AJUMTALÁB 26
¿Jantʼó ti waˈach tʼajat i atʼaxtaláb ani yajtsiktaláb?
Tam u watʼel jun i yajtsiktaláb, an atiklábtsik in konial tin báˈ «¿Jantʼókʼi ti watʼey jechéˈ?». Tu kʼijidhmédhál tʼajat abal an Biblia tu wiltsal kʼal tin kwentaj jechéˈ.
1. ¿Janéy in tʼajaˈ na Satanás abal ka waˈchin i atʼaxtaláb techéˈ ti Chabál?
An Lej Atʼax, na Satanás, in jekʼomnaˈ an Okʼoxláb. Na Satanás in léˈak kin takʼiy xi kʼeˈettsik, jaxtám tin tʼajaˈ abal na Adán ani na Eva kin jekʼomnaˈtsik jeye an Okʼoxláb. Na Satanás in kʼambiy na Eva (Génesis 3:1-5). In tʼajaˈ abal na Eva kin chalpay abal kʼwajatak ti kʼántsinal jun xataˈ alwaˈ kʼal an Okʼoxláb. Kʼal jechéˈ, jaˈich jelti max kʼwajatak in ulal abal an atiklábtsik neˈech ka kʼwajay más kulbél, max yab kin tʼajaˈ ti kwentaj an Okʼoxláb. Tam ti na Satanás in utsaˈ na Eva abal yab neˈech ka chemech, kʼwajatak in utsál an jidhtal kʼambixtaláb. Jaxtám an Biblia in ulal abal jajáˈ, jaˈich «jun i kʼambix ani jaˈich nu okʼlek kʼal an kʼambixtaláb» (Juan 8:44).
2. ¿Janéy in takuytsik kin tʼajaˈ na Adán ani na Eva?
Na Jehová jaˈich lej alwaˈ inik ani in pidhaˈ yan xanéy na Adán ani na Eva. In utsaˈ abal in ejtowaltsik kin kʼapu xowaˈkich i walíláb xi waˈach ban jardín ti Edén, por tokotkʼi jun yabaˈ (Génesis 2:15-17). Por bélkʼi anchanáˈ, jajáˈtsik in takuy kin kʼapu jachanˈ i walíláb. Na Eva «in pitaˈ an walíláb ani in tuju kin kʼapu». Ani tayíl, na Adán «in kʼapu jeye» (Génesis 3:6). Anchanˈ tám, cháblom in jekʼomnaˈtsik an Okʼoxláb. Na Adán ani na Eva yabak walbidhtsik, jaxtám in ejtowalak kin tʼajaˈ xowaˈ alwaˈ echʼekʼij. Por tin kwetémtaltsik in takuy kin jekʼomnaˈ an Okʼoxláb abal yab ka takʼyattsik kʼal jajáˈ, ani anchanáˈ ti walbintsik. Kʼal xowaˈ in tʼajaˈtsik in tametnaˈtsik yan i yajtsiktaláb (Génesis 3:16-19).
3. Kʼal xowaˈ in tʼajaˈtsik na Adán ani na Eva, ¿janéy i tamétnál xoˈ ta kʼitsáj?
Tam ti na Adán ani na Eva in jekʼomnaˈtsik an Okʼoxláb, walbintsik, ani in watʼbantsi an walastaláb ejtal nin chakámiltsik. Kʼal tin kwentaj na Adán, an Biblia in ulal: «Kʼal júnkʼi i inik ti tujey an walastaláb techéˈ ban kʼayˈlá ani kʼal tin kwentaj an walastaláb, waˈchin an chemlá. Kom ejtal walbin, jaxtám xoˈ ti ejtal u chemel» (Romanos 5:12).
Tám, ¿jantʼó ti watʼnál i yajtsiktaláb? Juntsikíl, kom i takuyal ki tʼajaˈ xowaˈ yab alwaˈ. O xowaˈ in takuyal kin tʼajaˈ kʼeˈet i atiklábtsik. Ani juntsikíl i watʼnál i yajtsiktaláb, kom xonti ku kʼwajay in ejtowal ka watʼey jun i kʼakʼadhtaláb (ka ajaytsik Eclesiastés 9:11).
ABAL KI EXÓBNAˈ MÁS
Ki chuˈuw jantʼó ti yab in tomnál ki walbiy an Okʼoxláb kʼal an atʼaxtaláb ani an yajtsiktaláb xi waˈach techéˈ ban Chabál, ani ki chuˈuw jeye janéy in achʼál jajáˈ tam in chuˈtal i watʼnál i yajtsiktaláb.
4. Xitaˈ tsubax in koˈol in walab
Yan i atiklábtsik in chalpayal abal jaˈich an Okʼoxláb xin takʼyal an Chabál. ¿Por tsubax jechéˈ? Ka chuˈutsik an VIDEO.
Ka ajaytsik Santiago 1:13 ani 1 Juan 5:19, ani ki tʼilmáchtsik kʼal tin kwentaj jechéˈ:
¿In koˈol in walab an Okʼoxláb kʼal an yajtsiktaláb ani an atʼaxtaláb xi waˈach?
5. Xowaˈ watʼenek kom na Satanás kʼwajat in takʼyal an Chabál
Ka ajaytsik Génesis 3:1-6 ani ki tʼilmáchtsik kʼal tin kwentaj jechéˈ:
¿Jantʼom kʼambixtaláb in uluw na Satanás? (Ka chuˈutsik an versículos 4 ani 5).
¿Janéy in tʼajaˈ na Satanás abal an atiklábtsik kin chalpay abal kʼwajatak ti kʼántsinal jun xataˈ alwaˈ kʼal na Jehová?
Kʼal xowaˈ na Satanás in utsaˈ na Eva, ¿in yejentsal an atiklábtsik ka takʼyat kʼal na Jehová abal ka kʼwajaytsik kulbél?
Ka ajaytsik Eclesiastés 8:9 ani ki tʼilmáchtsik kʼal tin kwentaj jechéˈ:
Tin nakél an kʼij xonti na Jehová yab kʼwajinek ti takʼix, ¿janti kʼwajinek an atiklábtsik?
Na Adán ani na Eva yabak walbidhtsik ani u kʼwajílaktsik ban Alabél Chabál por in tʼajaˈtsik ti kwentaj na Satanás ani in jekʼomnaˈtsik na Jehová.
Tam tin jekʼomnaˈtsik an Okʼoxláb in bukʼutsik tin pubíl an Chabál an atʼaxtaláb, an yajtsiktaláb ani an chemlá.
Na Jehová neˈech kin wixkʼaˈ an yajtsiktaláb, an atʼaxtaláb ani an chemlá. Ani an atiklábtsik neˈech juní ka witsiy ka kʼwajay tʼokat ani neˈechtsik ka kʼwajay ba jun i Alabél Chabál.
6. Na Jehová in yajnál tam in chuˈtal i watʼnál i yajtsiktaláb
¿A chalpayal abal an Okʼoxláb tu tʼajál ti kwentaj tam i watʼnál i yajtsiktaláb? Ka chuˈuw xowaˈ in dhutsaˈtsik an takʼix David ani an abatwále Pedro. Ka ajaytsik Salmo 31:7 ani 1 Pedro 5:7, ani ki tʼilmáchtsik kʼal tin kwentaj jechéˈ:
¿Janéy a achʼál kom an Okʼoxláb in tʼajál ti kwentaj xowaˈ a watʼnál ani in yajnál tam a watʼnál i yajtsiktaláb?
7. An Okʼoxláb neˈech kin wixkʼaˈ ejtal an yajtsiktaláb xin watʼnál an atiklábtsik
Ka ajaytsik Isaías 65:17 ani Apokalipsis 21:3, 4, ani ki tʼilmáchtsik kʼal tin kwentaj jechéˈ:
Na Jehová in ulal abal neˈech kin wixkʼaˈ ejtal an atʼaxtaláb xin tʼajál abal an atiklábtsik kin yajtsiknaˈ ani neˈech ku kʼwajay ejtal kʼijidh. ¿Ti kʼijidhmédhál ka choˈóbnaˈ jechéˈ? ¿Jantʼókʼi?
¿A choˈóbak?
Tam ti na Satanás in uluw an okʼox kʼambixtaláb, in kutʼlintsi tin bij na Jehová. Jechéˈ in léˈ kin uluw abal in tʼajaˈ abal an atiklábtsik kin chalpay abal na Jehová yab jaˈich jun i takʼix alwaˈ ani kʼanidhom. Por wéˈich i kʼij u kʼibel, na Jehová neˈech kin wixkʼaˈ ejtal an yajtsiktaláb ani neˈech kin tʼokédhaˈ nin bij. Ani neˈech kin tejwaˈmédhaˈ abal nin takʼixtal jaˈich xi más alwaˈ. Jowaˈ xi más exbadh abal na Jehová jaˈich abal ka jilkʼon tʼokat nin bij (Mateo 6:9, 10).
XOWAˈ JUNTSIK IN ULAL: «An Okʼoxláb tu jilámal abal ki watʼnaˈ i yajtsiktaláb».
¿Janéy a chalpayal tatáˈ?
XOWAˈ I EXOBNÁMICH
Na Satanás, na Adán ani na Eva jaˈichtsik xin koˈol in walab kʼal ejtal an atʼaxtaláb xi waˈach ban kʼayˈlál. Na Jehová in yajnál tʼajat tam in chuˈtal i watʼnál i tʼeˈpintaláb, jaxtám wéˈich i kʼij u kʼibel abal kin wixkʼaˈ an yajtsiktaláb.
Ki chalpay xowaˈ i exobnámal
¿Jantʼom kʼambixtaláb in utsaˈ an Lej Atʼax na Eva?
Kʼal xowaˈ in tʼajaˈ na Adán ani na Eva, ¿janéy i tamétnál xoˈ ta kʼitsáj?
¿Jantʼó ti ulal abal na Jehová in yajnál tam in chuˈtal i watʼnál i yajtsiktaláb?
KA EXLAˈ JUN XATAˈ MÁS
Ka chuˈuw xowaˈ in ulal an Biblia kʼal tin kwentaj janéy jaˈich an walastaláb.
Ka ajay jantʼom chalap in tʼajaˈ ka chalpayat na Satanás ban jardín ti Edén.
«¿Jantʼó tin jilál an Okʼoxláb ka waˈchin i yajtsiktaláb?» (La Atalaya, 1 de enero de 2014)
Ka chuˈuw xowaˈ in ólnál an Biblia kʼal tin kwentaj jun i yajtsiktaláb xi watʼey, ani ka chuˈuw abal an tokʼtsixtaláb xin pidhnál tu kʼijidhmédhál.
Ka chuˈuw xowaˈ in exóbnaˈ jun i inik xin watʼnámal i yajtsiktaláb.