¿Janéy in ulal an Biblia kʼal tin kwentaj tam jun i inik ani jun i uxum u kwachíltsik junax?

Yan i atiklábtsik in tidhenál ka tʼilmách kʼal tin kwentaj tam jun i inik ani jun i uxum u kwachíltsik junax. Por tam an Biblia u tʼilom kʼal tin kwentaj jechéˈ, in tʼilál lej tajax ani kʼal yan i kʼakʼnaxtaláb. Xowaˈ tu tʼiltsal kʼal tin kwentaj jechéˈ tu tolmiyal tʼajat. Ani jechéˈ jaˈich kom an Biblia tál kʼal na Jehová, jajáˈ tu tʼajámal ani in exlál xowaˈ más alwaˈ abal wawáˈ. Jajáˈ tu tejwaˈmédhantsal janti i ejtowal ki kulbédhaˈ kʼal xowaˈ ki tʼajaˈ ti xeˈchintal ani janéy i ejtowal ki tʼajaˈ abal ku kʼwajay kulbél abal echʼekʼij.

1. ¿Janti in chuˈtal na Jehová tam jun i inik ani jun i uxum u kwachíltsik junax?

Na Jehová in pidhámal jachanˈ i chʼejwalixtaláb an inik ani an uxum, por yejat ka kʼwajaytsik tomkidh. Jechéˈ i chʼejwalixtaláb yab jaˈich tokot abal kin kóˈoytsik i chakam, más alwaˈ jaˈich abal ka xalkʼantsíxin abal u kʼánídháx. Jaxtám an Biblia in ulal: «ki kʼijidhbé kʼal na kʼimádhil xi a exlaˈ tam ta kwitól» (Proverbios 5:18, 19). Na Jehová in léˈ kej an belomtsik xi tomkidh ka kʼakʼnáxin. Jaxtám ti an belom xi tomkidh yab alwaˈ kin kʼambiy nin tomkíl (ka ajay Hebreos 13:4).

2. ¿Janéy jaˈich xowaˈ yab in kulbetnál an Okʼoxláb?

An Biblia in ulal: «yab neˈech kin ejto ka kʼwajay takʼnél kʼal na Dios, xu xeˈchinaltsik yab exbadh» (1 Korintios 6:9, 10). Tam ti an dhutsumtsik kʼal an Biblia in káwnaˈ xowaˈ an Okʼoxláb yab in kulbetnál in éynaˈtsik jun i káw griega xin ulal pornéia. Jechéˈ i káw in léˈ kin uluw 1) tam u junkunaltsik kʼal xi yab in tomtal,a 2) i iniktsik xu junkunal kʼal in at inik ani uxumtsik xu junkunal kʼal in at uxum ani 3) tam jun i atikláb u junkunal kʼal jun i koˈnél. Tam i tʼajál an chápláb abal yab ki tʼajaˈ xowaˈ an Okʼoxláb yab in kulbetnál, anchanˈ i kʼijidhmédhál na Jehová ani i bachʼwal yan i alwaˈtaláb (1 Tesalonicenses 4:3).

ABAL KI EXÓBNAˈ MÁS

3. Yab ka tʼajaˈ xowaˈ an Okʼoxláb yab in kulbetnál

Jun i inik xin tʼójontsalak an Okʼoxláb xin bij ta José in tʼajaˈ an chápláb abal ka kʼwajay tʼokat bin tʼuˈúl. Ka ajaytsik Génesis 39:1-12 ani ki tʼilmáchtsik kʼal tin kwentaj jechéˈ:

• ¿Jantʼó ti kʼale ti adhil na José? (Ka chuˈutsik an versículo 9).

• ¿A chalpayal abal na José in tʼajaˈ xowaˈ lujat? ¿Jantʼókʼi?

VIDEO: Yab ka tʼajaˈ xowaˈ an Okʼoxláb yab in kulbetnál (5:06)

Na Jehová in léˈ kej ejtal wawáˈ ki pojkaˈ xowaˈ jajáˈ yab in kulbetnál. Ka ajaytsik 1 Korintios 6:18 ani ki tʼilmáchtsik kʼal tin kwentaj jechéˈ:

• ¿Janéy in ejtowal kin tʼajaˈ kej jun i atikláb kin tʼajaˈ xowaˈ an Okʼoxláb yab in kulbetnál?

• ¿Janéy a ejtowal ka tʼajaˈ tatáˈ abal yab ka tʼajaˈ xowaˈ an Okʼoxláb yab in kulbetnál?

4. Tatáˈ a ejtowal ka átaˈ xowaˈ xi yab alwaˈ

VIDEO: Ki ajay an Biblia abal ki átʼaˈ xowaˈ xi yab alwaˈ (3:02)

• Tam ti an kidháb in chuˈuw kej kʼal xowaˈ in tʼajál ani in chalpayal in ejtowal kin kʼambiy nin kʼimádhil, ¿janéy in tʼajaˈ?

Hasta an belomtsik xi lujat koˈol kin tʼajaˈ an chápláb abal kin chalpay xowaˈ xi tʼokat. ¿Janéy a ejtowal ka tʼajaˈ abal yab ka chalpay xowaˈ an Okʼoxláb yab in kulbetnál? Ka ajaytsik Filipenses 4:8 ani ki tʼilmáchtsik kʼal tin kwentaj jechéˈ:

• ¿Janéy jaˈich xowaˈ alwaˈ ki chalpay?

• A chalpayal kej max ki ajay an Biblia, ki tʼójontsi an Okʼoxláb, ¿in ejtowal tu tolmiy abal yab ki tʼajaˈ xowaˈ an Okʼoxláb yab in kulbetnál? ¿Jantʼókʼi?

5. Nin abatnaxtal na Jehová tu tolmiyal tʼajat

VIDEO: Tam jun i atikláb kin tʼajaˈ jun xataˈ ani yab kin chalpay okʼox ti kin tʼajaˈ, in watʼnál i yajtsiktaláb (9:31)

• ¿Jantʼó tin watʼnaˈ yan i dhukʼeltaláb jechéˈ i kwitól? (Ka chuˈutsik Proverbios 7:8, 9).

• Kʼal xowaˈ in ulal Proverbios 7:23, 26, in xalkʼál kej tam jun i atikláb kin tʼajaˈ xowaˈ an Okʼoxláb yab in kulbetnál in watʼnál yan i yajtsiktaláb. ¿Jantʼom alwaˈtaláb neˈech ki bachʼuw max ku kʼwajay tʼokat ba ni tʼuˈúl?

• ¿Janti tu tolmix ki kóˈoy tʼokat ni tʼuˈúl abal ki kʼijidhnaˈ an ejattaláb abal echʼekʼij?

Juntsik in chalpayal kej an Okʼoxláb yab in kʼanidhál an atiklábtsik xu junkunal kʼal in at inik ani kʼal in at uxum. Por an Biblia in ulal abal an Okʼoxláb u kʼanidhom tʼajat ani in léˈ abal ejtal ka kʼwajay abal echʼekʼij. Ani abal ki bachʼuw jechéˈ i chʼejwalixtaláb, koˈol ku kʼwajay xanti jajáˈ in kulbetnál. Ka ajaytsik 1 Korintios 6:9-11 ani ki tʼilmáchtsik kʼal tin kwentaj jechéˈ:

• ¿A chalpayal abal an Okʼoxláb, tokot in pojkál xitaˈtsik u junkunal kʼal in at inik ani kʼal in at uxum?

Abal ki kʼijidhmédhaˈ an Okʼoxláb ejtal koˈol ki jalkuy ni xeˈchintal. ¿Alwaˈ ki chápnantsi abal ki tʼajaˈ jechéˈ? Ka ajaytsik Salmo 19:8, 11 ani ki tʼilmáchtsik kʼal tin kwentaj jechéˈ:

• ¿A chalpayal abal in abatnaxtal na Jehová jaˈich alwaˈ? ¿Jantʼó ta chalpayal anchanˈ?

XOWAˈ I EXOBNÁMICH

Na Jehová in kulbetnál kej jun i inik ani jun i uxum ka kwachitsik junax, por yejat ka kʼwajaytsik tomkidh.

Ki chalpay xowaˈ i exobnámal

• ¿Janéy jaˈich xowaˈ yab in kulbetnál an Okʼoxláb?

• ¿Janéy neˈech tu tolmiy abal yab ki tʼajaˈ xowaˈ an Okʼoxláb yab in kulbetnál?

• ¿Janti tu tolmiyal ki tʼajaˈ ti kwentaj nin abatnaxtal na Jehová?

KA EXLAˈ JUN XATAˈ MÁS

Ka exóbnaˈ jantʼó ti koˈol ka tomkin an inik ani an uxum xi in léˈtsik ka kʼwajay junax.

«¿Janéy in ulal an Biblia tam jun i inik ani jun i uxum kʼwajattsik junax ani yab tomkidh?» (Artículo de jw.org)

Ka chuˈuw kej an Biblia yab tu utsál ki pojkaˈ xitaˈtsik u junkunal kʼal in at inik ani kʼal in at uxum.

«¿Alwaˈ ka junkun jun i inik kʼal in at inik ani jun i uxum kʼal in at uxum?» (Artículo de jw.org)

Ka chuˈuw janti an takʼixtalábtsik xi kʼwajat ban Biblia tu tolmiyal abal yab ki tʼajaˈ xowaˈ an Okʼoxláb yab in kulbetnál.

«¿Jaˈich alwaˈ an sexo oral?» (Artículo de jw.org)

¿Janéy in tolmiy jun i inik xi u junkunal kʼal in at inik kin jalkʼuy nin xeˈchintal ani kin kʼakʼnaˈ an Okʼoxláb? Ka ajay an biografía «In kʼakʼná alwaˈ».

«In jalkʼuytsik nin xeˈchintal kʼal xowaˈ in exóbnaˈtsik ban Biblia» (La Atalaya, 1 de abril de 2011)