AJUMTALÁB 35
¿Janéy i ejtowal ki tʼajaˈ abal ki takuy xowaˈ alwaˈ?
Ejtal koˈol ki takuy janéy ki tʼajaˈ ti xeˈchintal. Yan kʼal xowaˈ ki takuy ki tʼajaˈ neˈech tu tolmiy ba ni xeˈchintal ani ku utey más kʼal na Jehová. Juntsikíl koˈol ki takuy jonti neˈech tu kʼwajíl, jonti neˈech tu tʼojnal o max neˈech ku tomkin. Max ki takuy ki tʼajaˈ xowaˈ alwaˈ, neˈech ku kʼwajay kulbél ani neˈech ki kulbédhaˈ na Jehová.
1. ¿Janti in ejtowal tu tolmiy an Biblia abal ki takuy ki tʼajaˈ xowaˈ alwaˈ?
Okʼox ti ka takuy ka tʼajaˈ jun xataˈ, ka kontsi tin tolmixtal na Jehová. Ani ka chápnantsi ka aliy ban Biblia xowaˈ jajáˈ in chalpayal (ka ajay Proverbios 2:3-6). Juntsikíl neˈech ka elaˈ i abatnaxtalábtsik xin ólnál xowaˈ na Jehová in léˈ abal ka tʼajaˈ. Ani xowaˈ más alwaˈ abal tatáˈ jaˈich ka tʼajaˈ ti kwentaj.
Por ¿max ban Biblia yab ka elaˈ jun i abatnaxtaláb kʼal xowaˈ a chalpayal ka tʼajaˈ? Na Jehová echʼekʼij neˈech ti pidhaˈ an tolmixtaláb abal ka choˈóbnaˈ jowaˈ jaˈich «an bél» xonti in tomnál ki kʼale (Isaías 48:17). ¿Janti neˈech kin tʼajaˈ? Jajáˈ neˈech kin éynaˈ i takʼixtalábtsik xi kʼwajat ban Biblia abal ka choˈóbnaˈ janéy ka tʼajaˈ. An takʼixtalábtsik jaˈich i okʼtsixtalábtsik xi tu tolmiyal ki exbay janéy in achʼál ani in chalpayal na Jehová. Jachanˈ i takʼixtalábtsik i elál tam i ajyal jun i tʼilab ban Biblia. Tam i exbayal xowaˈ na Jehová in chalpayal, jachanˈ tu tolmiyal ki takuy xowaˈ na Jehová in kulbetnál.
2. ¿Janéy koˈol ki tʼajaˈ ti kwentaj okʼox ki takuy ki tʼajaˈ jun xataˈ?
An Biblia in ulal abal «an atikláb xi chalpadh in lej tʼajál ti kwentaj janéy neˈech kin tʼajaˈ» (Proverbios 14:15). Jechéˈ in léˈ kin uluw kej okʼox ti ki takuy ki tʼajaˈ jun xataˈ yejat ku kubey ani ki chalpay max waˈach kʼeˈettsik xanéy xi ejtowal ki tʼajaˈ. Tam ka chalpay juntsik ti juntsik xowaˈ a ejtowal ka tʼajaˈ, ka konoy ta báˈ: «¿Jantʼom takʼixtalábtsik xi kʼwajat ban Biblia tin tolmiyal ku choˈóbnaˈ xowaˈ in chalpayal na Jehová kʼal tin kwentaj jechéˈ? ¿Janéy neˈech ku achʼaˈ max ku tʼajaˈ? ¿Janéy neˈech kin achʼaˈ xi kʼeˈettsik max ku takuy ku tʼajaˈ? Ani xowaˈ más exbadh, ¿neˈech kin kulbédhaˈ na Jehová?» (Deuteronomio 32:29).
An Okʼoxláb in koˈol an awiltaláb abal tu utsaˈ janéy jaˈich xowaˈ alwaˈ ani janéy jaˈich xowaˈ yab alwaˈ. Tam i exbayal an abatnaxtalábtsik xi tu pidhál ani an takʼixtalábtsik xi kʼwajat ban Biblia ani i chápnantsal ki tʼajaˈ ti kwentaj, exom i okʼtsal ni chalápil abal ka tʼójon alwaˈ. Anchanˈ tam ni chalápil neˈech tu óltsi xowaˈ alwaˈ ani xowaˈ yab alwaˈ (Romanos 2:14, 15). Max ni chalápil ki kóˈoy okʼtsidh alwaˈ neˈech tu tolmiy ki takuy xowaˈ alwaˈ ti xeˈchintal.
ABAL KI EXÓBNAˈ MÁS
Ki exóbnaˈ jantʼó ti lej exbadh ki tʼajaˈ ti kwentaj an takʼixtalábtsik xi kʼwajat ban Biblia ani ni chalápil tam neˈech ki takuy ki tʼaja jun xataˈ.
3. Ka jilaˈ abal an Biblia ti tolmiy
¿Janti tu tolmiyal an takʼixtalábtsik xi kʼwajat ban Biblia tam neˈech ki takuy ki tʼajaˈ jun xataˈ? Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼó tu jilámal na Jehová ki takuy ti kwetémtal xowaˈ neˈech ki tʼajaˈ?
¿Jantʼó tu pidhámal na Jehová jachanˈ i walkadhtaláb?
¿Janéy tu pidhámal an Okʼoxláb abal tu tolmiy abal ki ejto ki takuy ti kwetémtal xowaˈ alwaˈ?
Abal ka exóbnaˈtsik jun i takʼixtaláb xi kʼwajat ban Biblia, ka ajaytsik Efesios 5:15, 16. Tayíl ki tʼilmáchtsik janti a ejtowal «ka éynaˈtsik alwaˈ an kʼij» abal...
... ka ajay an Biblia tsudhey ka tsudhey.
... ka tʼajaˈ ta más alwaˈ tomkidh inik, tomkidh uxum, tátaˈláb o chakamláb.
... ki kʼale ban junkuntalábtsik.
4. Ka okʼtsi na chalápil abal ka takuy xowaˈ alwaˈ
Tam waˈach jun i abatnaxtaláb xi ti óltsal janéy in léˈ na Jehová ka tʼajaˈ, yab tʼojláb ka takuy ka tʼajaˈ xowaˈ alwaˈ. Por ¿ani max yab waˈach? Ka chuˈutsik an VIDEO ani ki tʼilmáchtsik kʼal in kwentaj jechéˈ:
Kʼal xowaˈ i chuˈuw ban video, ¿janéy in tʼajaˈ an kidhábláb abal kin okʼtsi nin chalápil ani anchanˈ kin takuy xowaˈ neˈech kin kulbetnaˈ na Jehová?
¿Jantʼó ti yab in tomnál ki kontsi jun xitaˈ abal tu utsaˈ janéy koˈol ki tʼajaˈ? Ka ajaytsik Hebreos 5:14 ani ki tʼilmáchtsik kʼal tin kwentaj jechéˈ:
Juntsikíl neˈech ki léˈnaˈ ki kontsi jun xitaˈ abal tu utsaˈ janéy koˈol ki tʼajaˈ, por ¿jantʼó tin tomnál abal ti kwetémtal ki choˈóbnaˈ janéy jaˈich xowaˈ alwaˈ?
¿Jantʼom tolmixtaláb i koˈol xi neˈech tu tolmiy abal ki okʼtsi ni chalápil ani ki takuy xowaˈ alwaˈ?
Ni chalápil jaˈich jelti jun i mapa, tu tolmiyal ki choˈóbnaˈ janéy neˈech ki tʼajaˈ ti xeˈchintal.
5. Ka tʼajaˈ ti kwentaj xowaˈ in chalpayal xi kʼeˈettsik
Kom yab jununúl i chalap, ejtal i takwyal ki tʼajaˈ kʼejtsik kʼejtsik xanéy i kulbetnál. ¿Janti i ejtowal ki xalkʼaˈ abal i tʼajál ti kwentaj xowaˈ in chalpayal xi kʼeˈettsik? Ki chuˈuw cháb xanéy.
Óltsixtaláb 1: Jun i kidhábláb uxum xin kulbetnál ti muknal u kʼalel ti tolmix ba jun i junkuntaláb xonti an kidháblábtsik mímláb yab in kulbetnál ti muknal.
Ka ajaytsik Romanos 15:1 ani 1 Korintios 10:23, 24, ani ki tʼilmáchtsik kʼal tin kwentaj jechéˈ:
Kʼal an versículos xi ajay, ¿janéy in ejtowal kin tʼajaˈ jechéˈ i kidhábláb? Ani tatáˈ, ¿janéy neˈech ka tʼajaˈ max a achʼál abal na chalápil ti jilál ka tʼajaˈ jun xataˈ por xi kʼeˈettsik in chalpayal abal yab alwaˈ?
Óltsixtaláb 2: Jun i kidhábláb in choˈób abal an Biblia in ulal abal yab walats max kin uchʼaˈ wéˈ i tsʼaˈik uxnél; por jajáˈ in ulal abal yab neˈech kin uchʼaˈ niwéˈ. Ani jun a kʼitsáj, u kanyáb kʼal an kidháblábtsik abal ka kʼale ti kʼijidhbél ani tʼajaˈ in chuˈtal i kidháblábtsik xi exom ti uchʼal wéˈ.
Ka ajaytsik Eclesiastés 7:16 ani Romanos 14:1, 10, ani ki tʼilmáchtsik kʼal tin kwentaj jechéˈ:
Kʼal xowaˈ i ajay ba jechéˈ i versículos, ¿janéy in ejtowal kin tʼajaˈ jechéˈ i kidhábláb? Ani tatáˈ, ¿janéy neˈech ka tʼajaˈ max a chuˈtal jun xitaˈ kʼwajat in tʼajál jun xataˈ xi tatáˈ a achʼál abal na chalápil yab ti jilál ka tʼajaˈ?
¿Janéy a ejtowal ka tʼajaˈ abal ka takuy xowaˈ alwaˈ?
1. Ka kontsi ti tolmixtaláb na Jehová abal ka choˈóbnaˈ janéy ka tʼajaˈ (Santiago 1:5).
2. Ka aliy i óltsixtaláb ban Biblia ani ban publicaciones abal ka elaˈ i takʼixtalábtsik kʼal tin kwentaj xowaˈ a yejentsal. A ejtowal jeye ka kontsi ti tolmixtaláb an kidháblábtsik xin exlálich más an Biblia.
3. Ka chalpay janéy neˈech ka achʼaˈ ani janéy neˈech kin achʼaˈ xi kʼeˈettsik kʼal xowaˈ ka tʼajaˈ.
XOWAˈ JUNTSIK IN ULAL: «Yab ka tʼajaˈ ti kʼij xowaˈ in ulal xi kʼeˈettsik. ¡Tatáˈ ka tʼajaˈ xowaˈ ka léˈnaˈ!».
¿Jantʼó ti koˈol ki kóˈoy ti kwentaj xowaˈ in achʼál an Okʼoxláb ani xowaˈ in achʼál xi kʼeˈettsik?
XOWAˈ I EXOBNÁMICH
I takwyal ki tʼajaˈ xowaˈ alwaˈ ti xeˈchintal tam i tʼajál ti kwentaj xowaˈ in chalpayal na Jehová kʼal tin kwentaj xowaˈ neˈech ki tʼajaˈ, ani jeye i tʼajál ti kwentaj max xowaˈ neˈech ki tʼajaˈ neˈech kin tolmiy xi kʼeˈettsik o neˈech kin itʼixbédhaˈ.
Ki chalpay xowaˈ i exobnámal
¿Janéy a ejtowal ka tʼajaˈ abal ka takuy xowaˈ na Jehová in kulbetnál?
¿Janéy a ejtowal ka tʼajaˈ abal ka okʼtsi na chalápil?
¿Janti a ejtowal ka xalkʼaˈ abal a tʼajál ti kwentaj xowaˈ in chalpayal xi kʼeˈet?
KA EXLAˈ JUN XATAˈ MÁS
¿Janéy a ejtowal ka tʼajaˈ abal ka takuy xowaˈ alwaˈ abal ki utey más kʼal an Okʼoxláb?
«Ki takuy ki tʼajaˈ xowaˈ alwaˈ abal ki kʼakʼnaˈ an Okʼoxláb» (La Atalaya, 15 de abril de 2011)
Ka chuˈuw janti tu pidhál an takʼixtalábtsik na Jehová.
Ka chuˈuw kʼal janéy ti tolmiyat jun i inik abal kin choˈóbnaˈ janéy kin tʼajaˈ.
Ka exóbnaˈ janti a ejtowal ka kulbédhaˈ na Jehová tam jajáˈ yab tu utsámal janéy koˈol ki tʼajaˈ.
«¿I yejentsal echʼekʼij ku utsan janéy koˈol ki tʼajaˈ?» (La Atalaya, 1 de diciembre de 2003)