AJUMTALÁB 09
An oláb tu tolmiyal ku utey k’al an Ok’oxláb
¿A ach’ál juntsikíl abal a yejentsal i tolmixtaláb abal ka choˈóbnaˈ janéy ka tʼajaˈ? ¿A koˈol i konowixtalábtsik xi yabél a eltsámal ti tokʼtsixtaláb? ¿A yejentsal abal jun xitaˈ ti kʼijidhmédhaˈ? ¿A léˈ ki utey más kʼal na Jehová? Max anchanáˈ, an oláb neˈech ti tolmiy kʼal ejtal jechéˈ. Por, ¿janti koˈol ku olách? ¿In ach’ál an Ok’oxláb ejtal an olábtsik? ¿Janéy a ejtowal ka tʼajaˈ abal ka choˈóbnaˈ abal an Ok’oxláb in ach’ál an olábtsik xi a tʼajtsal? Wana ki chuˈuw.
1. ¿Jitaˈ koˈol ki ólantsi? ¿Janéy i ejtowal ki konoy ba ni olábil?
Na Jesús in ólnaˈ abal tokotkʼi koˈol ki ólantsi ni tátaˈ xi kʼwajat túˈ walk’iˈ. Ani jajáˈ jeye in ólantsálak na Jehová. Jun i kʼij jajáˈ in uluw: «Jaxtám enchéˈ ki ólantsik: ‹Tátaˈ xi kʼwajat walk’iˈ…›» (Mateo 6:9). Tam i ólantsal na Jehová, u utel más kʼal jajáˈ.
Ban olábtsik xi t’ajtsal na Jehová i ejtowal ki tʼilaˈ yan xanéy. Por, max i léˈ abal an Ok’oxláb tu tok’ontsi ti olábil, yab yejat ki konoy xowaˈ jajáˈ yab in kulbetnál. An Tʼokat Dhutslab in ulal «Pos max ki kontsi xataˈ xanti jajáˈkʼi tin kulbetnál, tu axtsal» (1 Juan 5:14). Na Jesús tu óltsi, janéy i ejtowal ki konoy tam ki tʼajaˈ an oláb (ka ajay Mateo 6:9-13). Ban oláb i ejtowal ki t’iltsi na Jehová xowaˈ wawáˈ i léˈ, por aníl jeye i ejtowal ki pidhaˈ ti jalbintsixtaláb k’al an tolmixtalábtsik xi tu pidhál ani ki kontsi kin tolmiy k’eˈet i atiklábtsik.
2. ¿Janti koˈol ku olách?
An Tʼokat Dhutslab tu kanial ki tʼajaˈ jechéˈ: «Ka t’iltsi an Ok’oxláb xowaˈ a ach’áltsik» (Salmo 62:8). Tám, tam i ólantsal na Jehová koˈol ki t’iltsi xowaˈ tsubax i ach’ál ti itsích. I ejtowal ku olách kawidh o ti chalápilkʼi, ani i ejtowal ku olách tudhúl, buxúl o kubúl, por xantinakich xanti ki tʼajaˈ yejat ki tejwaˈmédhaˈ abal i k’ak’nál na Jehová. I ejtowal ku olách xowaˈkich i kʼij ani xontikʼi ku k’wajay.
3. ¿Janti tu tok’ontsal an Ok’oxláb ni olábil?
In éynál yan xanéy. In éynál an Tʼokat Dhutslab abal tu tok’ontsi an konowixtalábtsik xi koˈol. An Tʼokat Dhutslab in ulal abal, in pidhál ti «chalpaxtaláb xitaˈ in yejentsal» jaxtám yejat ki ajay an Tʼokat Dhutslab (Salmo 19:7; ka ajay Santiago 1:5). Ani jeye, tu pidhál ti k’ijidhtaláb tam i wat’nál i tʼeˈpintalábtsik. Ani in éynál an kidháblábtsik abal tu tolmiy tam i yejentsal.
ABAL KI EXÓBNAˈ MÁS
Techéˈ neˈech ki exóbnaˈ janti i ejtowal ki tʼaja i olábtsik xi ka kale ti itsích ani kin kulbétnaˈ an Ok’oxláb ani janti tu tolmiyal an olábtsik.
4. Abal an Ok’oxláb kin ach’aˈ an olábtsik yejat ki tʼajaˈ xowaˈ jajáˈ in kulbetnál
¿Janéy yejat ki tʼajaˈ abal an Ok’oxláb tu axtsi ti olábil? Ka chuˈutsik an VIDEO.
Na Jehová in léˈ ki ólantsi tokot jajáˈ. Ka ajaytsik Salmo 65:2 ani ki t’ilmáchtsik k’al tin kwentaj jechéˈ:
¿A belál abal an Ok’oxláb xi «in ach’ál an olábtsik» in léˈ abal tatáˈ ka ólantsi? ¿Jant’ó ta chalpayal anchanˈ?
Max i léˈ kej an Ok’oxláb kin ach’aˈ ni olábil, yejat ki tʼajaˈ xowaˈ jajáˈ in kulbetnál. Ka ajaytsik Miqueas 3:4 ani 1 Pedro 3:12, ani ki t’ilmáchtsik k’al tin kwentaj jechéˈ:
¿Janti i ejtowal ki choˈóbna abal an Ok’oxláb tu axtsal ti olábil?
Ba jun i péjextaláb ejtal an atiklábtsik xi neˈech ti péjéx in kontsal an Okʼoxláb ka tolmiyat kin ataˈtsik an péjextaláb. ¿A chalpayal abal an Okʼoxláb neˈech kin tok’oy jechéˈ i olábtsik?
5. Tam ki ólantsi an Ok’oxláb yejat ki t’iltsi xowaˈ tsubax i ach’ál
Waˈach i atiklábtsik xi okʼtsidh abal tam ka olách koˈol kin ajay xowaˈ in ulal jun i úw ani kin wítsʼkʼókʼliy. ¿Por jaˈich an olábtsik xi in kulbetnál an Ok’oxláb? Ka ajaytsik Mateo 6:7 ani ki t’ilmáchtsik k’al tin kwentaj jechéˈ:
¿Janéy i ejtowal ki tʼajaˈ abal yab ki wítsʼkʼókʼliy jayéchk’i xowaˈ ki uluw ba ni olábil?
¿Janta chuˈtal max kʼitsáj ta kʼitsáj ka chalpay jun i alwaˈtaláb xi a kóˈyámal ta xeˈchintal ani tám ka pidhaˈ ti jalbintsixtaláb na Jehová? Max ka tʼajaˈ jechéˈ, neˈech tám ka chuˈuw abal waˈach yan xanéy abal t’iltsi na Jehová.
Jun i tátaˈláb xi u k’anidhom in léˈ abal nin chakámil kin uluw xowaˈ tsubax in achʼál. Anchanáˈ jeye na Jehová in léˈ ki tʼajaˈ k’al jajáˈ.
6. An oláb jaˈich jun i ch’ejwalixtaláb xi tu pidhál an Ok’oxláb
¿Janti in ejtowal tu tolmiy an oláb, tam i wat’nál i t’eˈpintalábtsik ba ni xeˈchintal? Ka chuˈutsik an VIDEO.
An Tʼokat Dhutslab in ulal abal an oláb in ejtowal tu pidhaˈ jun i púlek k’ijidhtaláb ti itsích. Ka ajaytsik Filipenses 4:6, 7 ani ki t’ilmáchtsik k’al tin kwentaj jechéˈ:
Aunque an oláb yab tu wixkʼantsal ejtal an t’eˈpintalábtsik xi i koˈol, ¿por janti tu tolmiyal?
¿K’al janéy tin kwentaj a léˈ ki t’ilmách ba na olábil?
¿A choˈóbak?
An káw amén in léˈ kin uluw «anchanˈ ka tʼajan» o «anchanáˈ». Ani desde ti wejeˈ u éynáb tam tu ok’yábak ka ulwat jun i oláb (1 Crónicas 16:36).
7. Ka jolk’aˈ i kʼij abal ki olách
Juntsikíl u tʼojlidh tʼajat ani i uk’tsal abal ki tʼajaˈ i oláb. ¿Janti in chuˈtalak na Jesús an oláb? Ka ajaytsik Mateo 14:23 ani Markos 1:35, ani ki t’ilmáchtsik k’al tin kwentaj jechéˈ:
¿Janti in tʼajálak na Jesús abal kin jolk’aˈ i kʼij abal ka olách?
Ani tatáˈ, ¿janti a ejtowal ka jolkʼaˈ i kʼij abal ki olách?
XOWAˈ JUNTSIK IN ULAL: «Yab in kwentaj jitaˈ ki ólantsi, an Ok’oxláb in ach’ál ejtal an olábtsik».
¿Janéy a chalpayal tatáˈ?
XOWAˈ I EXOBNÁMICH
Tam i ólantsal na Jehová ani i t’iltsal xowaˈ tsubax i ach’ál, u utel más k’al jajáˈ. Ani jeye tu pidhál i k’ijidhtaláb ti itsích ani tu pidhál i chápláb abal ki tʼajaˈ xowaˈ jajáˈ in kulbetnál.
Ki chalpay xowaˈ i exobnámal
¿Jitaˈ koˈol ki ólantsi?
¿Janti koˈol ki tʼajaˈ an oláb?
¿Janti tu tolmiyal an oláb?
KA EXLAˈ JUN XATAˈ MÁS
Ka chuˈuw an konowixtalábtsik xi in t’ajál an atiklábtsik kʼal tin kwentaj an oláb.
«Búk i konowixtalábtsik k’al tin kwentaj an oláb» (La Atalaya, 1 de octubre de 2010)
Ka ajay jant’ó ti lej alwaˈ ki olách ani janti a ejtowal ka tʼajaˈ más alwaˈ an olábtsik.
Ka exóbnaˈ xowaˈ in ólnál an Biblia k’al tin kwentaj jitaˈ koˈol ki olántsi.
«¿Koˈol ki éynaˈ jun i santo abal ku olách?» (Artículo de jw.org)
K’al jechéˈ i video ka exóbnaˈ jonti ani jowk’i a ejtowal ki olách.