AJUMTALÁB 08
Tatáˈ a ejtowal ka t’ajaˈ ta jaˈúb na Jehová
Na Jehová in léˈ abal tatáˈ ka exlaˈ más alwaˈ. ¿Jant’ók’i? Kom tam ka exlaˈ janti jaˈich jajáˈ ani xowaˈ in chalpayal kin t’ajaˈ, más neˈech ka léˈnaˈ ka exlaˈ ani ka t’ajaˈ ta jaˈúb. ¿Por tsubax lejtal i ejtowal ki t’ajaˈ ti jaˈúb an Ok’oxláb? (Ka ajay Santiago 2:23). ¿Janéy a ejtowal ka t’ajaˈ tatáˈ abal ka jaˈúbnaˈ? An T’okat Dhutslab tu pidhál an tok’oxtaláb ani tu óltsal jant’ó ti an jaˈúbtaláb k’al an Ok’oxláb jaˈich xowaˈ xi más exbadh xi tatáˈ a ejtowal ka koˈoy.
1. ¿Jowaˈ jaˈich an kanixtaláb xi ti t’ajtsal na Jehová?
«Ki utéchtsik ba na Dios ani jajáˈ neˈech ka utey k’al tatáˈtsik» (Santiago 4:8). ¿Janéy in léˈ kin uluw jechéˈ i káw? Kej na Jehová k’wajat ti kanial abal ka t’ajaˈ ta jaˈúb. Taltsik i atiklábtsik in ach’ál t’ojláb kin t’ajaˈ tin jaˈúb an Ok’oxláb kom yab in ejtowal kin chuˈuw. Por jajáˈ tu jiltsámal an T’okat Dhutslab, abal ki ejto ki exlaˈ ejtal xowaˈ i yejentsal k’al tin kwentaj janti jaˈich jajáˈ ani abal ki ejto ku utey. Tam i ajyal ban Biblia xowaˈ na Jehová in léˈ abal wawáˈ, neˈech ki léˈnaˈ más ki t’ajaˈ ti jaˈúb aunque yab i ejtowal ki chuˈuw.
2. ¿Jant’ók’i na Jehová jaˈich an más alwaˈ jaˈúb xi a ejtowal ka koˈoy?
Na Jehová jaˈich xitaˈ más ti k’anidhál. Jajáˈ in léˈ abal ki k’wajay lej kulbél ani in léˈ abal ka ólantsi tam ka yejentsi i tolmixtaláb. A ejtowal ka k’wajbaˈ «tin k’ubak na Dios ejtal xowaˈ a yéntsal, pos jajáˈ ti k’anidhál […] t’ajat» (1 Pedro 5:7). Na Jehová ech’ek’ij k’wajat tʼojojodh abal kin tolmiy, kin kʼijidhmédhaˈ ani kin och’ówiy nin jaˈúbtsik (ka ajaytsik Salmo 94:18, 19).
3. ¿Janéy in léˈ na Jehová abal kin t’ajaˈ nin jaˈúbtsik?
Na Jehová in k’anidhál ejtal an atiklábtsik, por tokot «in koˈol jun i alwaˈ jaˈúbtaláb k’al xi in t’ajáltsik xowaˈ alwaˈ» (Proverbios 3:32). Na Jehová in léˈ abal nin jaˈúbtsik kin t’ajaˈ xowaˈ alwaˈ ani yab kin t’ajaˈ xowaˈ jajáˈ in ulal abal yab alwaˈ. Juntsik i atiklábtsik in chalpayal abal yab jayk’i neˈech kin ejto ka k’wajay janti na Jehová in léˈ. Por na Jehová jaˈich lej k’anidhom ani in t’ajál ti kwentaj an chápláb xi in t’ajáltsik k’al xitaˈ k’ál tu k’anidháb ani xitaˈ in chápnantsal kin t’ajaˈ xowaˈ jajáˈ in kulbetnál (Salmo 147:11; Hechos 10:34, 35).
ABAL KI EXÓBNAˈ MAS
Techéˈ neˈech ki exóbnaˈ janéy más i ejtowal ki t’ajaˈ abal ki jaˈúbnaˈ na Jehová, ani jeye neˈech ki exóbnaˈ, jant’ó ti na Jehová jaˈich an más alwaˈ jaˈúbláb xi i ejtowal ki koˈoy.
4. Na Abrahán jaˈichak nin jaˈúb na Jehová
An t’ilab k’al tin kwentaj na Abrahán (xu bijyáb jeye ta Abrán) tu tolmiyal ki exbay janéy yejat ki t’ajaˈ abal ki t’ajaˈ ti jaˈúb an Okʼoxláb ani an labt’ajaxtalábtsik xin bach’wal nin jaˈúbtsik. Ka ajaytsik k’al tin kwentaj na Abrahán ti Génesis 12:1-4 ani ki t’ilmáchtsik k’al tin kwentaj jechéˈ:
¿Janéy in kontsi na Jehová na Abrahán?
¿Janéy in utsaˈ na Abrahán abal neˈech kin bach’uw?
¿Janéy in t’ajaˈ na Abrahán k’al xowaˈ utsan k’al na Jehová?
5. Xowaˈ na Jehová in léˈ kin t’ajaˈ nin jaˈúbtsik
Ejtal i léˈ ki koˈoy i alwaˈ jaˈúbtsik.
¿Janéy a kulbetnál kin t’ajaˈ na jaˈúbtsik abal tatáˈ?
Ka ajaytsik 1 Juan 5:3 ani ki t’ilmáchtsik k’al tin kwentaj jechéˈ:
¿Janéy in léˈ na Jehová abal nin jaˈúbtsik kin t’ajaˈ?
Abal ki t’ajaˈ ti kwentaj na Jehová, yejat xónaˈ ki t’ajaˈ i jalk’uxtalábtsik ti xeˈchintal. Ka ajaytsik Isaías 48:17, 18 ani ki t’ilmáchtsik k’al tin kwentaj jeché:
¿Jant’ó tin kontsal na Jehová kin t’ajaˈ i jalk’uxtaláb nin jaˈúbtsik?
Jun i jaˈúb xi tu k’anidhál tu utsál janéy koˈol ki t’ajaˈ abal ku k’wajay alwaˈ. Na Jehová jayéchk’i in t’ajál k’al in jaˈúbtsik.
6. Xowaˈ na Jehová in t’ajál abal kin tolmiy nin jaˈúbtsik
Na Jehová in tolmiyal nin jaˈúbtsik abal kin kuxuy an t’eˈpintalábtsik xi in wat’nál. Ka chuˈutsik an VIDEO ani ki t’ilmáchtsik k’al tin kwentaj jechéˈ:
¿Janti in tolmiy na Jehová an tsidhan xi kale ban video abal kin kuxuy an t’eˈpintalábtsik?
Ka ajaytsik Isaías 41:10, 13 ani ki t’ilmáchtsik k’al tin kwentaj jechéˈ:
¿Janti in ulal na Jehová abal neˈech kin tolmiy nin jaˈúbtsik?
¿Jant’ó ta belál abal na Jehová jaˈich jun i alwaˈ jaˈúbláb?
Na jaˈúbtsik xi tsubax ti k’anidhál, neˈech ti tolmiy tam ka yejentsi. Na Jehová jayéchk’i jeye neˈech kin t’ajaˈ k’al tatáˈ.
7. Abal ki jaˈúbnaˈ na Jehová yejat ku t’ilmách k’al jajáˈ ani ki ach’aˈ
Tam u t’ilom k’al ni jaˈúbtsik i exlál ani i k’anidhál más. Ka ajaytsik Salmo 86:6, 11 ani ki t’ilmáchtsik k’al tin kwentaj jechéˈ:
¿Janti i ejtowal ku t’ilmách k’al na Jehová?
¿Janti tu t’ilom na Jehová k’al wawáˈ?
Wawáˈ u t’ilom k’al na Jehová k’al an oláb, ani jajáˈ u káw k’al wawáˈ k’al an T’okat Dhutslab.
XOWAˈ JUNTSIK IN ULAL: «Yab i ejtowal ki t’ajaˈ ti jaˈúb an Ok’oxláb».
¿Jant’om texto neˈech ka éynaˈ abal ka ólnaˈ abal i ejtowal ki jaˈúbnaˈ na Jehová?
XOWAˈ I EXOBNÁMICH
Na Jehová in léˈ ka jaˈúbnaˈ ani neˈech ti tolmiy abal ki utey k’al jajáˈ.
Ki chalpay xowaˈ i exobnámal
¿Janti in tolmiyal na Jehová nin jaˈúbtsik?
¿Jant’ó tin utsál na Jehová nin jaˈúbtsik kin t’ajaˈ i jalk’uxtalábtsik?
¿A chalpayal abal t’ojláb xowaˈ in kontsal kin t’ajaˈ nin jaˈúbtsik? ¿Jant’ó ta chalpayal anchanˈ?
KA EXLAˈ JUN XATAˈ MÁS
¿Janti neˈech tu tolmiy ti xeˈchintal ki t’ajaˈ ti jaˈúb na Jehová?
Ka exóbnaˈ janti a ejtowal ka jaˈúbnaˈ an Ok’oxláb.
Ka exóbnaˈ janti jun i mímláb in t’ajaˈ i jalk’uxtalábtsik tin xeˈchintal kom in jaˈúbnaˈ na Jehová.
Ka ach’aˈ xowaˈ in chalpayal juntsik i kwitóltsik ani tsidhantsik k’al tin kwentaj na Jehová.