AJUMTALÁB 11
¿Janéy i ejtowal ki tʼajaˈ abal tu tolmiy an Tʼokat Dhutslab?
¿Juntsikíl a achʼál kʼibat ka tuju ka tʼajaˈ jun i tʼojláb xi lej púlek? Max anchanáˈ, awich xónaˈ a chalpay ka tʼajaˈ wetsik ti wetsik. Anchanáˈ jeye u watʼel kʼal an ajumtaláb kʼal an Biblia. Awil xónaˈ ka konoy tabáˈ: «¿Janti neˈech ku tuju ku ajay an Biblia?». Ba jechéˈ i ajumtaláb neˈech ki chuˈuw juntsik i takʼixtalábtsik xi neˈech tu tolmiy ki kulbétnaˈ ki ajay an Biblia ani ki exóbnaˈ.
1. ¿Jantʼó ti lej alwaˈ ki ajay an Tʼokat Dhutslab tsudhey ka tsudhey?
An atikláb xi kin ajay tsudhey ka tsudhey an Biblia, o «in takʼixtal na Jehová», neˈech ka kʼwajay kulbél tin xeˈchintal (ka ajay Salmo 1:1-3). Abal ka tuju ka ajay an Biblia, ka ajay wetsik ti wetsik ta kʼitsáj. Tam más ka exlaˈ in Káwintal an Okʼoxláb, más neˈech ka kulbétnaˈ ka ajay.
2. ¿Janéy neˈech ti tolmiy ka exbay an ajumtaláb kʼal an Biblia?
Abal ki exbay an ajumtaláb kʼal an Biblia yejat ki chalpay xowaˈ kʼwajat i ajyal, yab tokot koˈol ki ajaykʼi, más alwaˈ koˈol «ki chalpay alwaˈ xowaˈ in ulal» (Josué 1:8). Tam kʼwajat ta ajyal, ka tʼajaˈ jechéˈ i konowixtalábtsik: «¿Janéy tin okʼtsal kʼal tin kwentaj na Jehová jechéˈ i tsʼitsik pejats? ¿Janti tu ejtowal ku tʼajaˈ tu xeˈchintal? ¿Janti tu ejtowal ku éynaˈ abal ku tolmiy xi kʼeˈettsik?».
3. ¿Janti a ejtowal ka káldhaˈ an kʼij abal ka ajay an Tʼokat Dhutslab?
¿A achʼál tʼojláb abal ki jolkʼan abal ka ajay an Biblia? Yan i achʼál anchanáˈ. Ka tʼajaˈ an chápláb abal «ka éynaˈ[…] alwaˈ an kʼij» (Efesios 5:16). A ejtowal ka chuˈuw, jowaˈ tam hora a ejtowal ka ajay an Tʼokat Dhutslab. Juntsik in ajyal an Biblia dhajawtal. Kʼeˈettsik chʼejel a kʼitsáj, tam neˈech ti kʼapul. Ani juntsik akal, tam neˈchich ti wayal. Ani tatáˈ, ¿jowaˈ hora a chalpayal abal a ejtowal ka ajay an Biblia?
ABAL KI EXÓBNAˈ MÁS
Ki chuˈuw janéy i ejtowal ki tʼajaˈ abal ki kulbétnaˈ an ajumtaláb kʼal an Biblia. Techéˈ jeye neˈech ki exóbnaˈ, janéy i ejtowal ki tʼajaˈ abal ku tʼojojon alwaˈ, abal ki exbay an exobintaláb kʼal an Biblia.
Kʼayúm ti kʼayúm i ejtowal ki kulbétnaˈ ki kʼapu jun i kʼapnél, ani anchanˈ jeye kʼal an Biblia, kʼayúm ti kʼayúm i ejtowal ki kulbétnaˈ ki ajay.
4. Ka exóbnaˈ janéy a ejtowal ka tʼajaˈ abal ka kulbétnaˈ an ajumtaláb kʼal an Biblia
Awich xónaˈ i achʼál tʼojláb ki tuju ki ajay an Biblia. Por an ajumtaláb kʼal an Biblia jaˈich jelti an kʼapnél xi yab a lekámal, max ku tuju ka lekaˈ, kʼayúm ti kʼayúm neˈech ka kulbétnaˈ. Anchanˈ jeye kʼal an Biblia, kʼayúm ti kʼayúm neˈech ka léˈnaˈ tʼajat ka ajay. Ka ajaytsik 1 Pedro 2:2 ani ki tʼilmáchtsik kʼal tin kwentaj jechéˈ:
Max ka ajay an Biblia echʼekʼij, ¿a chalpayal abal neˈech ka kulbétnaˈ tʼajat, hasta neˈech ka léˈnaˈ ka ajay más?
Ka chuˈutsik an VIDEO abal ka exlaˈtsik juntsik i kwitóltsik ani tsidhantsik xin kulbétnaˈ kin ajay an Biblia. Tayíl ki tʼilmáchtsik kʼal tin kwentaj jechéˈ:
¿Jantʼó ti an kwitóltsik in achʼálak tʼojláb kin ajay an Biblia?
¿Kʼal janéy ti tolmiyattsik kin chápnantsi kin ajay an Biblia?
¿Janéy in tʼajaˈtsik abal kin kulbétnaˈ tʼajat an ajumtaláb kʼal an Biblia?
Xowaˈ a ejtowal ka tʼajaˈ:
Ka takuy jun i Biblia xi yab tʼojláb abal ka exbantsi, xin éynál jun i káwintaláb ít. Ka éynaˈ an Traducción del Nuevo Mundo max kʼwajat ba na káwintal.
Ka tuju ka ajay an Biblia kʼal an tʼilabtsik xi más a kulbetnál. Neˈech ka elaˈ xanti a ejtowal ka tʼajaˈ ban pejats «Janti ka tuju ka ajay an Biblia».
Ka dhutsaˈ xowaˈ a ajyámalich. Abal jechéˈ, ka éynaˈ an pejats «Xowaˈ jaykʼich u ajyámal ban Biblia» xi kʼwajat ba jechéˈ i libro.
Ka éynaˈ an aplicación JW Library®. Max ka paˈbaˈ ban teléfono o ba kʼeˈet i patʼál, neˈech ka ejto ka ajay ani ka achʼaˈ an Biblia xonti ki xeˈchin.
Ka éynaˈ an tolmixtalábtsik xi kʼwajat ban Traducción del Nuevo Mundo. Tajaˈ neˈech ka elaˈ i mapas, i tablas ani jun i glosario xi neˈech ti tolmiy abal ka kulbétnaˈ an ajumtaláb kʼal an Biblia.
5. Ki tʼojojon abal an exobintaláb kʼal an Biblia
Ka ajaytsik Salmo 119:34 ani ki tʼilmáchtsik kʼal tin kwentaj jechéˈ:
¿Jantʼó ti lej alwaˈ ka tʼajaˈ i oláb tam neˈech ka ajay an Biblia, ani tam neˈech ki tʼojojon abal ka bachʼuw an exobintaláb kʼal an Biblia?
¿Janéy a ejtowal ka tʼajaˈ abal ka exbay más alwaˈ xowaˈ kʼwajat a exóbnál? Tam ki tʼojojon abal ka exóbnaˈ an ajumtalábtsik, a ejtowal ka tʼajaˈ jechéˈ:
Ka ajay ejtal an párrafos xi kʼwajat ban jidhtal pejats ba cada ajumtaláb.
Ka ajay an textos kʼal an Biblia ani ka chuˈuw janéy ti okʼtsal kʼal xowaˈ kʼwajat ban ajumtaláb.
Ka miloy an tokʼoxtalábtsik. Jechéˈ neˈech ti tolmiy tam ki exóblách, kʼal xitaˈ ti pidhál an exobintaláb kʼal an Biblia.
¿A choˈóbak?
An óltsixtsik kʼal a Jehová i éynámal yan i Biblia, por i kulbetnál más an Traducción del Nuevo Mundo kom in ólnál an tsubaxtaláb, in éynál jun i káwintaláb xi exbantál ani in ólnál in bij an Okʼoxláb (ka chuˈuw jechéˈ i ajumtaláb ti jw.org: «¿In tʼajámal an óltsixtsik kʼal a Jehová jun i Biblia abal jajáˈtsik?»).
XOWAˈ JUNTSIK IN ULAL: «U achʼál tʼojláb ku ajay an Biblia, ani yab in jolat ku ajay».
Ani tatáˈ, ¿janéy a chalpayal?
XOWAˈ I EXOBNÁMICH
Abal ka exbay alwaˈ xowaˈ in ulal an Biblia ani ti tolmiy, yejat ka takuy jun i hora abal ka ajay, ani ka kontsi ti tolmixtaláb an Okʼoxláb, ani ki tʼojojon abal an exobintaláb kʼal an Biblia.
Ki chalpay xowaˈ i exobnámal
¿Janéy neˈech ti tolmiy abal ka káldhaˈ i alwaˈtaláb kʼal xowaˈ in ulal an Biblia?
¿Jowaˈ hora a ejtowal ka ajay ani ka exóbnaˈ an Biblia ta kwetémtal?
¿Jantʼó ti alwaˈ ki tʼojojon abal an exobintaláb kʼal an Biblia?
KA EXLAˈ JUN XATAˈ MÁS
Ki chalpay juntsik i tolmixtaláb xi neˈech tu tolmiy abal ki exbay xowaˈ i ajyal ban Biblia.
«Ka elaˈ i kulbétaláb abal ka ajay an Biblia» (La Atalaya, núm. 1 2017)
Ka exóbnaˈ óx xanéy xanti ka ajay an Biblia.
Ka chuˈuw xowaˈ a ejtowal ka tʼajaˈ abal ka kulbétnaˈ an ajumtaláb kʼal an Biblia.
Ka chuˈuw juntsik xanéy xowaˈ in tʼajámal juntsik i atikláb, xin neˈdhálich i kʼij in ajyal an Biblia.
Janti ki exóbnaˈ an Biblia abal ki exbay ani tu tolmiy (2:06)