AJUMTALÁB 42
¿Janéy in ulal an Biblia kʼal tin kwentaj xi kʼwajattsik tomkidh ani xi kʼwajat kwetém?
Juntsik i atikláb in ulal abal ka kʼwajay kʼijidh yejat ka tomkin. Por yab ejtal xi kʼwajattsik tomkidh kʼwajat kulbél nibal ejtal xi kʼwajattsik kwetém kʼwajat tʼeˈpidh. An Tʼokat Dhutslab in ulal max jun xitaˈ kʼwajat tomkidh o kʼwajat kwetém jaˈich jun i chʼejwalixtaláb.
1. ¿Jantʼom alwaˈtalábtsik in koˈol xi kʼwajattsik kwetém?
An Tʼokat Dhutslab in ulal: «Xin pidhnál nin tsidhánil abal ka tomkin, alwaˈ xowaˈ in tʼajál. Ani xi yab kin pidhnaˈ, más alwaˈ xowaˈ in tʼajál» (ka ajay 1 Korintios 7:32, 33, 38). ¿Jantʼó tin ulal an Biblia abal an atikláb xi yab ka tomkin «más alwaˈ xowaˈ in tʼajál»? An óltsixtsik xi yab tomkidh yab kʼwajat i chalpapál abal koˈol kin beletnaˈ nin tomtal. Más alwaˈ in koˈoltsik más i kʼij. Abal juntsik i óltsix in achʼál lej kʼijidh ka kʼaletsik ti tolmix ba kʼeˈet i bitsow abal kin ólnaˈ an alwaˈ tʼilab. Ani jun i alwaˈtaláb lej púlek xin koˈol xi kʼwajattsik kwetém jaˈich abal in koˈol yan i kʼij abal kin chapikmédhaˈtsik an jaˈúbtaláb kʼal na Jehová.
2. ¿Jantʼom alwaˈtalábtsik in bachʼwal xitaˈ kʼwajattsik tomkidh anchanˈ xanti in léˈ an awiltaláb?
Anchanˈ jelti xi kʼwajattsik kwetém, xitaˈ kʼwajattsik tomkidh aníl jeye in bachʼwal yan i alwaˈtalábtsik. An Tʼokat Dhutslab in ulal «más alwaˈ cháb tin éb ani yab kwetém» (Eclesiastés 4:9). Anchanáˈ, xi tomkidhtsik u kʼwajíltsik más kulbél tam in tʼajáltsik ti kwentaj tin xeˈchintal xowaˈ in ulal an Tʼokat Dhutslab. An atiklábtsik xu tomkinal anchanˈ xanti in léˈ an awiltaláb in ulaltsik abal tsubax neˈech ka kʼánídháxin, ka beletnáxin, ani ka kʼakʼnáxin. Xu tomkinaltsik anchanˈ xanti in konial an awiltaláb, in achʼáltsik más kulbél kej xi más an atiklábtsik xi aníkʼi u junkunaltsik. Ani jeye, an atiklábtsik xi tomkidh in tolmiyal nin chakámil abal ka pubey kʼijidh kʼal chablom in tátaˈtsik.
3. ¿Janéy in chalpayal na Jehová tin kwentaj an tomkintaláb?
Tam ti na Jehová in tomki an okʼox atiklábtsik, in utsaˈ: «An inik neˈech kin jilaˈ nin tátaˈ ani nin nánaˈ» ani «neˈech ka kʼwajay kʼal nin tomtal» (Génesis 2:24). Na Jehová in léˈ abal an tomkidh inik ani an tomkidh uxum ka kʼánídháxin ani ka kʼwajaytsik junax abal echʼekʼij. Ani in ulal abal cháb i atikláb in ejtowal ka jiláxin max jun kʼal jajáˈtsik in kʼambiyámal nin tomtal. An Okʼoxláb in ulal abal tokot an tomkidh inik o an tomkidh uxum xi yab walbinék in ejtowal kin uluw max neˈech kin ojontsi ti kʼwajíl kʼal nin tomtal o neˈech kin konoy an divorcio (Mateo 19:9).a Na Jehová yab in kulbetnál abal jun i atikláb kin kóˈoy cháb in tomtal (1 Timoteo 3:2).
ABAL KI EXÓBNAˈ MÁS
Ki chuˈuw janéy a ejtowal ka tʼajaˈ tatáˈ max i kʼwajat tomkidh o i kʼwajat kwetém abal ki kʼwajay kulbél ani ka kulbédhaˈ na Jehová.
4. Max i kʼwajat kwetém ka éynaˈ alwaˈ an kʼij
Na Jesús in chuˈtalak max jun xitaˈ kʼwajat kwetém jelti jun i chʼejwalixtaláb (Mateo 19:11, 12). Ka ajaytsik Mateo 4:23 ani ki tʼilmáchtsik kʼal tin kwentaj jechéˈ:
¿Janti in éynaˈ nin ejattal na Jesús abal kin tʼójontsi nin Tátaˈ ani kin tolmiy xi kʼeˈet?
An belomtsik xi kʼwajat kwetém in ejtowal kin achʼaˈ kʼijidh max kin éynaˈ alwaˈ nin ejattal ani kin chʼilbay na Jesús. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy in ejtowal kin tʼajaˈ an belom xi kʼwajat kwetém abal kin éynaˈ alwaˈ nin ejattal?
¿A choˈóbak?
An Biblia yab in ulal jáy i tamub yejat jun xitaˈ kin kóˈoy abal kin ejto ka tomkin. Por jeye in ulal abal yab koˈol ka tomkin lej chipíl, yejat kin aytsi ka watʼey nin tamúbil, kom ba jachanˈ i tamub awil kin achʼaˈ yab in choˈób xanéy kin tʼajaˈtsik (1 Korintios 7:36).
5. Ka takuy alwaˈ kʼal jitaˈ kʼál neˈech ki tomkin
Ka takuy alwaˈ kʼal jitaˈ kʼál neˈech ki tomkin jaˈich jun xanéy lej exbadh ta xeˈchintal. Ka ajaytsik Mateo 19:4-6, 9 ani ki tʼilmáchtsik kʼal tin kwentaj jechéˈ:
¿Jantʼó ti yejat jun i belom kin chalpay alwaˈ okʼox ti ka tomkin?
An Biblia tu tolmiyal ki exlaˈ jantʼom alwaˈtaláb yejat kin tejwaˈmédhaˈ an inik ani an uxum xin léˈ ka tomkin. Por xowaˈ xi más uluts, jaˈich kin kʼanidhaˈ na Jehová.b Ka ajaytsik 1 Korintios 7:39 ani 2 Korintios 6:14. Tayíl ki tʼilmáchtsik kʼal tin kwentaj jechéˈ:
Max jun i kidháb kin léˈnaˈ ka tomkin ¿jantʼó ti exbadh abal kin kóˈoy jayéchkʼi an belomtaláb?
Max ki tomkin kʼal jun xitaˈ xi yab in kʼanidhál na Jehová, ¿janti neˈech kin achʼaˈ jajáˈ?
Max ka kʼwajbá cháb i koˈnél xi yab jayéchkʼi in pákdháˈ nibal in cháp, neˈech kin yájtsíknáˈtsik. Anchanˈ jeye an óltsix xi ka tomkin kʼal xitaˈ yab in kʼanidhál na Jehová neˈech kin watʼnaˈ yan i kʼibataláb.
6. Ka chuˈuw an tomkintaláb jelti xanti in chuˈtal na Jehová
Ban wejeˈ bitsow ti Israel an atiklábtsik in aniˈ jilálak nin tomkíl. Ka ajaytsik Malaquías 2:13, 14, 16 ani ki tʼilmáchtsik kʼal tin kwentaj jechéˈ:
¿Jantʼó tin atʼál na Jehová max jun xitaˈ ka jiláxin ani yab jaˈich kʼal xowaˈ in ulal an Biblia?
Max jun i atikláb kin kʼambiy in tomtal ani kin tʼaj jilaˈ, in tʼajál abal nin yaníl kin achʼaˈ yan i yajtsiktaláb.
Ka chuˈutsik an VIDEO ani ki tʼilmáchtsik kʼal tin kwentaj jechéˈ:
Max tatáˈ i kʼwajat tomkidh kʼal jun xitaˈ xi yab in kʼanidhál na Jehová, ¿janéy a ejtowal ka tʼajaˈ abal na tomkintalábil ka kʼwajay kʼijidh?
7. Ka tʼajaˈ ti kwentaj nin takʼixtal na Jehová kʼal tin kwentaj an tomkintaláb
Abal juntsik i atikláb awich kin achʼaˈ tʼojláb nin takʼixtal na Jehová kʼal tin kwentaj an tomkintaláb.c Por jajáˈ in lábtʼajál xitaˈtsik in tʼajál an chápláb. Ka chuˈutsik an VIDEO.
Ka ajaytsik Hebreos 13:4 ani ki tʼilmáchtsik kʼal tin kwentaj jechéˈ:
¿A belál abal nin takʼixtal na Jehová kʼal tin kwentaj an tomkintaláb jaˈich alwaˈ? ¿Jantʼókʼi ta chalpayal anchanˈ?
Na Jehová in aytsal abal jun i atikláb xu belom tam neˈech ka tomkin kin dhutsaˈ jun i úw ani anílkʼi yejat kin tʼajaˈ tam neˈech ka tʼaj jiláxin, kom anchanˈ tin konial ki tʼajaˈ an takʼixtsik tin pubél an Chabál. Ka ajaytsik Tito 3:1 ani ki tʼilmáchtsik kʼal tin kwentaj jechéˈ:
Max tatáˈ i kʼwajat tomkidh, ¿i kʼwajat tsububudh abal na tomkintalábil kʼwajat dhutsadh alwaˈ ani exlómte kʼal an pakdhaˈ takʼixtsik?
XOWAˈ JUNTSIK IN KONIAL: «¿Jantʼó ti yejat ka tomkin? ¿Tsubax yejat kin kóˈoy jun i úw?»
¿Janéy neˈech ka tokʼoy tatáˈ?
XOWAˈ I EXOBNÁMICH
An kwetémtaláb ani an tomkintaláb jaˈich jun in chʼejwalixtalábil na Jehová. Jaxtám max i kʼwajat kwetém o i tomkidh a ejtowal ka kóˈoy jun i ejattaláb alwaˈ ani kʼijidh max ka tʼajaˈ janti an Okʼoxláb in konial.
Ki chalpay xowaˈ i exobnámal
¿Janti in ejtowal kin éynaˈ jun i atikláb más alwaˈ an kʼij max yab kʼwajat tomkidh?
¿Jantʼó tin ulal an Biblia abal jun i kidháb tokot yejat ka tomkin kʼal jun xitaˈ xin kʼanidhál na Jehová?
Anchanˈ xanti in ulal an Biblia, ¿jowkʼi tin ejtowal jun i tomkinél ka tʼaj jiláxin?
KA EXLAˈ JUN XATAˈ MÁS
¿Janéy in léˈ kin uluw ki tomkin kʼal jun xitaˈ xu belom?
«Konowixtaláb xin tʼajámal an ajumtsik» (La Atalaya, 1 de julio de 2004)
Ka exóbnaˈ janéy a ejtowal ka tʼajaˈ max a chalpayal a léˈ ki tomkin.
Ka exlaˈ jantʼókʼi jun i kidháb kʼwajat tsububudh abal in bachʼumal jun xataˈ kʼal na Jehová xin lej jalbíl ani yab xowaˈ in jilámal kuxlek.
Okʼox ti ka tʼaj jiláxin o max neˈech ka jiláxin kʼal jun i wéˈ i kʼij, ¿janéy yejat kin tʼajaˈ ti kwentaj jun i kidháb?
«Ki kʼakʼnaˈ xowaˈ an Okʼoxláb in júnkúxliyámal» (La Atalaya, diciembre de 2018)
a Ban óltsixtaláb 4 neˈech ka elaˈ más i óltsixtaláb kʼal tin kwentaj tam jun i atikláb in léˈ kin jilaˈ nin tomtal (max yab kʼambidh).
b Ba juntsik i kwentsal, an tátaˈlábtsik in takwtsal kʼal jitaˈ kʼál neˈech ka tomkin nin kwitólil ani nin tsidhánil. Max anchanáˈ, an tátaˈlábtsik in tʼajál ti kwentaj max in kʼanidháltsik na Jehová. Abal jajáˈtsik jechéˈ jaˈich más uluts kej an tumín.
c Max i kʼwajat ta kʼwajíl kʼal jun xitaˈ ani yab i tomkidh, tatáˈ koˈol ka takuy max neˈech ka jilaˈ o neˈech ki tomkin kʼal jajáˈ.