AJUMTALÁB 59
Tatáˈ a ejtowal ka kuxuy an atʼnaxtaláb
Ejtal in aykóliltsik na Kristo neˈech ka atʼan ani neˈech ka kʼwiyan. Por jechéˈ yab tu labandhál.
1. ¿Jantʼó ti yab tu labandhál kom tu atʼál an atiklábtsik?
An Tokʼat Dhutslab in ulal lej tajax abal «ejtaltsik xin léˈ ka kʼwajách jelt xan tin léˈ na Kristo Jesús, neˈech jeye ka atʼantsik» (2 Timoteo 3:12). Na Jesús atʼan kom yab in tʼajaˈ xowaˈ na Satanás ani jechéˈ i xeˈchintaláb in kulbetnál kin tʼajaˈ. Jaxtám wawáˈ weye neˈech ku atʼan kʼal an takʼixtsik ani kʼal kʼeˈet i belomtalábtsik kom yab i tʼajál xowaˈ jajáˈtsik in kulbetnál (Juan 15:18, 19).
2. ¿Janéy i ejtowal ki tʼajaˈ abal ku tʼojojon tam ku atʼan?
Koˈol ki chapikmédhaˈ ni belomtal kʼal na Jehová xoˈich. ¿Janti i ejtowal ki tʼajaˈ? Ki jolkʼaˈ i kʼij abal ki ajay an Biblia tsudhey ka tsudhey ani ki ólantsi, aníl jeye koˈol ku kʼale echʼekʼij ban junkuntalábtsik. Max ki tʼajaˈ ejtal jechéˈ neˈech ku kʼwajay tʼojojodh tam tu atʼaˈ an atiklábtsik ani tam tu ku atʼaˈ ni yaníl. An abatwále Pablo yánil atʼan ani kajokná ani jaxtám tin dhutsaˈ jechéˈ i káw: «An Okʼoxláb jaˈich xi tin tolmiyal. Yab neˈech ku jikʼnaˈ» (Hebreos 13:6).
Kʼeˈet xanéy xi neˈech tu tolmiy abal yab ku jikʼey jaˈich ku kʼale ki ólnaˈ an alwaˈ tʼilab. Kom neˈech tu tolmiy abal ki belaˈ más kʼal na Jehová ani yab ki chʼejnaˈ an atiklábtsik (Proverbios 29:25). Max tatáˈ ka tʼajaˈ an chápláb abal xoˈ ki kʼwajay tʼojojodh ani ka chapikmédhaˈ na belomtal kʼal na Jehová, jechéˈ neˈech ti tolmiy abal ka ojontsi ka ólnaˈ an alwaˈ tʼilab tam an awiltalábtsik kin uluw abal yabich koˈol ku óltsixin (1 Tesalonicenses 2:2).
3. ¿Jantʼom alwaˈtalábtsik i bachʼwal tam i kuxyal an atʼnaxtaláb?
Ni jun xitaˈ in kulbetnál ka atʼan nibal ka ayokná. Por tam i kuxyal jun i kʼibataláb, ni belomtal kʼal na Jehová u chapikmél más. Aníl jeye i achʼál abal u kʼwajat más utat kʼal jajáˈ kom i chuˈtal abal tu pidhál an tolmixtaláb xi más i yejentsal (ka ajay Santiago 1:2-4). Na Jehová in yajnál kom i watʼnál i yajtsiktaláb, por u kulbél kom in chuˈtal abal i ojontsal ki liktsi ani yab i walbál tibáˈ. An Tokʼat Dhutslab in ulal: «Max ki yajlombédhátsik abal a tʼajámal jun xataˈ alwaˈ, jechéˈ alwaˈ tʼajat tin tamét na Dios» (1 Pedro 2:20). Ejtal xitaˈ kin kuxuy an kʼibataláb ani kin óntsi kin tʼójontsi na Jehová, neˈech ka pidhan an ejattaláb xi yab in koˈol in okʼontal ba jun i chabál lej alabél xonti ejtal neˈech kin kʼakʼnaˈ na Jehová (Mateo 24:13).
ABAL KI EXÓBNAˈ MÁS
Ki chuˈuw juntsik xanéy xi tu óltsal abal i ejtowal ki ojontsi ki tʼójontsi na Jehová aunque ki watʼnaˈ i atʼnaxtaláb. Ani ki chuˈuw jeye jantʼom alwaˈtalábtsik neˈech tu pidhaˈ max ki ojontsi ki kuxuy.
4. Tatáˈ a ejtowal ka kuxuy an atʼnaxtaláb kʼal na yanél
Na Jesús in uluw abal ni yaníl neˈech tu atʼaˈ kom i kʼakʼnál na Jehová. Ka ajaytsik Mateo 10:34-36 ani ki tʼilmáchtsik kʼal tin kwentaj jechéˈ:
Tam jun xitaˈ in takwyal kin tʼójontsi na Jehová, ¿janéy awil ka watʼey kʼal nin yaníl?
Abal ka chuˈuw xowaˈ in watʼnaˈ juntsik i kidhábláb, ka chuˈutsik an VIDEO. Tayíl ki tʼilmáchtsik kʼal tin kwentaj jechéˈ:
¿Janéy neˈech ka tʼajaˈ max jun a kidhtal o jun a jaˈúb ti utsaˈ abal yabich ka tʼójontsi na Jehová?
Ka ajaytsik Salmo 27:10 ani Markos 10:29, 30. Ka ajay ti juntsik an pejats ani tayíl ki tʼilmáchtsik kʼal tin kwentaj jechéˈ:
¿Janti ti tolmiyal jechéˈ i káw tam na kidhtaltsik o na jaˈúbtsik ti kʼwiyál?
5. Ka ojontsi ka tʼójontsi na Jehová aunque ka watʼnaˈ i atʼnaxtaláb
Abal ki óntsi ki kʼakʼnaˈ na Jehová yab yejat ki chʼejnaˈ an atiklábtsik tam tu ku utsaˈ abal yabich ki tʼójontsi an Okʼoxláb. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy a kulbétnaˈ ban video xi neˈech ti tolmiy abal yab ki jikʼey?
Ka ajaytsik Hechos 5:27-29 ani Hebreos 10:24, 25. Ka ajay ti juntsik an pejats ani tayíl ki tʼilmáchtsik kʼal tin kwentaj jechéˈ:
¿Jantʼó ti lej yejat ki ojontsi tu junkunal ani tu óltsix aunque an awiltalábtsik yab tu jilál ki tʼajaˈ?
6. Na Jehová neˈech ti tolmiy ka kuxuy
Yan i óltsixtsik kʼal a Jehová in ojontsal kin tʼójontsi na Jehová aunque in watʼnál i kʼibataláb. Abal ka choˈóbnaˈ janti in tʼajámal, ka chuˈutsik an VIDEO. Tayíl ki tʼilmáchtsik kʼal tin kwentaj jechéˈ:
¿Kʼal janéy ti tolmiyat jechéˈ i kidháblábtsik kin kuxuy an kʼibataláb?
Ka ajaytsik Romanos 8:35 ani 37-39, ani Filipenses 4:13. Ka ajaytsik ti juntsik an pejats ani tayíl ki tʼilmáchtsik kʼal tin kwentaj jechéˈ:
¿Janti ti tolmiyal jechéˈ i pejats ka belaˈ abal neˈech ka kuxuy xowaˈkich i kʼibataláb xi ka koˈoy?
Ka ajaytsik Mateo 5:10-12 ani ki tʼilmáchtsik kʼal tin kwentaj jechéˈ:
¿Jantʼó ti a ejtowal ki kʼwajay kulbél aunque ka watʼnaˈ i atʼnaxtaláb?
Yan i óltsixtsik tin pubél an chabál in kuxyámal an atʼnaxtaláb. ¡Tatáˈ teye neˈech ka ejto ka kuxuy!
XOWAˈ JUNTSIK IN ULAL: «Nanáˈ yab neˈech ku ejto ku kuxuy max kin atʼan ani kin kʼwiyan».
¿Jantʼom textos neˈech ka éynaˈ abal ka kanatbédhaˈ jun i atikláb xin chalpayal anchanˈ?
XOWAˈ I EXOBNÁMICH
Na Jehová in kʼakʼnál tʼajat an chápláb xi tʼajál abal ki tʼójontsi aunque i watʼnál i atʼnaxtaláb. ¡Ani kʼal nin tolmixtal neˈech ki ejto ki kuxuy!
Ki chalpay xowaˈ i exobnámal
¿Jantʼó ti yab tu labandhál abal nin aykóliltsik na Kristo neˈech ku atʼan?
¿Janéy a ejtowal ka tʼajaˈ abal ki tʼojojon abal tam ka watʼnaˈ i atʼnaxtaláb?
¿Jantʼó ta belál abal neˈech ka ejto ka tʼójontsi na Jehová abal echʼekʼij aunque ka watʼnaˈ i kʼibataláb?
KA EXLAˈ JUN XATAˈ MÁS
Ka chuˈuw janti in tolmiy na Jehová jun i kidhábláb tam ti kʼwajay ban wikʼaxteˈ kom yab in tʼajaˈ an servicio militar.
Ka chuˈuw kʼal janéy ti tolmiyat jun i tomkinél abal kin tʼójontsi na Jehová aunque in watʼnaˈ yan i kʼibataláb.
I tʼójontsi na Jehová aunque i watʼnaˈ yan i kʼibataláb (7:14)
Ka exóbnaˈ janéy a ejtowal ka tʼajaˈ abal ka kuxuy an atʼnaxtaláb.
«Ki tujúch tu tʼojojonal abal tam ki tamétnaˈ i atʼnaxtaláb» (La Atalaya, julio de 2019)
Ka exóbnaˈ janéy a ejtowal ka tʼajaˈ tam na yanél ti atʼaˈ kom a tʼójontsal na Jehová. Ani ka chuˈuw janéy a ejtowal ka tʼajaˈ abal ki junaxintsik alwaˈ.