¿Janéy in ulal an Biblia kʼal tin kwentaj an ángeles?

Na Jehová in léˈ ki exlantsi nin yanél xi kʼwajat tuwaˈ walkʼiˈ. Ba jachanˈ i yaneláb kʼwajat an ángeles, xi u exláb jeye tin «chakámiltsik an Okʼoxláb» (Job 38:7). ¿Janéy in ólnál an Biblia kʼal tin kwentaj an ángeles? ¿Janéy in tʼajáltsik an ángeles? ¿Ejtal an ángeles xi waˈach in kʼál na Jehová?

1. ¿Jitaˈ jaˈich an ángeles?

Okʼox ti kin tʼajaˈ an Chabál, na Jehová in tʼajaˈ an ángeles. Ani jayéchkʼi jelti jajáˈ, an ángeles jaˈich i espíritus xi yab tejwaˈ ani u kʼwajíltsik tuwaˈ walkʼiˈ (Hebreos 1:14). Waˈach tʼajat yan i ángeles ani ejtal júnichtsik (Apokalipsis 5:11). An ángeles «in tʼajáltsik xowaˈ jajáˈ [Jehová] in ulal ani in tʼajáltsik ti kwentaj nin takʼixtal» (Salmo 103:20). Ti wejeˈ na Jehová in éynaˈ i ángeles abal kin ólnaˈ i óltsixtalábtsik abal kin tolmiy ani kin loˈo nin bitsówil. Ani xoˈ ta kʼitsáj, an ángeles in tolmiyal jeye nin aykóliltsik na Jesús abal kin elaˈ an atiklábtsik xin léˈ kin exlaˈ más an Okʼoxláb.

2. ¿Jitaˈ jaˈich na Satanás ani nin tolmiwáltsik?

Juntsik i ángeles in jilaˈ kin tʼojontsi an Okʼoxláb. Xi okʼox in tʼajaˈ u «bijyáb ti lej atʼax ani ta Satanás, xin kʼambiyal ejtal an atiklábtsik xi kʼwajat ban kʼaylá» (Apokalipsis 12:9). Na Satanás in léˈnaˈ kin takʼiy xi kʼeˈettsik, jaxtám in tʼajaˈ abal an okʼox atiklábtsik kin jilaˈ kin kʼakʼnaˈ an Okʼoxláb. Ani tayíl in tʼajaˈ abal kʼeˈet i ángeles kin tʼajaˈtsik jayéchkʼi. Jachanˈ an ángeles xi atʼax u bijyábtsik tin tolmiwáltsik an Lej Atʼax. Na Jehová in petʼnaˈ ti Chabál abal yabich ka kʼwajay tuwaˈ walkʼiˈ, jachanˈ i ángeles xi atʼax neˈech ka okʼondhátsik (ka ajay Apokalipsis 12:9, 12).

3. ¿Janti tu kʼambiyal na Satanás ani nin tolmiwáltsik?

Na satanás ani nin tolmiwáltsik in kʼambiyal an atiklábtsik kʼal an dhimantaláb, in tʼajál abal kin léˈnaˈtsik ka tʼilmách kʼal jajáˈtsik. Waˈach xitaˈtsik xin ajyal an horóscopos, xu kʼalel kin álnaˈ jitaˈ in chuˈtal an óttsik, xin ajyal an kʼubaklek abal ka óltsin janéy neˈech ka watʼey tayíl tin xeˈchintal, waˈach jeye xin álnál an áltsixtsik ani an dhimantsik. Ani jeye waˈach jitaˈ in aliyal i iláltsik xi kʼwajat kʼal an dhimantaláb. Ani juntsik u tʼajnal kin belaˈ abal in ejtowal ka tʼilmách kʼal an chemélomtsik. Pero na Jehová tu utsál: «Yab ka álnaˈ an dhimantsik nibal an atiklábtsik xin witʼál kin exlaˈ xowaˈkich» (Levítico 19:31). Na Jehová tu pidhál jechéˈ i takʼixtaláb kom in léˈ tu beletnaˈ abal an lej atʼax ani nin tolmiwáltsik yab tu kʼambiy.

ABAL KI EXÓBNAˈ MÁS

4. An ángeles in tolmiyal an atiklábtsik abal kin exlaˈ na Jehová

An ángeles yab u paˈíl abal kin óltsi an alwaˈ tʼilab an atiklábtsik. Por in tolmiyal nin aykóliltsik na Jesús abal kin ejto kin elaˈ an atiklábtsik xin léˈ kin exlaˈ an Okʼoxláb. Ka ajaytsik Apokalipsis 14:6, 7 ani ki tʼilmáchtsik kʼal tin kwentaj jechéˈ:

• ¿Jantʼó ti yejentsal abal an ángeles tu tolmiy ki ólnaˈ an alwaˈ tʼilab?

• ¿Janéy a achʼál kom an ángeles ti tolmiyal ka elaˈ an atiklábtsik xin léˈ kin exóbnaˈ an Biblia? ¿Jantʼókʼi?

5. Ki pojkaˈ an dhimantaláb ani ejtal xowaˈ in éynál an Lej Atʼax

Na Satanás ani nin tolmiwáltsik in atʼál na Jehová, ani tu atʼál wawáˈ. Ka ajaytsik Lukas 9:38-42 ani ki tʼilmáchtsik kʼal tin kwentaj jechéˈ:

• ¿Janéy in tʼajál nin tolmiwáltsik an Lej Atʼax kʼal an atiklábtsik?

Yab ki tʼajaˈ ni jun xataˈ abal an Lej Atʼax ka utey kʼal wawáˈ. Ka ajaytsik Deuteronomio 18:10-12 ani ki tʼilmáchtsik kʼal tin kwentaj jechéˈ:

• ¿Janéy in éynál nin tolmiwáltsik an Lej Atʼax abal tu kʼambiy ani ka tʼilmách kʼal wawáˈ? ¿Janéy a chuˈúmal in tʼajál an atiklábtsik ta kwentsálil kʼal tin kwentaj jechéˈ?

• Na Jehová tu utsál abal yab ki éynaˈ an dhimantaláb ¿A chalpayal abal alwaˈ jechéˈ i takʼixtaláb? ¿Jantʼó ta chalpayal anchanˈ?

Ka chuˈutsik an VIDEO ani ki tʼilmáchtsik kʼal tin kwentaj jechéˈ:

VIDEO: «Ka pojkaˈtsik an Lej Atʼax» (5:02)

• ¿A chalpayal abal kʼakʼadh xowaˈ in koˈolak tin kʼubak nin chakámil na Palesa? ¿Jantʼókʼi?

• ¿Janéy in tʼajaˈ na Palesa abal yabich ka jikʼedhá kʼal nin tolmiwáltsik an Lej Atʼax?

Nin tsubax aykóliltsik na Jesús echʼekʼij in pojkámal an dhimantaláb. Ka ajaytsik Hechos 19:19 ani 1 Korintios 10:21, ani ki tʼilmáchtsik kʼal tin kwentaj jechéˈ:

• ¿Jantʼó ti lej yejat ki tsikaˈ ejtal an eyentsixtaláb xin koˈol kin chuˈuw kʼal an dhimantaláb?

6. Ka tʼajaˈ an chápláb abal ka átaˈ an Lej Atʼax ani nin tolmiwáltsik

An demonios takʼidh kʼal an Lej Atʼax. Por an ángeles xin tʼojontsal an Okʼoxláb in tʼajáltsik ti kwentaj an arcángel Miguel, xi jaˈich kʼeˈet in bij xi kʼál tu bijyáb na Jesús. ¿Jáy i chápláb in koˈol na Miguel? Ka ajaytsik Apokalipsis 12:7-9 ani ki tʼilmáchtsik kʼal tin kwentaj jechéˈ:

• ¿Jitaˈ in koˈol más i chápláb: na Miguel ani an ángeles, o na Satanás ani nin tolmiwáltsik?

• ¿A chalpayal abal nin aykóliltsik na Jesús koˈol kin chʼejnaˈ na Satanás ani nin tolmiwáltsik?

Tatáˈ a ejtowal ka átaˈ an Lej Atʼax ani nin tolmiwáltsik. Ka ajaytsik Santiago 4:7 ani ki tʼilmáchtsik kʼal tin kwentaj jechéˈ:

• ¿Janéy a ejtowal ka tʼajaˈ abal ka beletnaˈ ta báˈ abal an Lej Atʼax ani nin tolmiwáltsik yab ka utey kʼal tatáˈ?

XOWAˈ I EXOBNÁMICH

An ángeles xi alwaˈ tu tolmiyal. Na Satanás ani nin tolmiwáltsik jaˈich nin atʼowáltsik na Jehová, ani in éynál an dhimantaláb abal kin kʼambiy an atiklábtsik.

Ki chalpay xowaˈ i exobnámal

• ¿Janéy in tʼajál an ángeles xi alwaˈ abal kin tolmiy an atiklábtsik kin exlaˈ na Jehová?

• ¿Jitaˈ jaˈich na Satanás ani nin tolmiwáltsik?

• ¿Jantʼó ti yab in tomnál ka aliy i tolmixtaláb ban dhimantaláb?

KA EXLAˈ JUN XATAˈ MÁS

Ka chuˈuw jantʼó ti na Jesús jaˈich an arcángel Miguel.

«¿Jitaˈ jaˈich an arcángel Miguel?» (Artículo de jw.org)

Ka ajay jantʼó ti belál abal an Lej Atʼax tsubax waˈach.

«¿Tsubax waˈach an Lej Atʼax?» (Artículo de jw.org)

Ka chuˈuw janéy in tʼajaˈ jun i mímláb abal yabich ka jikʼedhá kʼal an Lej Atʼax.

«Kʼwajay más kulbél tin xeˈchintal» (La Atalaya, 1 de julio de 1993)

Ka chuˈuw janti in éynál na Satanás an dhimantaláb abal kin kʼambiy an atiklábtsik.

«Xowaˈ in ólnál an Biblia kʼal tin kwentaj an magia ani an dhimantaláb» (¿Ha encontrado usted el camino a la vida eterna?, parte 5)