jun i dhutsum kal an Biblia in uluw abal jant’ók’i tu junkunal: «Ban púlek junkuntaláb neˈech ku k’ak’naˈ na Jehová» (Salmo 26:12). Xoˈ ta k’itsáj jeye, an óltsixtsik k’al a Jehová u junkunaltsik jeye k’al yan i kulbétaláb. Tin pubél an Chabál an óltsixtsik k’al a Jehová u junkunaltsik semana ti semana abal kin k’ak’naˈ na Jehová, u junkunaltsik abal kin ajtintsi ani kin ólantsi. Ani juntsikíl in t’ajáltsik i pakdhaˈ junkuntaláb.

2. ¿Janéy neˈech ka exóbnaˈ ban junkuntalábtsik xi i t’ajál?

Ban junkuntaláb u exóbnáb nin Káwintal an Ok’oxláb, ani u wilkáb k’al i tajaxtaláb xowaˈ in ok’tsixnál (Ka ajay Nehemías 8:8). Max tatáˈ ki k’ale ban junkuntaláb, neˈech ka exóbnaˈ más k’al tin kwentaj na Jehová ani janti jaˈich jajáˈ. Tam ka exóbnaˈ abal jajáˈ ti k’anidhál t’ajat, más neˈech ka léˈnaˈ abal ka t’ajaˈ ta jaˈúb. Ani jeye neˈech ka exóbnaˈ janti in ejtowal ti tolmiy ka koˈoy jun i ejattaláb más kulbél (Isaías 48:17, 18).

3. ¿Janti neˈech ti tolmiy an atiklábtsik xi u k’alel ban junkuntaláb?

Na Jehová tu utsál abal «yejat ki aliy xan ti ku tólmíxin jún ani jún, abal anchanˈ ku k’ánídháxin más ani ki t’ajál xowaˈ alwaˈ», ani yab ki jilaˈ tu junkunal (Hebreos 10:24, 25). Ban junkuntalábtsik, neˈech ka exlaˈ i atiklábtsik xi lej tsubax tu k’ánidháx ani anchanˈ jelti tatáˈ, jajáˈtsik in léˈ kin exóbnaˈ más k’al tin kwentaj an Ok’oxláb. Ani jeye neˈech ka chuˈuw abal in kulbetnáltsik ka k’ijidhmédháxin k’al xowaˈ in exóbnámaltsik ban Biblia (ka ajay Romanos 1:11, 12). Ban junkuntaláb neˈech jeye ka exlaˈ i atiklábtsik xi tomkidh, xi kwetém, xi in kóˈyámaltsik i t’eˈpintaláb por k’wajattsik kulbél. Jechéˈ jaˈich juntsik xanéy janti tu tolmiyal an junkuntaláb, jaxtám na Jehová in léˈ abal ki ojontsi tu junkunal.

ABAL KI EXÓBNAˈ MÁS

4. An junkuntalábtsik xi in t’ajál an óltsixtsik k’al a Jehová

Ban ok’ox siglo, nin aykóliltsik na Jesús u junkunalaktsik abal kin k’ak’naˈ na Jehová (Romanos 16:3-5). Ka ajaytsik Kolosenses 3:16 ani ki t’ilmáchtsik k’al tin kwentaj jechéˈ:

• ¿Janti in k’ak’nálak na Jehová an ok’ox belomtsik?

VIDEO: ¿Janti tu t’ajnal ni junkuntalábil? (2:12)

• ¿Jant’om junaxtaláb waˈach k’al xowaˈ in ulal Kolosenses 3:16 ani xowaˈ u t’ajnal ban junkuntaláb?

• Ban video o ban ch’ilab xi a chuˈuw, ¿waˈach jun xataˈ xi a kulbétnaˈ t’ajat tin kwentaj an junkuntaláb?

Ka ajaytsik 2 Korintios 9:7 ani ki t’ilmáchtsik k’al tin kwentaj jechéˈ:

• ¿Jant’ó ti yab u konyáb i tumín ban junkuntalábtsik xi in t’ajál an óltsixtsik k’al a Jehová?

Ka chuˈutsik junax xowaˈ neˈech ka wat’bá ban junkuntaláb jechéˈ i semana.

• Ban junkuntaláb xi neˈech ki chuˈuw, ¿janéy a kulbétnaˈ más o janéy a chalpayal abal neˈech ti tolmiy?

¿A choˈóbak?

Ti jw.org neˈech ka chuˈuw jowk’i ani jonti tu junkunal an óltsixtsik k’al a Jehová tin pubél an Chabál.

1. Ban junkuntalábtsik u wat’báb i t’ilomtaláb, i tejwaˈmédhomtaláb ani videos. Ejtal an junkuntalábtsik u tujél ani u ok’nal k’al i ajatláb ani i oláb.

2. Ba juntsik i pejats ban junkuntaláb, xi k’wajattsik junkudh in ejtowal kin pidhnaˈ i tok’oxtaláb.

3. Ejtal an atiklábtsik u bach’wáb alwaˈ: iniktsik, uxumtsik, pubélábtsik, chakamtsik ani ejtal xitaˈ kin léˈnaˈ ka k’ale...

4. Abal ki ochich ban junkuntaláb xi in t’ajál an óltsixtsik k’al a Jehová yab yejat ka jalbiy, ani jeye, yab u konyáb i tumín.

5. Yejat ka t’ajaˈ i chápláb abal ki k’ale ban junkuntalábtsik

Ki chalpay k’al xowaˈ in t’ajaˈ nin yanél na Jesús. Jajáˈtsik u k’wajílak ti Nazaret ani abal tamub ti tamub ka k’aletsik kin k’ak’naˈ an Ok’oxláb ti Jerusalén, in yejentsitsik ka beley óx a k’itsáj ban béltsik xi ch’énlidh. Ka ajaytsik Lukas 2:39-42 ani ki t’ilmáchtsik k’al tin kwentaj jechéˈ:

• ¿A chalpayal abal in yejentsi yan i chápláb abal ka k’aletsik ti Jerusalén?

• Ani tatáˈ, ¿janéy a ejtowal ka t’ajaˈ abal ka ejto ki k’ale ban junkuntalábtsik?

• ¿A chalpayal abal alwaˈ ki k’ale ban junkuntalábtsik? ¿Jant’ó ta chalpayal anchanˈ?

• ¿Jant’ó ti alwaˈ ku k’ale ech’ek’ij ban junkuntalábtsik?

XOWAˈ I EXOBNÁMICH

Tam u k’alel ban junkuntaláb i exóbnál más k’al tin kwentaj na Jehová, ani i chapikmédhál an jaˈúbtaláb xi koˈol k’al jajáˈ ani i k’ak’nál k’al k’eˈet i atiklábtsik.

Ki chalpay xowaˈ i exobnámal

• ¿Jant’ó tu kanial na Jehová ku k’ale ban junkuntalábtsik?

• ¿Janéy neˈech ka exóbnaˈ ban junkuntaláb xi in t’ajál an óltsixtsik k’al a Jehová?

• ¿Janti más a chalpayal abal neˈech ti tolmiy an junkuntalábtsik?

KA EXLAˈ JUN XATAˈ MÁS

¿A ach’ál abal neˈech ki tidhebé tam ki k’ale ban junkuntaláb? Ka chuˈuw xowaˈ in t’ilál jun i inik xi in achʼálak anchanáˈ ani jant’ó tin kulbétnaˈ t’ajat an junkuntalábtsik

¡Yab jayk’i neˈech ki uk’tsi janti tu bach’wat! (4:16)

Ka exlaˈ jun i kwitól xi in kulbetnaˈ t’ajat an junkuntalábtsik ani ka chuˈuw xowaˈ in t’ajaˈ abal kin ojontsi ka k’ale.

U kulbétnaˈ t’aj an junkuntalábtsik (4:33)

Ka ajay xowaˈ k’eˈetsik in chalpayal k’al tin kwentaj an junkuntaláb.

«¿Jant’ó ti lej alwaˈ ki k’ale ban junkuntaláb xi in t’ajál an óltsixtsik k’al a Jehová?» (Artículo de jw.org)

Ka chuˈuw janti jun i inik xi at’axak in jalk’uy nin xeˈchintal tam tin tuju ka k’ale ban junkuntalábtsik.

«Putál xonti in k’alelak u júnálak nu kwiˈixtal» (La Atalaya, 1 de julio de 2014)