AJUMTALÁB 36
Ki uluw echʼekʼij an tsubaxtaláb
Ejtal i léˈ ki kóˈoy i jaˈúbtsik xi kin uluw an tsubaxtaláb, ani na Jehová in léˈ jeye kin kóˈoy in jaˈúbtsik anchanˈ. Pero juntsikíl i achʼál tʼojláb ki uluw echʼekʼij an tsubaxtaláb kom ba jechéˈ i xeˈchintaláb an atiklábtsik in kulbetnál tʼajat kin uluw i kʼambixtaláb. ¿Neˈech ki bachʼuw i alwaˈtalábtsik max wawáˈ ki uluw echʼekʼij an tsubaxtaláb? ¿Jowaˈ jaˈich?
1. ¿Jantʼó ti yejat ki uluw echʼekʼij an tsubaxtaláb?
Tam i óltsal an tsubaxtaláb xi kʼeˈettsik, i tejwaˈmédhantsal na Jehová abal i kʼanidhál ani i kʼakʼnál. Yab ka ukʼtsi abal na Jehová in choˈób ejtal xowaˈ a chalpayal ani xowaˈ a tʼajál (Hebreos 4:13). Na Jehová in tʼajál ti kwentaj tam i ulal an tsubaxtaláb ani in kʼakʼnál tʼajat. An Tʼokat Dhutslab in ulal: «Na Jehová in pojkál an atiklábtsik xi yabtsik in tʼajál xowaˈ lujat, pero in koˈol jun i alwaˈ jaˈúbtaláb kʼal an atiklábtsik xin tʼajál xowaˈ alwaˈ» (Proverbios 3:32).
2. ¿Jowkʼi ti yejat ki uluw an tsubaxtaláb?
Ki tʼajaˈ xowaˈ na Jehová in kulbetnál, in léˈ kin uluw abal yab ku kʼambíxin ani ku káwin kʼal i tsubaxtaláb (Efesios 4:25). ¿Janéy in léˈ kin uluw jechéˈ? Kej yab i ulal i kʼambixtaláb nibal i óltsal xowaˈ yab tsubax ni yaníl, ni at tʼojnal, an kidháblábtsik ban junkuntaláb nibal an awiltalábtsik. An atiklábtsik xin ulal an tsubaxtaláb yab u kwéˈ nibal u kʼambix abal kin átaˈ i tumín (ka ajay Proverbios 24:28 ani Efesios 4:28). Ani jeye, in jalbiyal xowaˈ u kontsinal kʼal an awiltalábtsik (Romanos 13:5-7). Ba jechéˈ ani ba kʼeˈet xanéy xowaˈ ki tʼajaˈ ti xeˈchintal «i léˈ ki tʼajaˈ ejtal alwaˈ xan ti yejat» (Hebreos 13:18).
3. ¿Jantʼom alwaˈtalábtsik i bachʼwal tam i ulal echʼekʼij an tsubaxtaláb?
Tam u exlómte abal echʼekʼij i ulal an tsubaxtaláb, xi kʼeˈettsik tu beltsal xowaˈ i ulal. Aníl jeye, u júnáx alwaˈ kʼal an kidháblábtsik ani u kʼwajat kʼijidh jelti max u kʼwajat kʼal i yaníl. Ani jeye u kʼwajat kʼijidh ti chalápil. Tam i ulal echʼekʼij an tsubaxtaláb, i tʼajál abal «ka exlá kej an okʼtsixtalábtsik kʼal tin kwentaj na Dios ni Loˈóxil, labidh tʼajat», ani jeye i ejtowal ki tolmiy xi kʼeˈettsik abal kin exlaˈ jeye an Okʼoxláb Jehová (Tito 2:10).
ABAL KI EXÓBNAˈ MÁS
Ki chuˈuw jantʼó ti lej exbadh ki uluw echʼekʼij an tsubaxtaláb abal ki kóˈoy jun i alwaˈ jaˈúbtaláb kʼal na Jehová ani janti i ejtowal ku xeˈchin lujat ba ni xeˈchintal.
4. Na Jehová in kulbetnál xitaˈ in ulal an tsubaxtaláb
Ka ajaytsik Salmo 44:21 ani Malaquías 3:16, ani ki tʼilmáchtsik kʼal tin kwentaj jechéˈ:
¿Awxeˈ in tomnál ki chalpay abal i ejtowal ki chinaˈ an tsubaxtaláb? ¿Jantʼó ta chalpayal anchanˈ?
Max ki takuy ki uluw an tsubaxtaláb aunque i achʼál tʼojláb ki tajáˈ, ¿janti neˈech kin achʼaˈ na Jehová?
Tam an chakamtsik in ulal an tsubaxtaláb in kulbédhál nin tátaˈtsik. Tam wawáˈ weye i ulal an tsubaxtaláb i kulbédhál na Jehová.
5. Echʼekʼij ki uluw an tsubaxtaláb
Waˈach yan i atiklábtsik xin chalpayal abal yab echʼekʼij alwaˈ ki uluw an tsubaxtaláb ¿pero jantʼó ti lej alwaˈ ki tʼajaˈ? Ki chuˈuw jantʼom alwaˈtalábtsik waˈach tam i ulal an tsubaxtaláb. Ka chuˈutsik an VIDEO.
Ka ajaytsik Hebreos 13:18 ani ki tʼilmáchtsik janti i ejtowal ki uluw an tsubaxtaláb...
... kʼal ni yaníl.
... ban tʼojláb o ban escuela.
... o ba kʼeˈet xonti.
6. I bachʼwal yan i alwaˈtalábtsik tam i ulal an tsubaxtaláb
Awich max ki uluw xowaˈ tsubax neˈech ki tametnaˈ juntsik i dhukʼeltaláb, por tayíl neˈech ki tʼajaˈ ti kwentaj abal jaˈich xowaˈ más alwaˈ. Ka ajaytsik 1 Pedro 3:10-12 ani ki tʼilmáchtsik kʼal tin kwentaj jechéˈ:
¿Janti in ejtowal tu tolmiy ti xeˈchintal max ki uluw an tsubaxtaláb?
Tam xi tomkidhtsik kin uluw an tsubaxtaláb, neˈechtsik ka kʼánídháxin más.
Tam an tʼojnaltsik in ulal an tsubaxtaláb, u pidhnal más i punkʼuntsixtaláb kʼal nin okʼlékʼiltsik.
Tam an kʼwajíltsik in ulal an tsubaxtaláb, u exláb ti alwaˈ iniktsik kʼal an awiltalábtsik.
XOWAˈ JUNTSIK IN ULAL: «Jun i chakam kʼambixtaláb yab walats».
¿A belál abal na Jehová in pojkál ejtal an kʼambixtalábtsik? ¿Jantʼó ta chalpayal anchanˈ?
XOWAˈ I EXOBNÁMICH
Na Jehová in kulbetnál abal nin jaˈúbtsik kin uluw ani kin tʼajaˈ xowaˈ tsubax.
Ki chalpay xowaˈ i exobnámal
¿Jowkʼi ani jonti koˈol ki ólnaˈ an tsubaxtaláb?
¿Jantʼó ti yab in tomnál ki chalpay abal i ejtowal ki chinaˈ an tsubaxtaláb?
¿Jantʼó ta chalpayal abal alwaˈ ka ólnaˈ an tsubaxtaláb echʼekʼij?
KA EXLAˈ JUN XATAˈ MÁS
¿Janéy in ejtowal kin tʼajaˈ an tátaˈlábtsik abal kin okʼtsi nin chakámiltsik kin uluw echʼekʼij an tsubaxtaláb?
¿Jantʼom alwaˈtalábtsik neˈech ka bachʼuw max a tʼajál xowaˈ a ulal?
Ka tʼajaˈ xowaˈ a ulúmal ani neˈech ka bachʼuw i alwaˈtalábtsik
Ka chuˈuw max koˈol ki pidhnaˈ i jalbixtalábtsik aunque yab u éynáb alwaˈ an tumín.
«¿Yejat ka jalbiy xowaˈ i kontsinal kʼal an awiltalábtsik?» (La Atalaya, 1 de septiembre de 2011)
¿Kʼal janéy ti tolmiyat jun i inik xi u kwéˈ wiˈik abal kin jalkʼuy nin xeˈchintal ani kin tʼajaˈ xowaˈ alwaˈ?