AJUMTALÁB 43
¿Janéy in chalpayal an óltsixtsik kʼal a Jehová tin kwentaj an uxnél?
Tin pubél an Chabál, an atiklábtsik kʼeˈetich kʼeˈetich xanti tu chalpax kʼal tin kwentaj an uxnél. Juntsik u uchʼal ówdhaˈ i kʼij kʼal nin jaˈúbtsik. Kʼeˈettsik in chalpayal yab kin uchʼaˈ xataˈ xin koˈol i yajtsik uxnél. Ani waˈach juntsik i atiklábtsik xu uchʼál hasta ka itey. ¿Janéy in ulal an Biblia kʼal an yajtsik uxnél?
1. ¿Awxeˈ alwaˈ ki uchʼaˈ i yajtsik uxnél?
An Biblia yab in ulal abal an yajtsik uxnél yab alwaˈ. Mas alwaˈ, nin Káwintal an Okʼoxláb in ulal abal an «uxnél in kʼijidhmédhantsal tin itsích an inik». Jaˈich jun i chʼejwalixtaláb xi na Jehová tu pidhámal (Salmo 104:14, 15). Por ban Biblia in tʼilál abal juntsik i iniktsik ani uxumtsik xi lujattsik in uchʼaˈ i yajtsik uxnél (1 Timoteo 5:23).
2. ¿Janéy in ulal an Biblia xitaˈtsik in chalpayal kin uchʼaˈ i yajtsik uxnél?
Na Jehová yab tokot in atʼál an uchʼáltaláb ani jeye jitaˈtsik in watʼpintsal kin uchʼaˈ an yajtsik uxnél (Gálatas 5:21). An Biblia in ulal: «yab ki kʼwajaytsik junax kʼal jitaˈtsik in watʼkʼantsal kin uchʼaˈ an yajtsik uxnél» (Proverbios 23:20). Jaxtám max ka chalpay ka uchʼaˈ i yajtsik uxnél kwetém o junkidh, yab jaykʼiˈ ka watʼpintsi ka uchʼaˈ kom awich ka kipdhaˈ an chalap kʼal xowaˈ a ulal ani xowaˈ a tʼajál. Por ani jeye yab ki uxtsi tayidh kom awich tu ku yaˈundhaˈ. Max a choˈób yab neˈech ka kuxuy xáy neˈech ka uchʼaˈ an yajtsik uxnél, más alwaˈ nibal ka tuju ka uchʼaˈ.
3. ¿Janti i tejwaˈmedhál i kʼakʼnaxtaláb kal xowaˈ in chalpayal xi kʼeˈettsik?
Jun ti kwetémtal koˈol kin takuy max neˈech kin uchʼaˈ an yajtsik uxnél o yabaˈ. Yab ki lujundhaˈ jitaˈtsik in léˈ kin uchʼaˈ wéˈ i yajtsik uxnél. Por aníl jeye yab ka tʼajtsi i chápláb max jun xitaˈ in chalpáyamal yab xataˈ kin uchʼaˈ (Romanos 14:10). Ani más alwaˈ yab ki uchʼaˈ ni wéˈ max xi kʼeˈettsik in chuˈtal yab alwaˈ (ka ajay Romanos 14:21). Anchanáˈ jun i belom yab tokot in aliyal nin alwaˈbíl, más alwaˈ in aliyal «nin alwaˈbíl xi kʼeˈettsik» (ka ajay 1 Korintios 10:23, 24).
ABAL KI EXÓBNAˈ MÁS
Ki chuˈuw juntsik i takʼixtaláb ban Biblia xi neˈech ti ku tolmiy ki chalpay max neˈech ki uchʼaˈ i uxnél o yabaˈ ani jáy in yánil. Neˈech jeye ki chuˈuw max exom a tʼajál an chápláb abal ka jilaˈ an uxnél.
4. Ka chalpay max neˈech ta uchʼal o yabaˈ
¿Janéy in chalpáyalak na Jesús kʼal tin kwentaj an yajtsik uxnél? Abal ki exlaˈ an tokʼtsixtaláb, ki chuˈuw okʼox an labidh labandhaxtaláb xin tʼajaˈ na Jesús. Ka ajaytsik Juan 2:1-11 ani ki tʼilmáchtsik kʼal tin kwentaj jechéˈ:
¿Janéy tu okʼtsal na Jesús kʼal tin kwentaj an yajtsik uxnél ani kʼal xitaˈtsik in uchʼál?
Kom na Jesús yab kʼwajat in taxkʼál an yajtsik uxnél, ¿janéy yejat kin chalpay jun i belom max jun xitaˈ kin uchʼaˈ jun i wéˈ an yajtsik uxnél?
Aunque jun i belom in ejtowal kin uchʼaˈ an yajtsik uxnél, yab in léˈ kin uluw abal in ejtowal kin tʼajaˈ echʼekʼij. Ka ajaytsik Proverbios 22:3 ani ka chalpaytsik max alwaˈ ki uchʼách:
Max neˈech ka béldhaˈ jun i carro o jun i máquina.
Max tatáˈ jaˈich jun i mímláb xi kʼwajat kóˈodh.
Max i usnék kʼal an ilálix abal yab ka uchʼaˈ i yajtsik uxnél.
A achʼál tʼojláb ka choˈóbnaˈ jáy neˈech ka ejto ka uchʼaˈ.
An takʼixtsik in ulal abal yabtsik ka uchʼaˈ i yajtsik uxnél.
I kʼwajat kʼal jun xitaˈ xin chalpayal abal yab neˈech kin uchʼaˈ an yajtsik uxnél kom max ti wejeˈ u lej uchʼálak.
¿In tomnál ka pidhnaˈ i yajtsik uxnél ba jun i tomkintaláb o ba kʼeˈet i ajib? Abal ka choˈóbnaˈ janéy neˈech ka tʼajaˈ, ka chuˈutsik an VIDEO.
Ka ajaytsik Romanos 13:13 ani 1 Korintios 10:31, 32. Tayíl tam ajyamichtsik an pejats, ki tʼilmáchtsik kʼal tin kwentaj jechéˈ:
¿Janti in ejtowal ti ki tolmiy jechéˈ i takʼixtaláb abal ka takuy xowaˈ alwaˈ ani ka kʼijidhmédhaˈ na Jehová?
Jun i óltsix kʼal a Jehová koˈol kin takuy tin kwetémtal max neˈech kin uchʼaˈ wéˈ i uxnél o yabaˈ. Por koˈol jeye kin tʼajaˈ ti kwentaj joykʼiˈ tin ejtowal kin tʼajaˈ ani joykʼiˈ yabaˈ.
5. Ka chalpay jáy neˈech ka uchʼaˈ
Max ka uchʼaˈ an yajtsik uxnél kom na Jehová yab tu taxkʼantsal, ka lej tʼajaˈ ti kwentaj abal yab in léˈ ki watʼkʼantsi ki uchʼaˈ an yajtsik uxnél. ¿Jantʼókʼi? Ka ajaytsik Oseas 4:11, 18 ani ki tʼilmáchtsik kʼal tin kwentaj jechéˈ:
¿Janéy u watʼel tam jun i atikláb in watʼkʼantsal tʼajat ti uchʼál?
¿Janéy in ejtowal tu ku tolmiy abal yab ki watʼkʼantsi? Koˈol ki choˈóbnaˈ hasta jon talat i ejtowal ki kuxuy. Ka ajaytsik Proverbios 11:2 ani ki tʼilmáchtsik kʼal tin kwentaj jechéˈ:
¿Jantʼó ti alwaˈ ka chalpay jáy in yáníl a ejtowal ka uchʼaˈ an yajtsik uxnél?
6. Yab ka jilaˈ abal an uchʼáchnich ti átaˈ
Ka exlaˈ janéy in tʼajaˈ jun i inik abal kin jilaˈ an yajtsik uxnél. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janti in walaˈ an yajtsik uxnél kʼal nin xeˈchintal na Dimitri?
¿In ejto kin jilaˈ an yajtsik uxnél junweˈkʼij?
¿Janti in ejto kin jilaˈ an yajtsik uxnél abal echʼekʼij?
Ka ajaytsik 1 Korintios 6:10, 11 ani ki tʼilmáchtsik kʼal tin kwentaj jechéˈ:
¿Jaˈich walats ki itey? ¿Jantʼókʼi?
¿Janti ta choˈób abal jun i atikláb in ejtowal ki jilaˈ an yajtsik uxnél?
Ka ajaytsik Mateo 5:30 ani ki tʼilmáchtsik kʼal tin kwentaj jechéˈ:
Kʼal jechéˈ i jumbaxtaláb ki muchʼiy ni kubak, na Jesús kʼwajat in okʼtsixnál abal yejat ki tʼajaˈ i chápláb abal ki kóˈoy nin bachʼkʼuxtal an Okʼoxláb. Max tatáˈ exom a tʼajál an chápláb abal ka jilaˈ an yajtsik uxnél, ¿janéy a ejtowal ka tʼajaˈ?a
Ka ajaytsik 1 Korintios 15:33 ani ki tʼilmáchtsik kʼal tin kwentaj jechéˈ:
¿Janéy a ejtowal ka tamu max ki junkun kʼal i atiklábtsik xin watʼkʼantsal kin uchʼaˈ an yajtsik uxnél?
XOWAˈ JUNTSIK IN KONIAL: «¿Walats abal ki uchʼách?».
¿Janéy a chalpayal tatáˈ?
XOWAˈ I EXOBNÁMICH
Na Jehová tu pidhámal an uxnél abal ku kʼijidhmé, por jajáˈ in atʼál an uchʼaltaláb ani jitaˈtsik in watʼkʼantsal kʼal an yajtsik uxnél.
Ki chalpay xowaˈ i exobnámal
¿Janéy in ulal an Biblia kʼal an yajtsik uxnél?
¿Janéy a ejtowal ka tamu max ka watʼkʼantsi an ta uchʼal?
¿Janti i ejtowal ki tejwaˈmédhaˈ abal i kʼakʼnál xowaˈ in chalpayaltsik xi kʼeˈet kʼal tin kwentaj an yajtsik uxnél?
KA EXLAˈ JUN XATAˈ MÁS
¿Janéy yejat kin chalpay an kwitóltsik max neˈech kin uchʼaˈ i yajtsik uxnél?
Ka chalpay janéy neˈech ka watʼey max ka uchʼaˈ i uxnél (2:31)
Ka exlaˈ janéy yejat ka tʼajaˈ abal ka jilaˈ an yajtsik uxnél.
«Xowaˈ a ejtowal ka tʼajaˈ abal ka jilaˈ an uxnél» (La Atalaya, 1 de enero de 2010)
¿Jaˈich alwaˈ abal an óltsixtsik kʼal a Jehová kin tʼajaˈ i brindis?
«Konowixtaláb xin tʼajámal an ajumtsik» (La Atalaya, 15 de febrero de 2007)
Ka ajay janti jun i inik in ejto kin jilaˈ an uxnél, ban biografía «u watʼkʼantsalak tin uchʼál».
«In jalkʼuytsik nin xeˈchintal kʼal xowaˈ in exóbnaˈtsik ban Biblia» (La Atalaya, 1 de mayo de 2012)
a An atiklábtsik xi yab in ejtowal kin jilaˈ an yajtsik uxnél awich in yejentsal kin aliy i tolmixtaláb. An ilálixtsik in ulal abal jitaˈtsik in achʼámal tʼojláb kin jilaˈ an yajtsik uxnél yab yejat nibal kin lekaˈ ni wéˈ tayíl.