AJUMTALÁB 50
Janti a ejtowal ka kóˈoy jun a yaníl kulbél (pejats 2)
An chakamtsik jaˈich jun i chʼejwalixtaláb xi tál kʼal na Jehová. Ani na Jehová in léˈ abal an tátaˈlábtsik kin beletnaˈ alwaˈ jachanˈ i chʼejwalixtaláb. Jaxtám tin pidhámal i takʼixtalábtsik abal kin ejto kin tʼajaˈ. Ani jeye in pidhámal i takʼixtalábtsik an chakamtsik abal ka kʼwajay kulbél kʼal nin yaníl.
1. ¿Jantʼom takʼixtalábtsik in pidhál na Jehová an tátaˈlábtsik?
Na Jehová in léˈ abal an tátaˈlábtsik ani an nánaˈlábtsik kin kʼanidhaˈ nin chakámil ani kin watʼnaˈ i kʼij kʼal jajáˈtsik. Ani jeye in léˈ abal kin beletnaˈtsik abal yab kin watʼnaˈ xowaˈ yab alwaˈ, ani kin éynaˈtsik an Biblia abal kin okʼtsi (Proverbios 1:8). Na Jehová in pidhál jechéˈ i takʼixtaláb an tátaˈlábtsik abal xanti koˈol kin okʼtsi nin chakámil: Ka óntsi «ka takʼyaltsik abal kin tʼajál xowaˈ alwaˈ xan tin ulal nin takʼixtal [na Jehová]» (ka ajay Efesios 6:4). Na Jehová in kulbetnál juntʼakʼi kin chuˈuw an tátaˈlábtsik kin beletnaˈ nin chakámil ani kin tʼajaˈ anchanˈ xanti jajáˈ in ulal ani yab kin jiltsi jechéˈ i tʼojláb kʼeˈet i atikláb.
2. ¿Jantʼom takʼixtaláb in pidhál na Jehová an chakamtsik?
Na Jehová in utsál an chakamtsik: «ka exbantsi ejtal xowaˈ kin uluw na tátaˈ ani na nánaˈ», jechéˈ in léˈ kin uluw abal koˈol kin tʼajaˈ ti kʼij (ka ajay Kolosenses 3:20). Tam jun i chakam u tʼajax ti kʼij ani u kʼakʼnax, in kulbédhál nin tátaˈtsik ani in kulbédhál na Jehová (Proverbios 23:22-25). Na Jesús jaˈichak jun i chakam xu tʼajax ti kʼij ani yabak walbidh, por bélkʼi in tʼajálak ti kwentaj nin tátaˈtsik xi jaˈichak walbidh (Lukas 2:51, 52).
3. ¿Janéy in ejtowal kin tʼajaˈ an yaneláb abal ka kʼwajaytsik más utat kʼal na Jehová?
Max a koˈol i chakamtsik, tatáˈ a léˈ jeye abal jajáˈtsik kin kʼanidhaˈ na Jehová anchanˈ xanti tatáˈ a tʼajál. ¿Janti a ejtowal ka tʼajaˈ? Ka tʼajaˈ ti kwentaj jechéˈ i takʼixtaláb: «Koˈol ka okʼtsi táyidh táyidh na chakámiltsik [nin káwintal na Jehová] ani ka tʼiltsi tam i kʼwajat ta koyol ta kʼimáˈ, ani tam ki xeˈchin ban bél» (Deuteronomio 6:7). A tʼajámal xónaˈ ti kwentaj abal an chakamtsik in yejentsal ka utsan táyidh táyidh jun xataˈ abal yab kin ukʼtsi. Xowaˈ in léˈ kin uluw jechéˈ i pejats jaˈich abal tin nakél a kʼitsáj tatáˈ koˈol ka óltsi na chakámiltsik tin kwentaj na Jehová. Aníl jeye jaˈich lej exbadh abal semana ti semana ejtal an yaneláb kin káldhaˈtsik i kʼij abal kin exóbnaˈtsik an Biblia junax, anchanáˈ in kʼakʼnáltsik na Jehová. Ani aunque yab a koˈol i chakamtsik, ka exóbnaˈ an Biblia ta kwetémtal neˈech ti tolmiy juntʼakʼi.
ABAL KI EXÓBNAˈ MÁS
Ki exóbnaˈ juntsik i takʼixtaláb xi neˈech kin tolmiy an yaneláb abal ka kʼwajaytsik más kulbél.
4. Ka okʼtsi kʼal i kʼanidhomtaláb
Ka okʼtsi na chakámil jaˈich jun i tʼojláb xin yejentsal yan i chápláb. ¿Janti in ejtowal ti tolmiy an Biblia? Ka ajaytsik Santiago 1:19, 20 ani ki tʼilmáchtsik kʼal tin kwentaj jechéˈ:
¿Janti in ejtowal an tátaˈlábtsik kin tawnaˈ kʼal i kʼanidhomtaláb nin chakámil?
¿Jantʼó ti yab in tomnál jun i tátaˈláb kin takʼiy nin chakámil tam u chakúl?a
5. Ka beletnaˈ na chakámil
Aunque ka achʼaˈ wéˈ i tidhebél, por jaˈich lej exbadh ki tʼilmáchtsik kʼal na chakámil tin kwentaj an sexo. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼó tin achʼál tʼojláb juntsik i tátaˈláb ka tʼilmách tin kwentaj an sexo kʼal nin chakámil?
¿Kʼal janéy ti tolmiyat an tátaˈlábtsik abal ka tʼilmách kʼal nin chakámil kʼal tin kwentaj jechéˈ?
Anchanˈ xanti uludhich jechéˈ an xeˈchintaláb xi takʼidh kʼal na Satanás kʼwajat más kʼibenek. Ka ajaytsik 2 Timoteo 3:1, 13 ani ki tʼilmáchtsik kʼal tin kwentaj jechéˈ:
Juntsik i atiklábtsik xi atʼax xin káwnál an versículo 13 in atʼax tʼajtsal an chakamtsik. Jaxtám, ¿jantʼó ti lej exbadh abal an tátaˈlábtsik kin okʼtsi nin chakámil kʼal tin kwentaj an sexo? ¿Ani janéy in ejtowaltsik kin tʼajaˈ abal kin beletnaˈ abal yab ka tʼajtsin xowaˈ yab alwaˈ?
¿A choˈóbak?
An óltsixtsik kʼal a Jehová in tʼajámal yan i publicaciones abal kin tolmiy an tátaˈlábtsik abal kin okʼtsi nin chakámil tin kwentaj an sexo ani abal yab kin watʼnaˈ xowaˈ yab alwaˈ. Jechéˈ jaˈich juntsik i tolmixtaláb:
Ka beletnaˈtsik na chakámil (video)
«Janti ki tʼilmách kʼal na chakámil kʼal tin kwentaj an sexo» (¡Despertad!, núm. 5 2016)
6. Ka kʼakʼnaˈ na tátaˈtsik
An chakamtsik koˈol kin kʼakʼnaˈ nin tátaˈtsik, ani in xalkʼál abal in kʼakʼnál kʼal xanti in tawnál. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼó ti lej alwaˈ abal an chakamtsik kin tawnaˈ kʼal i kʼakʼnaxtaláb nin tátaˈtsik?
¿Janti in ejtowal kin xalkʼaˈ an chakamtsik abal in kʼakʼnál nin tátaˈtsik?
Ka ajaytsik Proverbios 1:8 ani ki tʼilmáchtsik kʼal tin kwentaj jechéˈ:
¿Janéy koˈol kin tʼajaˈ jun i chakam tam ka utsan xowaˈ koˈol kin tʼajaˈ kʼal nin tátaˈ ani kʼal nin nánaˈ?
7. Ka kʼakʼnaˈ na Jehová kʼal na yaníl
An óltsixtsik kʼal a Jehová in jolkʼáltsik i kʼij semana ti semana abal kin kʼakʼnaˈtsik na Jehová kʼal nin yaníl. ¿Janti in tʼajáltsik? Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy neˈech ti tolmiy abal ka tʼajaˈ an kʼakʼnaxtaláb kʼal na yaníl echʼekʼij?
¿Janéy in ejtowal kin tʼajaˈ an tátaˈlábtsik abal an kʼakʼnaxtaláb kʼal nin yaníl kin tolmiy ani kin kulbétnaˈ an chakamtsik? (Ka chuˈutsik an chʼilab xi kʼwajat tin tujtal).
¿A chalpayal abal waˈach jun xataˈ xi yab neˈech ti jilaˈ abal ki exóblách kʼal na yaníl? ¿Janéy jaˈich?
Ti wejeˈ na Jehová in léˈak abal an israelitas kin okʼtsi echʼekʼij nin chakámiltsik tin kwentaj an Biblia. Ka ajaytsik Deuteronomio 6:6, 7 ani ki tʼilmáchtsik kʼal tin kwentaj jechéˈ:
¿Janti a ejtowal ka tʼajaˈ ta xeˈchintal jechéˈ i takʼixtaláb?
Xowaˈ a ejtowal ka tʼajaˈ abal an kʼakʼnaxtaláb kʼal na yaníl:
Ka exóbnaˈtsik xowaˈ neˈech ka chuˈtat ban junkuntaláb.
Ka ajay ani ka tʼilaˈtsik jun i tʼilab xi kin kulbétnaˈ ejtal.
Max a koˈol i tsʼitsik chakamtsik, ka paˈbaˈ i videos o i dibujos xi tʼajadh abal jajáˈtsik ti jw.org.
Max a koˈol i chakamtsik xi wéˈ pakdhaˈ, a ejtowal ka paˈbaˈ i ajumtaláb xi tʼajadh abal an kwitóltsik ani an tsidhantsik xi kʼwajat ti jw.org.
Ka chʼilbay ani ka tejwaˈmédhaˈ janti watʼey ti wejeˈ jun i tʼilab xi kʼwajat ban Biblia.
Ka chuˈutsik ani ki tʼilmáchtsik kʼal tin kwentaj jun i video xi kʼwajat ti jw.org.
XOWAˈ JUNTSIK IN ULAL: «Lej tʼojláb abal an chakamtsik kin exbay xowaˈ in ólnál an Biblia».
¿Janéy a chalpayal tatáˈ?
XOWAˈ I EXOBNÁMICH
Na Jehová in léˈ abal an tátaˈlábtsik kin kʼanidhaˈ, kin beletnaˈ ani kin okʼtsi nin chakámil; ani in léˈ abal an chakamtsik kin kʼakʼnaˈ ani kin tʼajaˈ ti kʼij nin tátaˈtsik, ani abal ejtal tin yaníl kin kʼakʼnaˈtsik na Jehová.
Ki chalpay xowaˈ i exobnámal
¿Janéy in ejtowal kin tʼajaˈ an tátaˈlábtsik abal kin beletnaˈ ani kin okʼtsi nin chakámil?
¿Janti in ejtowal kin tejwaˈmédhaˈ an chakamtsik abal in kʼakʼnál nin tátaˈtsik?
¿Jowaˈ jaˈich an alwaˈtalábtsik xin bachʼwal an yaneláb tam in jolkʼáltsik i kʼij abal kin tʼajaˈ an kʼakʼnaxtaláb kʼal nin yaníl?
KA EXLAˈ JUN XATAˈ MÁS
¿Janéy in yejentsal an chakamtsik kin exóbnaˈ abal ka pubey alwaˈ?
«Akak i okʼtsixtalábtsik xi lej yejat abal an chakamtsik» (¡Despertad!, núm. 2 2019)
Ka ajay juntsik i takʼixtaláb xu pidhnal abal xitaˈ in belkóm in pakélil.
«¿In léˈ an Okʼoxláb abal ki beletnaˈ ni tátaˈtsik tam pubelábichtsik?» (Artículo de jw.org)
Ka chuˈuw janti jun i inik xi yabak in choˈób kin beletnaˈ nin chakámil tolmiyat kʼal an Biblia abal kin tʼajaˈ ti alwaˈ tátaˈláb.
Ka exóbnaˈ janéy in ejtowal kin tʼajaˈ jun i tátaˈláb abal ka junaxin alwaˈ kʼal nin chakámil.
a Tam an Biblia in ulal abal an chakamtsik koˈol ka takʼyat, in léˈ kin uluw abal koˈol ka okʼtsat ani ka tolmiyat. Yab in léˈ kin uluw abal koˈol ka kwadhan ani ka pewˈyat (Proverbios 4:1).