Janti a ejtowal ka kóˈoy jun a yaníl kulbél (pejats 1)

Xitaˈ u tomkinaltsik in léˈ abal ka kʼwajay kʼijidh abal echʼekʼij ani in ejtowaltsik kin tʼajaˈ. Yan i óltsixtsik kʼal a Jehová in tʼajámal ti kwentaj xowaˈ in ulal an Biblia ani in neˈdhálichtsik yan i kʼij tomkidh.

1. ¿Jantʼom takʼixtalábtsik in pidhál an Biblia an tomkidh inik?

Na Jehová in pidhámal an punkʼuntsixtaláb an tomkidh inik abal kin beletnaˈ nin yaníl (ka ajay Efesios 5:23). Ani in léˈ abal an tomkidh inik kin tolmiy nin yaníl abal ka kʼwajay alwaˈ. An Biblia in pidhál jechéˈ i takʼixtaláb an tomkidh iniktsik: «Ka kʼanidhaˈ na tomtal» (Efesios 5:25). ¿Janti in tʼajál? In xalkʼantsal ti kʼanidhomtaláb tam kʼwajat kwetém ani tam kʼwajat kʼal kʼeˈet i atiklábtsik. Ani jeye in pidhál xowaˈ in yejentsal (1 Timoteo 5:8). Ani xowaˈ más exbadh, in tolmiyal nin tomtal abal ka utey más kʼal na Jehová (Mateo 4:4). U ól junax kʼal jajáˈ ani in ajyal an Biblia. Max an tomkidh inik in beletnál kʼal i kʼanidhomtaláb nin tomtal, u kʼwajíl más utat kʼal na Jehová ani in kóˈyal jun i alwaˈ jaˈúbtaláb kʼal jajáˈ (ka ajay 1 Pedro 3:7).

2. ¿Jantʼom takʼixtaláb in pidhám an Biblia an tomkidh mímláb?

An Tʼokat Dhutslab in ulal abal an tomkidh mímláb «yab yejat kin chʼikat tʼajaˈ nin tomkíl» (Efesios 5:33). ¿Janti in ejtowal kin tʼajaˈ? In ejtowal kin chalpay xowaˈ alwaˈ in tʼajál nin tomkíl ani an chápnantsixtaláb xin tʼajál abal kin beletnaˈ jajáˈ ani nin yaníl. Aunque an tomkidh inik yab jaˈich jun i óltsix kʼal a Jehová in ejtowal kin tejwaˈmédhantsi ti kʼakʼnaxtaláb tam in tawnál kʼal i kʼanidhomtaláb, tam yab in atʼax tʼilál ani tam in tolmiyal kʼal xowaˈ in chalpayal kin tʼajaˈ.

3. ¿Janéy in ejtowal kin tʼajaˈ jun i tomkinél abal ka kʼánídháxintsik más?

An Tʼokat Dhutslab in ulal abal tam cháb i atiklábtsik u tomkinal: «jún tokot ti neˈech ka ájin» (Mateo 19:5). Jechéˈ in léˈ kin uluw abal echʼekʼij in tʼajáltsik an chápláb abal ka kʼwajaytsik junax. Jaxtám in ujnámtsik kin watʼnaˈ i kʼij junax ani ka tʼilmáchtsik kʼal i kʼanidhomtaláb abal kin uluw xowaˈ in chalpayaltsik ani xowaˈ in achʼál. Xowaˈ más exbadh abal jun i tomkinél, jaˈich na Jehová ani nin tomkíl. Jaxtám in koˈyaltsik ti kwentaj abal ni jun kʼal jajáˈtsik ka xeˈchin kʼal kʼeˈet xitaˈ xi yab in tomtal.

ABAL KI EXÓBNAˈ MÁS

4. Tomkidh inik, ka kʼanidhaˈ ani ka beletnaˈ na tomtal

VIDEO: Tomkidh inik, ka kʼanidhaˈ na tomtal jelti xanti ta kʼanidhál ta báˈ (9:53)

• ¿Janti in ejtowal kin xalkʼaˈ an tomkidh inik abal in tʼajál ti kwentaj ani in kʼanidhál nin tomtal?

Ka ajaytsik Kolosenses 3:12 ani ki tʼilmáchtsik kʼal tin kwentaj jechéˈ:

• ¿Janti in ejtowal kin xalkʼaˈ jechéˈ i alwaˈtalábtsik an tomkidh inik kʼal nin tomtal?

5. Tomkidh mímláb, ka kʼanidhaˈ ani ka kʼakʼnaˈ na tomtal

An Biblia in takʼyal an tomkidh mímláb abal kin kʼakʼnaˈ nin tomtal aunque yab u óltsix kʼal a Jehová. Ka ajaytsik 1 Pedro 3:1, 2 ani ki tʼilmáchtsik kʼal tin kwentaj jechéˈ:

• Max na tomtal yab in tʼojontsal na Jehová, a léˈ xónaˈ abal kin tʼojontsi jeye. ¿Janéy a chalpayal neˈech ti tolmiy: ka nixoknaˈ kin belaˈ xowaˈ a belál o kin chuˈuw abal a kʼakʼnál? ¿Jantʼó ta chalpayal anchanˈ?

An tomkidh inik ani an tomkidh mímláb in ejtowaltsik kin chalpay junax janéy neˈechtsik kin tʼajaˈ. Aunque juntsikíl an tomkidh mímláb, yab xónaˈ neˈech kin léˈnaˈ kin tolmiy. Max anchanˈ ka watʼey yejat ka tʼilmách kʼal nin tomtal abal kin utsaˈ janéy in chalpayal, por yejat kin tʼajaˈ kʼal i kʼanidhomtaláb ani kʼal yan i kʼakʼnaxtaláb ani yab kin ukʼtsi abal na Jehová in punkʼuntsámal an tomkidh inik abal ki chuˈuw xowaˈ más alwaˈ abal nin yaníl. Ani na Jehová in léˈ abal an tomkidh mímláb kin tolmiy kʼal xowaˈ kin takuy kin tʼajaˈ nin tomtal. Max anchanáˈ kin tʼajaˈ neˈech ka tólmixin abal nin yaníl ka kʼwajay más kulbél. Ka ajaytsik 1 Pedro 3:3-5 ani ki tʼilmáchtsik kʼal tin kwentaj jechéˈ:

• ¿Janéy in achʼál na Jehová tam an tomkidh mímláb in kʼakʼnál nin tomtal?

6. Xi tomkidhtsik in ejtowal ka kʼwajay kulbél

VIDEO: Xowaˈ a ejtowal ka tʼajaˈ abal ki kʼánídháxintsik más (5:44)

• ¿Janéy a chuˈuw ban video xin tejwaˈmédhál abal kʼwajataktsik ti ówmél?

• ¿Janéy in tʼajaˈtsik abal ka kʼwajay másjunax?

Ka ajaytsik 1 Korintios 10:24 ani Kolosenses 3:13. Ka ajaytsik ti juntsik ani ki tʼilmáchtsik kʼal tin kwentaj jechéˈ:

• ¿Janti ti tolmiyal jechéˈ i takʼixtalábtsik xin pidhnál an Biblia abal ki kʼwajay más kulbél kʼal na tomtal?

An Biblia in ulal abal koˈol ku kʼakʼnáxin jún ani jún. Ani i xalkʼál i kʼanidhál ani i kʼakʼnál xi kʼeˈet. Ka ajaytsik Romanos 12:10 ani ki tʼilmáchtsik kʼal tin kwentaj jechéˈ:

• ¿Koˈol ki aytsi abal xi jún kin tejwaˈmédhaˈ i kʼakʼnaxtaláb okʼox? ¿Jantʼókʼi ta chalpayal anchanˈ?

XOWAˈ I EXOBNÁMICH

An tomkidh inik ani an tomkidh mímláb in ejtowaltsik ka kʼwajay kulbél max u kánídháxtsik ani u kʼakʼnaxtsik, ani max in tʼajál ti kwentaj xowaˈ in ulal an Biblia.

Ki chalpay xowaˈ i exobnámal

• ¿Janéy in ejtowal kin tʼajaˈ an tomkidh inik abal ka kʼwajay más kulbél kʼal nin tomtal?

• ¿Janéy in ejtowal kin tʼajaˈ an tomkidh mímláb abal ka kʼwajay mas kulbél kʼal nin tomtal?

• Max i kʼwajat tomkidh, ¿jantʼom takʼixtaláb xin pidhnál an Biblia neˈech ti tolmiy abal ki kʼwajay más kulbél kʼal na tomtal?

KA EXLAˈ JUN XATAˈ MÁS

Ka exóbnaˈ i takʼixtalábtsik xin pidhnál an Biblia xi neˈech ti tolmiy abal ka kóˈoy jun a yaníl kulbél.

A ejtowal ki kʼwajay kulbél kʼal na yaníl (Folleto)

Ka chuˈuw jun i video xin ólnál an alwaˈtalábtsik xin bachʼwal xitaˈ kʼwajattsik tomkidh ani in tʼajál xowaˈ in ulal an Biblia.

Tsubax tu kʼánídháx (4:26)

Ka exóbnaˈ xowaˈ in ulal an Biblia abal jantʼó ti an mímláb koˈol kin kʼakʼnaˈ nin tomtal kom jaˈich xi bijidh abal koˈol kin beletnaˈ nin yaníl.

«¿Jantʼókʼi an tomkidh mímláb koˈol kin kʼakʼnaˈ nin tomtal kom jaˈich xi bijidh abal koˈol kin beletnaˈ nin yaníl?» (La Atalaya, 15 de mayo de 2010)

Ka chuʼuw janéy in tʼajaʼ jun i tomkinél xi jilaxnektsik abal ka kʼwajaytsik alwaʼ juní.

U kʼwajat kulbél juntʼakʼi kom na Jehová tu tolmiy (5:14)