AJUMTALÁB 27
¿Janti tu loˈwal nin chemtal na Jesús?
An okʼox tomkinél na Adán ani na Eva in jekʼomnaˈtsik an Okʼoxláb. Jaxtám ejtal wawáˈ u walbidh, i watʼnál i yajtsiktaláb ani u chemel.a Por yab ku chalpaxin. Na Jehová in tʼajámich jun xataˈ abal tu loˈo kʼal an walastaláb ani an chemlá, in pidhnaˈ nin Chakámil Jesucristo abal ka chemech kʼal wawáˈ ti kwentaj. An Biblia in okʼtsixnál abal na Jesús chemech abal kin jalbiy jun i loˈeltaláb. Abal ka loˈwat jun xitaˈ abal yab ka chemdhá u pidhnáb jun i jalbixtaláb, jechéˈ jaˈich jun i loˈoxtaláb. Ani na Jesús in pidhnaˈ in ejattal xi tʼokat abal kin loˈo an atiklábtsik (ka ajay Mateo 20:28). Na Jesús in ejtowalak ka kʼwajay abal echʼekʼij techéˈ ti chabál, por in takuy ki pidhnaˈ nin ejattal. Tam tin tʼajaˈ jechéˈ, in tʼajaˈ juní abal ki ejto ki kóˈoy an alwaˈtalábtsik xi na Adán ani na Eva in kʼipdhaˈ. Ani in tejwaˈmédhaˈ abal jajáˈ ani na Jehová tu kʼanidhál tʼajat. Jechéˈ i exobintaláb xi neˈech ki chuˈuw neˈech ti tolmiy abal ka kʼakʼnaˈ más nin chemtal na Jesús.
1. ¿Janti tu tolmiyal xoˈ nin chemtal na Jesús?
Kom wawáˈ u walbidh, i tʼajál yan xanéy xi yab in kulbetnál na Jehová. Por i ejtowal ki tʼajaˈ ti jaˈúb, max tsubax ku tʼeˈpin kʼal xowaˈ i tʼajámal ani ki kontsi ti pakwlantsixtaláb na Jehová, tin bij na Jesús. Ani jeye koˈol ki chápnantsi abal yabich ki tʼajaˈ an walastaláb xi i tʼajál wiˈik (1 Juan 2:1). An Tʼokat Dhutslab in ulal: «Pos na Kristo chemdhá kʼal tin kwentaj ni walab júnílkʼi abal malilílich i kʼij. Jajáˈ, jaˈich jun i lujat inik, por in watʼnaˈ i yajtsiktaláb kʼal wawáˈ ti kwenta xi yab u alwaˈ inik. In watʼnaˈ jechéˈ abal ti ku júnaˈ ba na Dios» (1 Pedro 3:18).
2. ¿Janti neˈech tu tolmiy nin chemtal na Jesús ban kʼij xi taˈtál?
Na Jehová in abaˈ na Jesús abal kin pidhnaˈ nin ejattal «abal ejtal xitaˈ kʼál ti ka belan, yab ka kʼaletsik ban kʼibeltaláb, tokot kin kóˈoytsik an xeˈchintaláb xi yab in koˈol in okʼontal» (Juan 3:16). Kʼal xowaˈ in tʼajaˈ na Jesús, na Jehová wéˈich i kʼij u kʼibel abal kin wixkʼaˈ ejtal an atʼaxtaláb xi in tʼajaˈ ka waˈchin na Adán. Jechéˈ in léˈ kin uluw abal max ki tejwaˈmédhaˈ i belomtaláb kʼal nin chemtal na Jesús, neˈech ki ejto ku kʼwajay abal echʼekʼij techéˈ ban Chabál tam ka wenkʼoyatich ti jun i alabél wichlom chabál (Isaías 65:21-23).
ABAL KI EXÓBNAˈ MÁS
Ki exbay más alwaˈ jantʼó ti na Jesús in pidhnaˈ nin ejattal ani janti ti tolmiyal kʼal xowaˈ in tʼajaˈ.
3. Nin chemtal na Jesús tu loˈwal kʼal an walastaláb ani kʼal an chemlá
Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼom alwaˈtaláb neˈech wiˈik kin bachʼuw na Adán max in tʼajámalak ti kwentaj an Okʼoxláb?
Ka ajaytsik Romanos 5:12 ani ki tʼilmáchtsik kʼal tin kwentaj jechéˈ:
¿Janéy a watʼnál xoˈ kom na Adan ti jiltsámal an walastaláb?
Ka ajaytsik Juan 3:16 ani ki tʼilmáchtsik kʼal tin kwentaj jechéˈ:
¿Jantʼó tin abaˈ na Jehová nin Chakámil techéˈ ti Chabál?
Na Adán jaˈichak jun i inik xi tʼokat, por tam tin jekʼomnaˈ an Okʼoxláb in jiltsi an atiklábtsik an walastaláb ani an chemlá.
Na Jesús jaˈichak jun i inik xi tʼokat ani kom jajáˈ echʼekʼij in tʼajaˈ ti kwentaj an Okʼoxláb, neˈech kin tʼajaˈ abal an atiklábtsik ka kʼwajay tʼokat ani ka kʼwajaytsik abal echʼekʼij.
4. Kʼal nin chemtal na Jesús ejtal an atiklábtsik in ejtowal kin bachʼuw i alwaˈtaláb
Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janti in ejtowal nin chemtal jun i inik kin pidhaˈ ti alwaˈtaláb ejtal an atiklábtsik?
Ka ajaytsik 1 Timoteo 2:5, 6 ani ki tʼilmáchtsik kʼal tin kwentaj jechéˈ:
Na Adán jaˈichak jun i inik xi tʼokat, por tam tin jekʼomnaˈ an Okʼoxláb, in jiltsi an atiklábtsik an walastaláb ani an chemlá. Na Jesús jaˈichak jeye jun i inik xi tʼokat. Tám, ¿janéy in tʼajaˈ abal «kin jalbiy nin jalbíl an loˈeltaláb abal ejtalkʼi»?
5. An loˈoxtaláb jaˈich jun i chʼejwalixtaláb xi an Okʼoxláb ti pidhál abal tatáˈ
Nin jaˈúbtsik na Jehová in chuˈtal an loˈoxtaláb jelti jun i chʼejwalixtaláb xi tʼajtsidh kʼal jajáˈ. Abal ki exlaˈ más kʼal tin kwentaj jechéˈ, ki chuˈuw xowaˈ in ulal Gálatas 2:20 ani ki tʼilmáchtsik kʼal tin kwentaj jechéˈ:
¿Janti in xalkʼaˈ na Pablo abal in belálak abal na Kristo in pidhnaˈ tin baˈ kʼal jajá tin kwentaj?
Tam ti na Adán walbin in watʼbantsi ejtal nin chakámiltsik an chemlá. Por na Jehová in abaˈ nin Chakámil abal ka tsích ti Chabál ani kin pidhnaˈ nin ejattal abal ka chemdhá ani anchanáˈ tatáˈ ka ejto ki kʼwajay abal echʼekʼij.
Tam ka ajay jechéˈ i versículos, ka chalpay janéy in achʼaˈ na Jehová tam tin chuˈuw an yajtsiktaláb xi kʼwajatak in watʼál na Jesús. Ka ajaytsik Juan 19:1-7 ani 16-18, ani ki tʼilmáchtsik kʼal tin kwentaj jechéˈ:
¿Janéy a achʼál kʼal xowaˈ na Jehová ani na Jesús in tʼajámal kʼal tatáˈ?
XOWAˈ JUNTSIK IN KONIAL: «¿Janti in ejtowal nin chemtal jun i inik kin loˈo ejtal an atiklábtsik?».
¿Janti neˈech ki tokʼon?
XOWAˈ I EXOBNÁMICH
Kʼal nin chemtal na Jesús, na Jehová tu pakwlantsal an ti walastalábil ani tu pidhál an alwaˈtaláb abal ki ejto ku kʼwajay abal echʼekʼij.
Ki chalpay xowaˈ i exobnámal
¿Jantʼó ti chemech na Jesús?
¿Jantʼó ti nin chemtal na Jesús in bajaw «kin jalbi nin jalbíl an loˈéltaláb abal ejtalkʼi»?
¿Jantʼom alwaˈtalábtsik a bachʼwal kom na Jesús chemech?
KA EXLAˈ JUN XATAˈ MÁS
Ka chuˈuw jantʼókʼi na Jesús in ejtowal tu loˈo.
«¿Janti in ejtowal kin loˈo nin chemtal na Jesús yan i atiklábtsik?» (Artículo de jw.org)
Ka chuˈuw janéy yejat ki tʼajaˈ abal ku loˈey.
¿Tu pakwlantsal na Jehová an walastalábtsik xi lej atʼax?
«Konowixtalábtsik tin kwentaj an Biblia» (La Atalaya, 1 de mayo de 2013)
Ka ajay janti ti tolmiyat jun i inik kom in exóbnaˈ jantʼó ti chemech na Jesús.
a An walastaláb yab tokot jaˈich ki tʼajaˈ jun xataˈ xi yab alwaˈ; ani jeye in léˈ kin uluw kej tam u waˈchinal i tsiˈdhálich an walastaláb, kom u chakámláb kʼal na Adán ani na Eva jaxtám tu ukʼpinal.