AJUMTALÁB 40
¿Janti ku kʼwajay tʼokat anchanˈ xanti in kulbetnál an Okʼoxláb?
Ka chalpay abal jun i nánaˈláb xin kʼanidhál tʼajat nin chakámil, kʼwajat in tʼójojoyal abal ka kʼale ban escuela. In abál ka atsin ani in kóˈontsalich tʼojojodh nin kʼudhkʼúmil ani in abal ka kʼale tsʼitsbadh alwaˈ ban escuela. Kʼal jechéˈ in tolmiyal abal yab ka yawˈlách ani in tejwaˈmédhantsal xi kʼeˈet abal in kʼanidhál tʼajat nin chakámil. Na Jehová jaˈich ni tátaˈ ani jajáˈ tu kʼanidhál tʼajat, jajáˈ in léˈ ku kʼwajay tʼokat ti chalápil ani ti tʼuˈúl. Ku kʼwajay tʼokat tu tolmiyal tʼajat ani in kʼakʼnantsal nin bij an Okʼoxláb.
1. ¿Janti i ejtowal ku kʼwajay tʼokat ti tʼuˈúl?
Na Jehová tu utsál: «Ki kʼwajaytsik tʼokat» (1 Pedro 1:16). Abal ku kʼwajay tʼokat, koˈol ku kʼwajay tʼokat ti chalápil ani ti tʼuˈúl. U kʼwajat tʼokat tam u atsim echʼekʼij, i koˈol ni kʼudhkʼúmil tʼokat, ani ni kʼimáˈ eléb ani altá kʼwetotól ani max i koˈol i carro aníl jeye koˈol ka kʼwajay tʼokat. Aníl jeye u tolmix tu kʼwét abal an atáj junkuntaláb ka kʼwajay tʼokat. Max i chápnantsal ku kʼwajay tʼokat, xi más an atiklábtsik neˈech jeye kin kʼakʼnaˈ na Jehová (2 Korintios 6:3, 4).
2. ¿Janéy koˈol ki tʼajaˈ abal ku kʼwajay tʼokat?
An Tʼokat Dhutslab tu takʼyal: «Ki jilaˈich xowaˈ yab alwaˈ xi tʼajál kʼal ni tʼuˈúl o kʼal ni ejattal» (2 Korintios 7:1). Jaxtám i chápnantsal abal yab ki tʼajaˈ xowaˈ yab alwaˈ xin ejtowal tu waltsi ni chalápil ani ni tʼuˈúl. Ani kom i léˈ abal na Jehová kin kulbetnaˈ xowaˈ i chalpayal, i tʼajál an chápláb abal yab ki chalpay xowaˈ yab kʼayˈlats (Salmo 104:34). Aníl jeye i chápnantsal abal ku tʼilmách, xanti in tomnál (ka ajay Kolosenses 3:8).
¿Janéy más in ejtowal tu waltsi ni tʼuˈúl ani tu kʼutʼlintsi ti chalápil? Waˈach juntsik xanéy xin waltsal ni tʼuˈúl. Jaxtám yab i juchʼwal i máy, yab i éynál i drogas nibal i watʼpintsal kʼal an iláltsik ani yab i éynál i iláltsik xi yab u bijtsinék. Tam i tʼajál ti kwentaj ejtal jechéˈ, anchanáˈ i beletnál ti báˈ ani i kʼakʼnál an ejattaláb xi tu pidhámal na Jehová. Kʼeˈet xanéy xi tʼajál abal ku kʼwajay tʼokat, jaˈich yab i chuˈtal i pornografía ani i yab i ubatʼnál ni tʼuˈúl (Salmo 119:37; Efesios 5:5). Awil ki achʼaˈ tʼojláb ki jilaˈ xowaˈ na Jehová in pojkál, por jajáˈ neˈech tu tolmiy (ka ajay Isaías 41:13).
ABAL KI EXÓBNAˈ MÁS
Ki chuˈuw janti jun i atikláb xi tʼokat, in kʼakʼnál tʼajat na Jehová ani ki exóbnaˈ janéy i ejtowal ki tʼajaˈ abal ki jilaˈ xowaˈ yab alwaˈ.
3. Ku kʼwajay tʼokat ti tʼuˈúl in kʼakʼnál na Jehová
Tam i ajyal an abatnaxtalábtsik xi na Jehová in pidhaˈ an bitsow ti Israel, i exbayal abal an tʼokataláb jaˈich lej exbadh abal jajáˈ. Ka ajaytsik Éxodo 19:10 ani 30:17-19, ani ki tʼilmáchtsik kʼal tin kwentaj jechéˈ:
¿Janéy tu okʼtsal jechéˈ i versículos kʼal tin kwentaj, janti in chuˈtal na Jehová an tʼokataláb?
¿Janéy neˈech tu tolmiy ku kʼwajay echʼekʼij tʼokat ti tʼuˈúl?
Abal ku kʼwajay tʼokat, i yejentsal i chápláb ani ki jolkʼaˈ i kʼij. Por i ejtowal ku kʼwajay tʼokat, ani yab in kwentaj max i koˈol yan i tumín o u chʼojontál. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿I ejtowal ki tolmiy an atiklábtsik kin kʼakʼnaˈ na Jehová, max xowaˈ i neˈdhál kʼwajat tʼokat? ¿Jantʼókʼi?
4. Ka jilaˈ xowaˈ yab alwaˈ
Na Jehová neˈech tu tolmiy ki jilaˈ xowaˈkich xanéy xi atʼax ujnám ki tʼajaˈ.
Max tatáˈ a juchʼwal i máy, a watʼpiyal an iláltsik ani a éynál i drogas, a choˈób xónaˈ alwaˈ abal tʼojláb ka jilaˈ xowaˈ a tʼajál. Jun xataˈ xi neˈech ti tolmiy jaˈich ka chalpay xanti exom ti waltsal ta ejattal. Ka ajaytsik Mateo 22:37-39, ani ki tʼilmáchtsik abal janti an máy ani kʼeˈet i drogas in waltsal...
... an jaˈúbtaláb xin koˈol jun i atikláb kʼal na Jehová.
... nin kidhtaltsik an atikláb xu juchʼul ani xi kʼeˈettsik.
Ka chalpay xowaˈ a ejtowal ka tʼajaˈ abal ka jilaˈ xowaˈ na Jehová in pojkál.a Ka chuˈutsik an VIDEO.
Ka ajaytsik 2 Korintios 4:7 ani ki tʼilmáchtsik kʼal tin kwentaj jechéˈ:
Max jun i atikláb echʼekʼij in ajyal an Biblia, u kʼalel ban junkuntalábtsik ani in tʼajál i olábtsik ¿a chalpayal abal neˈech ka pidhan ti chápláb abal kin jilaˈ xowaˈ na Jehová in pojkál? ¿Jantʼó ta chalpayal anchanˈ?
5. Ka chápnantsi ka jilaˈ ka tʼajaˈ xowaˈ atʼax ani yabich ka chalpay
Ka ajaytsik Kolosenses 3:5 ani ki tʼilmáchtsik kʼal tin kwentaj jechéˈ:
¿Janti i choˈób abal na Jehová in atʼál an pornografía, ki ubatʼnaˈ ni tʼuˈúl ani ki abnaˈ i mensajes kʼal xowaˈ yab exbadh?
¿A chalpayal abal i ejtowal ku kʼwajay tʼokat ti chalápil anchanˈ xanti na Jehová in léˈ? ¿Jantʼókʼi ta chalpayal anchanˈ?
Ka chuˈuw xowaˈ a ejtowal ka tʼajaˈ, abal ka jilaˈ ka chalpay xowaˈ yab alwaˈ. Ka chuˈutsik an VIDEO.
Na Jesús in éynaˈ jun i jumbaxtaláb, abal tu óltsi janéy koˈol ki tʼajaˈ abal ku kʼwajay tʼokat. Ka ajaytsik Mateo 5:29, 30 ani ki tʼilmáchtsik kʼal tin kwentaj jechéˈ:
Na Jesús yab in léˈnaˈ kin uluw abal koˈol ki tʼajtsi jun xataˈ ni tʼuˈúl, xowaˈ jajáˈ in léˈnaˈ kin uluw, jaˈich abal koˈol ki tʼajaˈ jun xataˈ abal yab ku walbin. ¿Janéy koˈol ki tʼajaˈ jikʼatkʼi abal yab ki chalpay xowaˈ yab alwaˈ?b
Max exomich a tʼajál an chápláb abal ka wixkʼaˈ an chalaptsik xi yab exbadh, na Jehová in kʼakʼnál tʼajat. Ka ajaytsik Salmo 103:13, 14 ani ki tʼilmáchtsik kʼal tin kwentaj jechéˈ:
Max exom a tʼajál an chápláb abal ka jilaˈ jun xataˈ xi na Jehová in pojkál, ¿a chalpayal abal jechéˈ i versículos neˈech ti kʼijidhmédhaˈ ani neˈech ti pidhaˈ ti chápláb? ¿Jantʼókʼi ta chalpayal anchanˈ?
Max ki ukʼpin, ¡yab ka jilaˈ ta báˈ!
Max ki ukʼpin ani ki witsiy juní ka tʼajaˈ xowaˈ a tʼajál wiˈik, awich ka chalpay «Yabich neˈech ku ejto ku jalkʼuy tu báˈ». Ka chalpay kʼal jechéˈ. Max jun i atikláb xu adhil ka tʼadhkʼun ani ka kwajlan, yab in léˈ kin uluw abal yabich in átaˈ ani abal koˈol kin tuju ti ít. Aníl jeye kʼal tatáˈ, max ki ukʼpin ani ki witsiy juní ka tʼajaˈ xowaˈ a tʼajál wiˈik, yab in léˈ kin uluw abal yab jaykʼi neˈech ka ejto ka jilaˈ an atʼax ujnamtaláb. Ejtal an chápnantsixtaláb xi a tʼajámal in koˈol tʼajat in jalbíl. Yab ki chalpaxin max ki ukʼpin, kʼayúm ti kʼayúm tatáˈ a ejtowal ka jilaˈ xowaˈ atʼax a ujnámich ka tʼajaˈ. Jaxtám ¡yab ka walbaˈ ta báˈ! Na Jehová neˈech ti tolmiy ka jilaˈ xowaˈkich i atʼax ujnamtaláb.
XOWAˈ JUNTSIK IN ULAL: «U ujnámich tʼajat ku tʼajaˈ, yabich neˈech ku ejto ku jilaˈ».
¿Jantʼom texto neˈech ka éynaˈ abal ka óltsi jachanˈ an atikláb, abal in ejtowal kin jalkʼuy tin báˈ kʼal nin tolmixtal na Jehová?
XOWAˈ I EXOBNÁMICH
I kulbédhál na Jehová max u kʼwajat tʼokat ti tʼuˈúl ti chalápil ani kʼal xowaˈ i tʼajál ti xeˈchintal.
Ki chalpay xowaˈ i exobnámal
¿Jantʼó ti lej exbadh ku kʼwajay tʼokat?
¿Janéy yejat ki tʼajaˈ abal ku kʼwajay tʼokat ti tʼuˈúl?
¿Janéy yejat ki tʼajaˈ abal xowaˈ i tʼajál ti xeˈchintal ani xi chalpay ka kʼwajay echʼekʼij tʼokat?
KA EXLAˈ JUN XATAˈ MÁS
Aunque yab i koˈol yan i tumín, ¿janéy i ejtowal ki tʼajaˈ abal ku kʼwajay tʼokat?
Ka ajay juntsik i tolmixtaláb xi neˈech ti tolmiy abal ka jilaˈ ta juchʼul.
«Xowaˈ a ejtowal ka tʼajaˈ abal ka jilaˈ ta juchʼul» (¡Despertad!, mayo de 2010)
Ka chuˈuw xanti in ejtowal ti waltsi an pornografía.
«An pornografía: ¿jaˈich jun xataˈ alwaˈ o yab alwaˈ?» (La Atalaya, 1 de agosto de 2013)
Ka chuˈuw xowaˈ in tʼajaˈ jun i inik abal kin jilaˈ kin chuˈuw an pornografía.
«Yáníl in ukʼpin por u ejto ku jilaˈ» (La Atalaya, núm. 4 2016)
a Ban pejats «Ka exlaˈ jun xataˈ más» xi kʼwajat ba jechéˈ i ajumtaláb, neˈech ka elaˈ an dhutslab xin bij «Xowaˈ a ejtowal ka tʼajaˈ abal ka jilaˈ ta juchʼul», tajaˈ neˈech ka elaˈ i takʼixtaláb xi neˈech ti tolmiy.
b Abal ka choˈóbnaˈ janéy in ejtowal kin tʼajaˈ jun i atikláb abal kin jilaˈ an masturbación, ka chuˈuw an capítulo 25 ban libro Lo que los jóvenes preguntan. Respuestas prácticas (volumen 1), titulado «¿Janéy in ejtowal kin tʼajaˈ jun i atikláb abal kin jilaˈ an Masturbación?».