AJUMTALÁB 48
Ka takuy alwaˈ na jaˈúbtsik
An alwaˈ jaˈúbtsik tu tolmiyal ku kʼwajay más kulbél. Ani jeye tu tolmiyal tam i koˈol i kʼibataláb. Por an Biblia in ulal abal yab ejtal an atiklábtsik i ejtowal ki jaˈúbnaˈ. Tám, ¿janéy a ejtowal ka tʼajaˈ abal ka takuy alwaˈ a jaˈúbtsik? Ka exóbnaˈ juntsik i konowixtaláb xi neˈech ti tolmiy.
1. ¿Janti in ejtowal ti tolmiy na jaˈúbtsik?
Max ki watʼnaˈ yan i kʼij kʼal juntsik i atiklábtsik, más tayíl wawáˈ neˈech weye ki chʼilbay xowaˈ in chalpayaltsik ani xowaˈ in tʼajál. Jaxtám an Tʼokat Dhutslab in ulal : «Xitaˈ xeˈech kʼal an atiklábtsik xi chalpadh neˈech ka chalpadhmé, pero xitaˈ u junkunal kʼal xitaˈ yab chalpadh [an atiklábtsik xi yab in kʼanidhál na Jehová] neˈech kin kóˈoy yan i kʼibataláb» (Proverbios 13:20). An atiklábtsik xin kʼanidhál ani in kʼakʼnál na Jehová in ejtowal ti tolmiy abal tatáˈ ki utey más kʼal jajáˈ ani ka tʼajaˈ xowaˈ xi alwaˈ. Por max tatáˈ i junkunal tʼajat kʼal an atiklábtsik xi yab in kʼanidhál na Jehová, neˈech ki ówmé kʼal jajáˈ. Jaxtám an Biblia tu takʼyal abal ki chalpay alwaˈ jitaˈ neˈech ki jaˈúbnaˈ. Tam an atiklábtsik xi i jaˈúbnál in kʼanidhál na Jehová, ejtal i ejtowal ku kʼwajay kʼijidh. Tam i tʼajál anchanáˈ, yab i achʼál tʼojláb ki tʼajaˈ ti kwentaj jechéˈ i takʼixtaláb: «Ka ojontsi ki pákábédháxintsik ani ki púbédhántsíxintsik ta itsích jún ani jún» (1 Tesalonicenses 5:11).
2. ¿In tʼajál ti kwentaj na Jehová jantʼom atiklábtsik a tʼajál ta jaˈúb?
Na Jehová in takwyal alwaˈ an atiklábtsik xi neˈech kin tʼajaˈ tin jaˈúb. An Biblia in ulal abal jajá, «in koˈol jun i alwaˈ jaˈúbtaláb kʼal an atiklábtsik xin tʼajál xowaˈ alwaˈ» (Proverbios 3:32). ¿Janti neˈech kin achʼaˈ na Jehová max ki jaˈúbnaˈ i atiklábtsik xi yab in kʼanidhál? ¡Neˈech ka tʼeˈpin juntʼakʼi! (Ka ajay Santiago 4:4). Por max ku junkun kʼal i atiklábtsik xin kʼanidhál na Jehová ani in tʼajál xowaˈ jajáˈ in kulbetnál, jajáˈ neˈech ka kulbé juntʼakʼi ani neˈech tu chuˈuw jelti jun i jaˈúb (Salmo 15:1-4).
ABAL KI EXÓBNAˈ MÁS
Ki chuˈuw jantʼó ti lej exbadh ki chalpay alwaˈ jitaˈ neˈech ki jaˈúbnaˈ ani janéy i ejtowal ki tʼajaˈ abal ki kóˈoy i jaˈúbtsik xi tsubax neˈech tu tolmiy.
3. Yab ki junkun kʼal xitaˈ in tʼajáltsik xowaˈ yab alwaˈ
An atiklábtsik xin tʼajál xowaˈ yab alwaˈ yab in tomnál ki jaˈúbnaˈ, kom yabtsik in kʼanidhál an Okʼoxláb nibal in tʼajál nin takʼixtal. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
Max yab ki tʼajaˈ ti kwentaj, ¿janti i ejtowal ki tuju ki jaˈúbnaˈ jun i atikláb xi yab in tomnál?
Ka ajaytsik 1 Korintios 15:33 ani ki tʼilmáchtsik kʼal tin kwentaj jechéˈ:
Ka chalpay, ¿kʼal jitaˈtsik yab in tomnál ki junkun? ¿Jantʼókʼi?
Ka ajaytsik Salmo 119:63 ani ki tʼilmáchtsik kʼal tin kwentaj jechéˈ:
¿Janéy koˈol kin tʼajaˈ jun xitaˈ abal ka jaˈúbnaˈ?
Jun i manzana xi kʼachenek in ejtowal kin kʼachedhaˈ xi más. Ani tatáˈ, ¿janti in ejtowal ti waltsi ki junkun kʼal i atiklábtsik xi yab in tʼajál xowaˈ alwaˈ?
4. I ejtowal ki jaˈúbnaˈ i atiklábtsik xi yab jayéchkʼi jelti wawáˈ
An Biblia u tʼilom kʼal tin kwentaj na David ani na Jonatán, jajáˈtsik kʼwajay ti wejeˈ ba jun i bitsow xin bij Israel. Yab jayéchkʼitsik in tamúbil ani in koˈolaktsik júnich in tʼojlábil, por cháblomtsik junaxin lej alwaˈ. Ka ajaytsik 1 Samuel 18:1 ani ki tʼilmáchtsik kʼal tin kwentaj jechéˈ:
¿Jantʼó ti yab in tomnál ki jaˈúbnaˈ tokot i atiklábtsik xin koˈol i tumín o jayéchkʼi in tamúbil jelti wawáˈ?
Ka ajaytsik Romanos 1:11, 12 ani ki tʼilmáchtsik kʼal tin kwentaj jechéˈ:
¿Janti tu tolmiyal ni jaˈúbtsik xin kʼanidhál na Jehová?
¿Janti in elaˈ in jaˈúbtsik jun i kwitól? Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼó ti yab in kulbetnálak nin tatáˈtsik na Akil nin jaˈúbtsik xin koˈolak ban escuela?
¿Jantʼókʼi tin kulbetnálak na Akil nin juniktsik xin koˈolak ban escuela?
¿Janéy in tʼajaˈ abal yab kin achʼaˈ kwetém?
5. Janti i ejtowal ki tʼajaˈ i alwaˈ jaˈúbtsik
Ka chuˈuw janéy a ejtowal ka tʼajaˈ abal xi más kin léˈnaˈ ti jaˈúbnaˈ ani janéy ka tʼajaˈ abal ka elaˈ i jaˈúbtsik xi tsubax neˈech ti tolmiy. Ka chuˈutsik an VIDEO.
Ka ajaytsik Proverbios 18:24 ani 27:17, ani ki tʼilmáchtsik kʼal tin kwentaj jechéˈ:
¿Janti tu tolmiyal jun i alwaˈ jaˈúb?
¿A koˈol a jaˈúbtsik xi alwaˈ jelti xin ulal Proverbios? Max yabaˈ, ¿janéy a ejtowal ka tʼajaˈ abal ka kóˈoy i alwaˈ jaˈúbtsik?
Ka ajaytsik Filipenses 2:4 ani ki tʼilmáchtsik kʼal tin kwentaj jechéˈ:
Abal ka kóˈoy a alwaˈ jaˈúbtsik xi ti tolmiy, tatáˈ koˈol jeye ka tolmiytsik. ¿Janti a ejtowal ka tʼajaˈ?
Abal ka kóˈoy a jaˈúbtsik xi ti tolmiy, tatáˈ teye koˈol ka tolmiytsik.
XOWAˈ JUNTSIK IN ULAL: «Xitaˈkʼi u jaˈúbnal kom yab u léˈ kin kʼwajay kwetém».
¿Janéy a chalpayal tatáˈ?
XOWAˈ I EXOBNÁMICH
Tam i takwyal i jaˈúbtsik xi alwaˈ, i bachʼwal yan i alwaˈtalábtsik ani i kulbédhál na Jehová.
Ki chalpay xowaˈ i exobnámal
¿Jantʼó ti na Jehová in tʼajál ti kwentaj jantʼom jaˈúbtsik i takwyal?
¿Jantʼom atiklábtsik yab in tomnál ki jaˈúbnaˈ?
¿Janéy a ejtowal ka tʼajaˈ abal ka kóˈoy i alwaˈ jaˈúbtsik?
KA EXLAˈ JUN XATAˈ MÁS
Ka chuˈuw janti in ejtowal tu tolmiy ni jaˈúbtsik tam i watʼnál i kʼibataláb.
«Ki tʼajaˈ i alwaˈ jaˈúbtsik okʼox ti ka tsích an pakwenib» (La Atalaya, noviembre de 2019)
Ka chuˈuw juntsik xanéy xi a ejtowal ka tʼajaˈ abal ka kóˈoy a alwaˈ jaˈúbtsik.
¿Janéy koˈol ka kóˈoy ti kwentaj tam a tʼajál a jaˈúbtsik ti internet?
Ka ajay jantʼókʼi jun i inik in jalkʼuy nin jaˈúbtsik, ban biografia «u léˈak ku kóˈoy jun u tátaˈ».