-
¿Janéy jaˈich nin Takʼixtal an Okʼoxláb?¡Ki kʼwajay kʼijidh abal echʼekʼij! Ka tuju ka exóbnaʼan Biblia
-
-
AJUMTALÁB 31
¿Janéy jaˈich nin Takʼixtal an Okʼoxláb?
An Tʼokat Dhutslab u tʼilom kʼal tin kwentaj nin Takʼixtal an Okʼoxláb. An Okʼoxláb neˈech kin éynaˈ nin Takʼixtal abal kin tʼajaˈ abal an Chabál ka kʼwajay xanti jajáˈ wiˈik tin léˈ. ¿Janéy jaˈich nin Takʼixtal an Okʼoxláb? ¿Janti i choˈób abal kʼwajatich ti takʼix? ¿Janéy in bajúmal kin tʼajaˈ hasta xoˈ ta kʼitsáj? ¿Janéy neˈech kin tʼajaˈ ban kʼij xi taˈtál? Neˈech ki tokʼoy jechéˈ i konowixtalábtsik ba jechéˈ i ajumtaláb ani ba cháb i ajumtalábtsik xi tál.
1. ¿Janéy jaˈich nin Takʼixtal an Okʼoxláb, ani jitaˈ jaˈich xu takʼix?
Nin Takʼixtal an Okʼoxláb jaˈich jun i takʼixtaláb xi jajáˈ in kʼwajbámal. An Takʼix jaˈich na Jesukristo ani kʼwajat ti takʼix tuwaˈ walkʼiˈ (Mateo 4:17; Juan 18:36). An Tʼokat Dhutslab in ulal abal neˈech ti takʼix malilíl i kʼij (Lukas 1:32, 33). Kom neˈech ti takʼix ba nin Takʼixtal an Okʼoxláb, neˈech kin takʼiy ejtal an atiklábtsik xi kʼwajat ban Chabál.
2. ¿Jitaˈtsik kʼwajat ti takʼix kʼal na Jesús?
Na Jesús yab u takʼix kwetém. Neˈech ti takʼix kʼal i atiklábtsik kʼal ejtalkʼi an kidhtalábtsik ani káwintalábtsik xi tál tin pubíl an Chabál (Apokalipsis 5:9, 10). ¿Jáy i atiklábtsik neˈech ti takʼix kʼal na Jesukristo? Tam ti na Jesús kʼwajay techéˈ ti Chabál, yan tʼajat i atiklábtsik in takuy kin tʼajaˈ ti aykol kʼal jajáˈ. Por yab ejtal neˈech tuwaˈ walkʼiˈ, tokotkʼi 144,000 neˈech ti takʼix kʼal na Jesús (ka ajay Apokalipsis 14:1-4). Ejtal nin aykóliltsik na Jesús xi ka jilkʼon techéˈ ti Chabál neˈech ka kʼwajay takʼnél kʼal nin Takʼixtal an Okʼoxláb (Salmo 37:29).
3. ¿Jantʼó ti jaˈich más alwaˈ nin Takʼixtal an Okʼoxláb kej xanti u takʼix an atiklábtsik?
Waˈach i takʼixtsik xin léˈ kin tolmiy an atiklábtsik, por yab in koˈol an chápláb abal kin tʼajaˈtsik ejtal xowaˈ in léˈtsik. Ani tayíl u wixkʼáb ani u ochel ti takʼix kʼeˈet i atikláb xi yab xónaˈ in tʼajál ti kwentaj xowaˈ in yejentsal an atiklábtsik. Por na Jesús, an Takʼix kʼal nin Takʼixtal an Okʼoxláb, yab jaykʼi neˈech ka wixkʼá. An Tʼokat Dhutslab in ulal abal an Okʼoxláb in «kʼwajbámal jun i takʼix xi yab jaykʼi neˈech ka wixkʼá» (Daniel 2:44). Na Jesús neˈech kin takʼiy putál an Chabál ani neˈech kin kʼanidhaˈ jununúl an atiklábtsik. Na Jesús jaˈich lej alwaˈ inik ani u kʼánidhax tʼajat, jajáˈ in tʼajál xowaˈ lujat, ani neˈech kin okʼtsi an atiklábtsik abal kin tʼajaˈtsik jeye anchanáˈ kʼal xi kʼeˈettsik (ka ajay Isaías 11:9).
ABAL KI EXÓBNAˈ MÁS
Ki chuˈuw jantʼó ti jaˈich más alwaˈ nin Takʼixtal an Okʼoxláb kej nin takʼixtal an atiklábtsik.
4. Nin Takʼixtal an Okʼoxláb neˈech kin takʼiy putál an Chabál
Na Jesukristo in koˈol más i chápláb ani awiltaláb kej kʼeˈet i atikláb xi kʼwajinek ti takʼix. Ka ajaytsik Mateo 28:18 ani ki tʼilmáchtsik kʼal tin kwentaj jechéˈ:
¿Jantʼó ti an awiltaláb xi in koˈol na Jesús jaˈich más púlek kej nin awiltal jun i takʼix xi waˈach techéˈ ti Chabál?
An takʼixtsik xi waˈach techéˈ ti Chabál tokotkʼi in ejtowal kin takʼiy jun pejeˈ i chabál ani tayíl u jalkʼuyábtsik. ¿Neˈech ka watʼey jayéchkʼi kʼal nin Takʼixtal an Okʼoxláb? Ka ajaytsik Daniel 7:14 ani ki tʼilmáchtsik kʼal tin kwentaj jechéˈ:
Kom nin Takʼixtal an Okʼoxláb yab jaykʼi neˈech ka wixkʼá ¿janti neˈech tu tolmiy jechéˈ?
¿Jantʼó ti lej alwaˈ abal neˈech kin takʼiy putál an Chabál?
5. An takʼixtsik xi waˈach techéˈ ti Chabál koˈol ka jalkʼuyat
¿Jantʼó ti nin Takʼixtal an Okʼoxláb yejat kin wixkʼaˈ an takʼixtsik xi waˈach techéˈ ti Chabál? Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy in tʼajámal an takʼixtsik xi waˈach techéˈ ti Chabál?
Ka ajaytsik Eclesiastés 8:9 ani ki tʼilmáchtsik kʼal tin kwentaj jechéˈ:
¿A chalpayal abal nin Takʼixtal an Okʼoxláb yejatich kin wixkʼaˈ an takʼixtsik xi waˈach techéˈ ti Chabál? ¿Jantʼókʼi ?
6. An takʼixtsik xi neˈech ti takʼix ba nin Takʼixtal an Okʼoxláb tu exbayal alwaˈ
Na Jesús jaˈich xi neˈech tu takʼiy, ani kom jajáˈ kʼwajay techéˈ ban Chabál jaxtám «in ejtowal ti ku kóˈontsi ti yajnantsixtaláb» (Hebreos 4:15). Na Jehová in takwyámal 144,000 i iniktsik ani uxumtsik abal kin tolmiy ti takʼix na Jesús. Jechéˈ i atiklábtsik tál ba «ejtalkʼi an kidhtalábtsik, an káwintaláb», bitsowtsik ani pakdhaˈ bitsow (Apokalipsis 5:9).
¿Janéy a achʼál kom na Jesús ani nin tolmiwáltsik in exbayal xowaˈ tatáˈ a watʼnál? ¿Jantʼó?
Na Jehová in takwyámal i iniktsik ani mímlábtsik xi júnich in káwintal ani júnichtsik in bitsówil abal ka kʼale ti takʼix kʼal na Jesús
7. Xowaˈ tu kontsal ki tʼajaˈ nin Takʼixtal an Okʼoxláb jaˈich más alwaˈ
An takʼixtsik xi waˈach techéˈ ti Chabál in tʼajámaltsik i abatnaxtalábtsik abal kin tolmiy an atiklábtsik. Nin Takʼixtal an Okʼoxláb aníl jeye in koˈol i abatnaxtalábtsik, ani xitaˈ in léˈ ka kʼwajay takʼidh koˈol kin tʼajaˈ ti kwentaj. Ka ajaytsik 1 Korintios 6:9-11 ani ki tʼilmáchtsik kʼal tin kwentaj jechéˈ:
¿Janti ta chalpayal neˈech ka kʼwajay an atiklábtsik tam ejtaltsik kin tʼajaˈ ti kwentaj xowaˈ in léˈ an Okʼoxláb?a
¿A chalpayal abal alwaˈ xowaˈ na Jehová in kontsal an atiklábtsik abal kin tʼajaˈ? ¿Jantʼókʼi ta chalpayal anchanˈ?
¿Janti i choˈób abal an atiklábtsik xi yab in tʼajál xowaˈ in ulal an Okʼoxláb in ejtowal kin jalkʼuy tin báˈ? (Ka chuˈutsik an versículo 11).
An takʼixtsik in kʼwajbámal i abatnaxtalábtsik abal kin tolmiy ani kin beletnaˈ an atiklábtsik. Nin Takʼixtal an Okʼoxláb ani jeye in kʼwajbámal i abatnaxtalábtsik abal kin tolmiy an atiklábtsik, ani jechéˈ jaˈich más alwaˈ kej xin kʼwajbámal an takʼixtsik xi waˈach techéˈ ti Chabál.
XOWAˈ JUNTSIK IN ULAL: «Nin Takʼixtal an Okʼoxláb i neˈdhál ti itsích».
¿Janéy neˈech ka tokʼoy?
XOWAˈ I EXOBNÁMICH
Nin Takʼixtal an Okʼoxláb kʼwajatich ti takʼix tuwaˈ walkʼiˈ ani neˈech kin takʼiy putál an Chabál.
Ki chalpay xowaˈ i exobnámal
¿Jitaˈtsik neˈech ka kʼwajay ti takʼix ba nin Takʼixtal an Okʼoxláb?
¿Jantʼó ti nin Takʼixtal an Okʼoxláb jaˈich na más alwaˈ?
¿Janéy in léˈ na Jehová abal an atiklábtsik kin tʼajaˈ abal ka kʼwajay takʼnél kʼal jajáˈ?
KA EXLAˈ JUN XATAˈ MÁS
Ka ajay xowaˈ in uluw na Jesús abal xonti neˈech ka kʼwajay nin Takʼixtal an Okʼoxláb.
«Nin Takʼixtal an Okʼoxláb ¿jaˈich jun xataˈ xi neˈdhál ti itsích?» (Artículo de jw.org)
¿Jantʼó ti an Óltsixtsik kʼal a Jehová in tʼajál más ti kwentaj nin Takʼixtal an Okʼoxláb ani yab an takʼixtsik xi waˈach techéˈ ti Chabál?
Ka exóbnaˈ xowaˈ in ulal an Biblia kʼal tin kwentaj an 144,000 i atiklábtsik xi na Jehová in takwyámal abal ka kʼale ti takʼix kʼal na Jesús.
«¿Jitaˈtsik neˈech ka kʼale tuwaˈ walkʼiˈ?» (Artículo de jw.org)
¿Kʼal janéy ti tolmiyat jun i wikʼnél mímláb abal kin belaˈ abal tokot an Okʼoxláb neˈech kin wixkʼaˈ an atʼaxtaláb xi waˈach ban kʼayˈlál?
«U exóbnaˈ janti neˈech ka wixkʼá an atʼaxtaláb» (¡Despertad!, noviembre de 2011)
-
-
¡Nin Takʼixtal an Okʼoxláb kʼwajatich ti takʼix!¡Ki kʼwajay kʼijidh abal echʼekʼij! Ka tuju ka exóbnaʼan Biblia
-
-
AJUMTALÁB 32
¡Nin Takʼixtal an Okʼoxláb kʼwajatich ti takʼix!
In Takʼixtal an Okʼoxláb tujey ti takʼix tuwaˈ walkʼiˈ ti 1914. Ba jachanˈ i tamub tujey in okʼontal an kʼij abal ti takʼix an atiklábtsik. ¿Janti ti choˈób? Ba jechéˈ i ajumtaláb neˈech ka exóbnaˈ xowaˈ an wejeˈ káw in ulal xi neˈech ka watʼey ti 1914, ani xowaˈ an atiklábtsik neˈech jeye kin tʼajaˈ.
1. ¿Janéy in uluw an Biblia abal neˈech ka watʼey?
An dhutslab xin dhutsaˈ na Daniel in kʼej ulúmalich abal nin Takʼixtal an Okʼoxláb neˈech ka tujey ti takʼix tam ka okʼon an kʼij xi u bijyáb «búk i kʼij» (Daniel 4:16, 17). Ani yan i tamub más tayíl, na Jesús in uluw abal jechéˈ i kʼij jaˈich tam kʼeˈet i atiklábtsik xi yabtsik u judío kin takʼiy an Chabál, ani in okʼtsixnaˈ abal jeché i kʼij yabél okʼnék (Lukas 21:24). Ba jechéˈ i ajumtaláb neˈech ki exóbnaˈ abal jechéˈ i búk i kʼij okʼon ti 1914.
2. ¿Janti kʼwajinek an xeˈchintaláb desde ti 1914 ani janéy in tʼajámal an atiklábtsik?
Na Jesús konyat kʼal nin aykóliltsik: «¿Jantʼom exól ne ki chuˈuw tam i tálich ani tam u kʼunelich an pakwenib?» (Mateo 24:3). Na Jesús in tokʼoy abal neˈech ka waˈchin yan xanéy xi neˈech ka watʼey tayíl tam ti jajáˈ kin tujuw ti takʼix ba nin Takʼixtal an Okʼoxláb tuwaˈ walkʼiˈ. Jajáˈ in uluw abal neˈechak ka waˈchin i péjéxtaláb, i kʼaˈínab ani neˈech ka nikwin an Chabál (ka ajay Mateo 24:7). An Biblia in uluw jeye abal «tin okʼontalich jeché an kʼij» an atiklábtsik neˈech kin tʼajaˈ yan xataˈ xi yab alwaˈ, ani jechéˈ neˈech kin tʼajaˈ abal ka waˈchin «i kʼijtsik xi yajtsik» (2 Timoteo 3:1-5). Desde ti 1914 kʼwajat tʼajat ti tejwaˈmél xowaˈ an Biblia in uluw abal neˈech ka watʼey.
3. ¿Jantʼó ti kʼwajat lej kʼibenek an xeˈchintaláb tayíl tam ti nin Takʼixtal an Okʼoxláb tujey ti takʼix?
Wéˈ i kʼij tayíl tam ti na Jesús in bachʼuw ti takʼix, waˈchin jun i péjéxtaláb tuwaˈ walkʼiˈ, jajáˈ péjexin kʼal na Satanás ani nin tʼójontsixiltsik. Na Satanás yab in átaˈ an péjéxtaláb, jaxtám janti in ulal an Biblia, «jajáˈ ani nin tʼójontsixiltsik, petʼnátsik ban chabál» (Apokalipsis 12:9, 10, 12). Na Satanás xeˈech tʼajat u chakúl kom in choˈób abal yabich nakat i kʼij neˈech ka kʼwajay. Jaxtám kʼwajat in tʼajál abal tin putál an Chabál ka waˈchin yan i yajtsiktaláb. ¡Jaxtám tin pubél an Chabál kʼwajat lej kʼibenek tʼajat! Pero wéˈich u kʼij u kʼibel abal nin Takʼixtal an Okʼoxláb kin wixkʼaˈ ejtal an yajtsiktaláb xi waˈach.
ABAL KI EXÓBNAˈ MÁS
Ki exóbnaˈ jantʼó ti belál abal na Jesús tujey ti takʼix ti 1914, ani ki chuˈuw janéy koˈol ki tʼajaˈ wawáˈ.
4. An wejeˈ káw xi kʼwajat ban Biblia tu óltsal abal jaˈich ti 1914
An Okʼoxláb in tʼajaˈ abal an wejeˈ takʼix xi ti Babilonia xin bij ta Nabucodonosor kin kóˈoy jun i watsib xi tayíl neˈechak ka watʼey. Na Daniel in wilkaˈ abal jachanˈ i watsib koˈol kin chuˈuw kʼal nin takʼixtal na Nabucodonosor ani kʼal nin Takʼixtal an Okʼoxláb (ka ajaytsik Daniel 4:17).a
Ka ajaytsik Daniel 4:20-26. Tayíl ka éynaˈtsik an recuadro abal ka tʼokoy jechéˈ i konowixtalábtsik:
(A) ¿Janéy in chuˈuw na Nabucodonosor ba nin watsíb? (Ka chuˈutsik an versículos 20 ani 21).
(B) ¿Janéy neˈechak kin tamu an teˈ? (Ka chuˈutsik an versículo 23).
(C) ¿Janéy neˈechak ka watʼey tam ka okʼon «an búk i kʼij»? (Ka chuˈutsik an versículo 26).
An teˈ xin watsibnaˈ ani nin Takʼixtal an Okʼoxláb
AN WEJEˈ KÁW (Daniel 4:20-36)
Jun i takʼix
(A) Jun i yejcheˈ teˈ xi tʼekʼat tʼajat
An takʼix in jilál ti takʼix
(B) «Ka kotoytsik an teˈ» ani ka jilaˈtsik «ka watʼey búk i kʼij»
Witsiy ti takʼix
(C) «Neˈech ki witsiy juní ta takʼix»
Okʼox kidhbantaláb:
(D) ¿Jitaˈ in chʼilbayal an teˈ? (Ka chuˈutsik an versículo 22).
(E) ¿Jowkʼi tin jilaˈ ti takʼix? (Ka ajaytsik Daniel 4:29-33).
(F) ¿Janéy in tamu tayíl tam ti watʼey «an búk i kʼij»? (Ka ajaytsik Daniel 4:34-36).
OKʼOX KIDHBANTALÁB
Jun i takʼix
(D) Na Nabucodonosor, an takʼix xi ti Babilonia
An takʼix in jilál ti takʼix
(E) Tayíl ban tamub 606 a.e.c.b Na Nabucodonosor olman ani in jilaˈ ti takʼix búk i tamub
Witsiy ti takʼix
(F) Na Nabucodonosor lejkin ani witsiy juní ti takʼix
Chabtal kidhbantaláb:
(G) ¿Jitaˈ in chʼilbayal an teˈ? (Ka ajaytsik 1 Crónicas 29:23).
(H) ¿Jowkʼi tin jilaˈtsik ti takʼix? ¿Janti ti choˈób abal yab kʼwajataktsik ti takʼix tam ti na Jesús kʼwajatak techéˈ ti chabál? (Ka ajaytsik Lukas 21:24).
(I) ¿Jonti ani jowkʼi juní ti witsiy ti takʼix?
CHABTAL KIDHBANTALÁB
Jun i takʼix
(G) An takʼixtsik xi ti Israel xin chʼilbayalak nin Takʼixtal an Okʼoxláb
An takʼix in jilál ti takʼix
(H) Na Jerusalén pakwat ban tamub 607 a.e.c.; ani yab waˈchin i takʼixtsik xi ti Israel tin nakél 2,520 i tamub
Witsiy ti takʼix
(I) Ti 1914 na Jesús tujey ti takʼix ba nin Takʼixtal an Okʼoxláb
¿Jáy i kʼij u owel an búk i kʼij?
Juntsik i pejats kʼal an Biblia tu tolmiyal ki exbay kʼeˈettsik i pejats. Ani jaˈich xowaˈ u watʼel kʼal xowaˈ in ulal ti Apokalipsis, tʼajaˈ in ulal abal óx i kʼij kʼal chʼejel jaˈich 1,260 a kʼitsáj (Apokalipsis 12:6, 14). Jaxtám búk i kʼij jaˈich 2,520 i kʼitsáj. Juntsikíl, ban Biblia, jun a kʼitsáj in léˈ kin uluw jun i tamub (Ezequiel 4:6). Ani jaˈich xowaˈ u watʼel kʼal xowaˈ in dhutsaˈ na Daniel, tajaˈ i exbayal abal an búk i kʼij jaˈich 2,520 i tamubtsik.
5. Ti 1914 an xeˈchintaláb jalkʼun juntʼakʼi
Na Jesús in uluw janti neˈech ka kʼwajay an xeˈchintaláb tam jajáˈ ka tujey ti takʼix. Ka ajaytsik Lukas 21:9-11 ani ki tʼilmáchtsik kʼal tin kwentaj jechéˈ:
Kʼal xowaˈ in ulal an Biblia abal neˈech ka watʼey, ¿janéy jaˈich xi tatáˈ a chuˈúmalich o a achʼámalich abal u watʼel?
An apóstol Pablo in uluw janéy neˈech kin tʼajaˈ an atiklábtsik tin okʼontalich an kʼij kʼal nin takʼixtal an atiklábtsik. Ka ajaytsik 2 Timoteo 3:1-5 ani ki tʼilmáchtsik kʼal tin kwentaj jechéˈ:
Kʼal xowaˈ in ulal jechéˈ i versículos, ¿janéy a chuˈúmal abal in tʼajál an atiklábtsik?
6. Janéy in tomnál ki tʼajaˈ kom i choˈóbich abal nin Takʼixtal an Okʼoxláb kʼwajatich ti takʼix
Ka ajaytsik Mateo 24:3, 14 ani ki tʼilmáchtsik kʼal tin kwentaj jechéˈ:
¿Jantʼom tʼojláb xi kʼwajat ti tʼajnal in tejwaˈmédhál abal kʼwajatich ti takʼix nin Takʼixtal an Okʼoxláb?
¿Janti a ejtowal tatáˈ ki tólmixin kʼal jechéˈ i tʼojláb?
In Takʼixtal an Okʼoxláb kʼwajatich ti takʼix, ani wéˈich i kʼij u kʼibel abal kin takʼiy putál an Chabál. Ka ajaytsik Hebreos 10:24, 25 ani ki tʼilmáchtsik kʼal tin kwentaj jechéˈ:
¿Janéy yejat ki tʼajaˈ ejtal kom «i chuˈtal kej exomich ti kʼunel an kʼij»?
Max ka exóbnaˈ jun xataˈ xin ejtowal kin tolmiy xi kʼeˈettsik o hasta in ejtowal kin loˈo, ¿janéy neˈech ka tʼajaˈ?
XOWAˈ JUNTSIK IN KONIAL: «¿Jantʼó tin tʼilál tʼajat an tamub 1914 an óltsixtsik kʼal a Jehová?».
¿Janéy neˈech ka tokʼoy?
XOWAˈ I EXOBNÁMICH
An wejeˈ káw xi kʼwajat ban Biblia ani xanti kʼwajat an xeˈchintaláb xoˈ, in tejwaˈmedhál abal nin Takʼixtal an Okʼoxláb kʼwajatich ti takʼix. Ani wawáˈ i tejwaˈmédhál abal i belál tam u kʼalel ki ólnaˈ an alwaˈ tʼilab ani tam u kʼalel ban junkuntalábtsik.
Ki chalpay xowaˈ i exobnámal
¿Janéy watʼey tayíl tam ti okʼon an búk i kʼij kʼal an káw xin uluw na Daniel?
¿Jantʼó ta belál abal nin Takʼixtal an Okʼoxláb tujey ti takʼix ti 1914?
¿Janéy a ejtowal ka tʼajaˈ abal ka tejwaˈmédhaˈ abal a belál nin Takʼixtal an Okʼoxláb kʼwajatich ti takʼix?
KA EXLAˈ JUN XATAˈ MÁS
Ki ajay xowaˈ in ulal juntsik i atiklábtsik xi exóblomámadh abal janti an xeˈchintaláb jalkʼun tʼajat desde ti 1914.
«An kʼij jowkʼi an atiklábtsik más in jilaˈtsik kin tʼajaˈ xowaˈ alwaˈ» (¡Despertad!, abril de 2007)
Ki chuˈuw janti tolmiyat jun i inik kʼal xowaˈ in ulal Mateo 24:14.
¿Janti ti choˈób abal an capítulo 4 ti Daniel koˈol kin chuˈuw kʼal nin Takʼixtal an Okʼoxláb?
¿Janti ti choˈób abal an «búk i kʼij» xin ulal an capítulo 4 ti Daniel okʼon ti 1914?
a Ka ajay xi cháb an ajumtalábtsik xi kʼwajat tin okʼontal an pejats «Ka exlaˈ jun xataˈ más» xi kʼwajat ba jechéˈ i ajumtaláb.
b I éynál a.e.c. abal ki uluw okʼox ti ka tsích na Jesús techéˈ ti Chabál. Ani i éynál e.c. abal ki uluw tayíl tam ti tsích na Jesús techéˈ ti Chabál.
-
-
Xowaˈ nin Takʼixtal an Okʼoxláb neˈech kin tʼajaˈ¡Ki kʼwajay kʼijidh abal echʼekʼij! Ka tuju ka exóbnaʼan Biblia
-
-
AJUMTALÁB 33
Xowaˈ neˈech kin tʼajaˈ nin Takʼixtal an Okʼoxláb
Nin Takʼixtal an Okʼoxláb kʼwajatich ti takʼix. Ani wéˈich i kʼij u kʼibel abal kin tʼajaˈ yan i jalkʼuxtalábtsik techéˈ ti Chabál. Ba jechéˈ i exobintaláb neˈech ki exóbnaˈ juntsik i alwaˈtalábtsik xi nin Takʼixtal an Okʼoxláb neˈech kin tʼajaˈ ani xi tatáˈ teye a ejtowal ka aytsi kʼal i kulbétaláb.
1. ¿Janéy neˈech kin tʼajaˈ nin Takʼixtal an Okʼoxláb abal ka waˈchin juní i kʼijidhtaláb ani ka tʼajan xowaˈ alwaˈ techéˈ ban Chabál?
Ban péjéxtaláb xin bij Armagedón, na Jesús an Takʼix kʼal nin Takʼixtal an Okʼoxláb neˈech kin wixkʼaˈ ejtal an atiklábtsik xi atʼax ani an atiklábtsik xin takʼyal an Chabál (Apokalipsis 16:14, 16). Ba jachanˈ i kʼij, neˈech ka tʼajan an káw xin ulal an Biblia: «Tokot wéˈ i kʼij ani xi atʼaxtsik yabich neˈech ka waˈchin» (Salmo 37:10). Kʼal nin Takʼixtal an Okʼoxláb, na Jesús neˈech kin tʼajaˈ abal tin putál an Chabál ka waˈchin i kʼijidhtaláb ani ejtal kin tʼajaˈtsik xowaˈ alwaˈ (ka ajay Isaías 11:4).
2. ¿Janti neˈech ku kʼwajay tam ka tʼajanich xowaˈ in léˈ an Okʼoxláb?
Tam ka takʼxinich nin Takʼixtal an Okʼoxláb, an Tʼokat Dhutslab in ulal abal, «xi lujattsik neˈech kin dhabalnaˈ an Chabál ani tajaˈ neˈech ka kʼwajaytsik kʼijidh abal echʼekʼij» (Salmo 37:29). ¿A chalpayal janti neˈech ka kʼwajay an atiklábtsik tam ejtal kin kʼanidhaˈtsik na Jehová ani kin kʼanidhaˈ nin at kʼwajíl? ¡Neˈech ku kʼwajay lej kʼijidh! Yabich xitaˈ neˈech ka yawˈlách ani ejtal neˈech ki ejto ku kʼwajay kʼijidh abal echʼekʼij.
3. ¿Janéy neˈech kin tʼajaˈ nin Takʼixtal an Okʼoxláb tam kin wixkʼaˈich an atiklábtsik xi atʼax?
Tam na Jesús kin wixkʼaˈich an atiklábtsik xi atʼax, neˈech ka kʼwajay ti takʼix 1,000 i tamub. Tin nakél jachanˈ i kʼij, jajáˈ ani an 144,000 xi neˈechtsik ti tolmix neˈech kin tolmiy an atiklábtsik abal kin jilaˈtsik an walastaláb ani ka kʼwajaytsik tʼokat. Tayíl tam ka kidhey an mil i tamub, putál an Chabál neˈech ka kʼwajay alabél tʼajat, ani an atiklábtsik neˈech ka kʼwajay kulbél kom ejtaltsik neˈech kin tʼajaˈ xowaˈ an Okʼoxláb in kulbetnál. Tám na Jesús neˈech kin witsbantsi nin takʼixtal nin táta. Ba jachanˈ i kʼij nin bij an Okʼoxláb neˈech ka kʼwajay lej tʼokat kom yabich xitaˈ kʼál neˈech ka kʼutʼlintsat (Mateo 6:9, 10). Ani neˈech ka jilkʼon tajax abal tokot jajáˈ u takʼix alwaˈ ani in beletnál in bitsówil. Tayíl tám, na Jehová neˈech kin wixkʼaˈ na Satanás ani nin tʼójontsixiltsik ani ejtal an atiklábtsik xitaˈ kin palnaˈ na Satanás (Apokalipsis 20:7-10). Ejtal an alwaˈtalábtsik xi kin tʼajaˈ nin Takʼixtal an Okʼoxláb neˈech kin kuxuy abal echʼekʼij.
ABAL KI EXÓBNAˈ MÁS
Ki chuˈuw jantʼó ti ejtowal ki belaˈ abal an Okʼoxláb neˈech kin éynaˈ nin Takʼixtal abal kin tʼajaˈ ejtal xowaˈ in ulúmal neˈech kin tʼajaˈ ban Alabél Chabál.
4. Nin Takʼixtal an Okʼoxláb neˈech kin wixkʼaˈ ejtal an takʼixtsik xi waˈach techéˈ ban Chabál
«Tam an inik in takʼyámal in at inik jaˈichkʼi tokot abal kin atʼax tʼajtsi» (Eclesiastés 8:9). Na Jehová neˈech kin éynaˈ nin Takʼixtal abal kin lejkiy ejtal xowaˈ in tʼajámal an takʼixtsik.
Ka ajaytsik Daniel 2:44 ani 2 Tesalonicenses 1:6-8, ani ki tʼilmáchtsik kʼal tin kwentaj jechéˈ:
¿Janéy neˈech kin tʼajaˈ na Jehová ani na Jesús, kʼal an takʼixtsik xi waˈach techéˈ ti Chabál ani kʼal an atiklábtsik xi yab in léˈ kin tʼajaˈ ti kwentaj an Okʼoxláb?
¿Jantʼó ta belál abal na Jehová ani na Jesús echʼekʼij neˈech kin tʼajaˈ xowaˈ alwaˈ?
5. Na Jesús jaˈich an takʼix xi más alwaˈ
Tam na Jesús kin takʼiy an Chabál neˈech kin tʼajaˈ yan xataˈ abal kin tolmiy an atiklábtsik. Ka chuˈutsik an VIDEO abal ka telaˈ janti in tejwaˈmédhaˈ na Jesús abal in léˈ kin tolmiy an atiklábtsik ani abal jajáˈ pidhnék an chápláb kʼal an Okʼoxláb abal kin tʼajaˈ.
Xowaˈ na Jesús in tʼajaˈ techéˈ ti Chabál in tejwaˈmédhaˈ xowaˈ neˈech kin tʼajaˈ nin Takʼixtal an Okʼoxláb. Kʼal an alwaˈtalábtsik xi neˈech ki exóbna xowéy, ¿jowaˈ jaˈich xi a léˈich ka chuˈuw? Ka ajaytsik ejtal an textos xonti káldhats jechéˈ i káw xi an Okʼoxláb in ulúmal abal neˈech ka tʼajan.
XOWAˈ IN TʼAJAˈ NA JESÚS, TI CHABÁL . . .
XOWAˈ NEˈECH KIN TʼAJAˈ NA JESÚS, TUWAˈ WALKʼIˈ . . .
in kubdhaˈ i chapik ikʼ (Markos 4:36-41)
neˈech kin tʼajaˈ abal an Chabál ka kʼwajay alabél tʼajat (Isaías 35:1, 2)
in kʼapundhaˈ yan tʼajat i atiklábtsik (Mateo 14:17-21)
neˈech kin wixkʼaˈ an kʼaˈínab xi waˈach tin pubél an Chabál (Salmo 72:16)
in jeldhaˈ yan i atiklábtsik (Lukas 18:35-43)
neˈech kin tʼajaˈ abal ejtal an atiklábtsik ka kʼwajay tʼokat (Isaías 33:24)
in witsbantsi tin xeˈchintal juntsik i atikláb (Lukas 8:49-55)
neˈech kin ejdhaˈ yan i chemélomtsik ani neˈech kin wixkʼaˈ an chemlá (Apokalipsis 21:3, 4)
6. An Okʼoxláb neˈech kin éynaˈ nin Takʼixtal, abal ku kʼwajay kulbél ban kʼij xi taˈtál
Na Jehová neˈech kin éynaˈ nin Takʼixtal abal kin tʼajaˈ xowaˈ in léˈak tin tujtal abal an atiklábtsik. Neˈech ku kʼwajay abal echʼekʼij ba jun i Alabél Chabál. Ka chuˈutsik an VIDEO abal ka choˈóbnaˈ janti na Jehová kʼwajat in éynál na Jesús, abal kin tʼajaˈ xowaˈ in chalpayámal.
Ka ajaytsik Salmo 145:16 ani ki tʼilmáchtsik kʼal tin kwentaj jechéˈ:
¿Janéy a achʼál kom na Jehová neˈech kin pidhaˈ «xowaˈ in yejentsal ejtal xowaˈ kʼwajat ejat»?
XOWAˈ JUNTSIK IN ULAL: «Max ejtal ku tólmíxin an xeˈchintaláb neˈech ka kʼwajay más alwaˈ».
¿Janéy neˈech kin wixkʼaˈ nin Takʼixtal an Okʼoxláb xi an takʼixtsik xi techéˈ ti kʼayˈlál yab in ejtowal kin wixkʼaˈ?
XOWAˈ I EXOBNÁMICH
Nin Takʼixtal an Okʼoxláb neˈech kin tʼajaˈ xowaˈ an Okʼoxláb echʼekʼij in léˈnámal. Neˈech kin wenkʼo an Chabál ti jun i Alabél Chabál xonti neˈech ka kʼwajay i atiklábtsik xi tokot neˈech kin kʼakʼnaˈ na Jehová abal echʼekʼij.
Ki chalpay xowaˈ i exobnámal
¿Janéy neˈech kin tʼajaˈ nin Takʼixtal an Okʼoxláb abal kin tʼokédhaˈ nin bij na Jehová?
¿Jantʼó ti tsubax i belál abal nin Takʼixtal an Okʼoxláb neˈech kin tʼajaˈ ejtal xowaˈ in ulúmal?
Kʼal xowaˈ neˈech kin tʼajaˈ nin Takʼixtal an Okʼoxláb, ¿janéy jaˈich xi más a léˈich ka chuˈuw ka tʼajan?
KA EXLAˈ JUN XATAˈ MÁS
Ka exlaˈ janéy jaˈich an Armagedón.
Ka exóbnaʼ janéy neʼech ka watʼey ban kʼij xi na Jesús in bijiy an «kʼakʼadh yajtsiktaláb» (Mateo 24:21).
«¿Janéy jaʼich an kʼakʼadh yajtsiktaláb» ((Artículo de jw.org)
¿Janéy in ejtowal kin tʼajaˈ an yanelábtsik abal kin chalpay abal kʼwajatich ban Alabél Chabál?
Ka ajay an biografía «U koˈolak yan i konowixtalábtsik» abal ka exlaˈ janti jun i inik xin léˈak kin lejkiy an dhukʼeltalábtsik in elaˈ an tokʼoxtalábtsik xin aliyalak.
-