AJUMTALÁB 60
Ka ojontsi ki utey kʼal na Jehová
Kʼal ejtal an exobintaláb xi a kóˈyámal xoˈ a exobnámal yan xataˈ tin kwentaj na Jehová, ani a kʼanidhál más ani awich a pidhámalich na Jehová na ejattal ani pujnékich. Por max yabél a tʼajámal exomich xónaˈ a chalpayal abal ka tʼajaˈ. Tayíl tam jun u pujnal yejat ki ojontsi ku utey kʼal na Jehová. Ki chuˈuw janti i ejtowal ki tʼajaˈ.
1. ¿Jantʼó ti alwaˈ ki ojontsi ki chapikmédhaˈ ni belomtal kʼal na Jehová?
Abal yab ku ówmé kʼal jajáˈ, jaxtám yejat ki ojontsi ki chapikmédhaˈ ni belomtal kʼal na Jehová. An Tʼokat Dhutslab tu utsál jechéˈ i káw «Jaxtám ti yejat tʼajat ki exbay xowaˈ i achʼámalich abal yab ki kʼibdhaˈ an bél» (Hebreos 2:1). ¿Janéy neˈech ti tolmiy ki kʼwajay echʼekʼij lujat kʼal na Jehová? Ka ólnaˈ echʼekʼij an alwaˈ tʼilab, ki kʼale ban junkuntaláb ani ka aliy xanti más ka tʼójontsi na Jehová (ka ajaytsik Filipenses 3:16). ¡Ki éynaˈ ni ejattal abal ki tʼójontsi na Jehová jaˈich xowaˈ na más alwaˈ! (Salmo 84:10).
2. ¿Janéy yejat ka óntsi ka tʼajaˈ?
Xoˈ exomich i okʼyal an exobintaláb kʼal jechéˈ i libro, por na ejattal ta aykol kʼal na Kristo xowéy exom ti tujél. An Tʼokat Dhutslab in ulal abal an belomtsik koˈol kin jalkʼuytsik nin chalápil xin koˈol wiˈik ani kin koˈoy jun i ít chalap (Efesios 4:23, 24). Jaxtám ka ojontsi ka exóbnaˈ an Biblia ani ki kʼaleˈ ban junkuntalábtsik, max anchanˈ ka tʼajaˈ neˈech ka exlaˈ más na Jehová, janti jaˈich jajáˈ ani janéy in kulbetnál. Aníl jeye ka chʼilbay an alwaˈtalábtsik xin tejwaˈmedhál na Jehová. Ani ka óntsi ka tʼajaˈ i jalkʼuxtalábtsik ta ejattal abal ka kulbédhaˈ.
3. ¿Janti neˈech ti tolmiy na Jehová ki utey más kʼal jajáˈ?
An Tʼokat Dhutslab in ulal: «Na Dios neˈech ti ki lujkutsik, neˈech ti ki tolmiytsik abal yab ka jilaˈ ta belom, neˈech ti ki likedhantsitsik an ta ejattal, ani neˈech ti ki tolmiytsik abal ki kʼwajay tsububudh a itsích» (1 Pedro 5:10). Ejtal i tametnál i taktamixtaláb ani kʼibataláb, por na Jehová yab tu jilál kwetém jajáˈ tu pidhál an tolmixtaláb abal ki kuxuy (Salmo 139:23, 24). Ani jeye in ulal abal neˈech ti pidhaˈ an chápláb abal ka tʼójontsi kʼal i lujattaláb (ka ajay Filipenses 2:13).
ABAL KI EXÓBNAˈ MÁS
Ki chuˈuw janéy a ejtowal ka tˈajaˈ abal ka ojontsi ki utey kʼal na Jehová ani ki chuˈuw jantʼom alwaˈtalábtsik neˈech ti pidhaˈ.
4. Ka ojontsi ki tʼilmách kʼal na jaˈúb Jehová
An oláb ani an exobintaláb kʼal an Biblia ti tolmiyámal ka tʼajaˈ ta jaˈúb na Jehová. ¿Janti in ejtowal ti tolmiy jechéˈ abal ka ojontsi ki utey más kʼal na Jehová?
Ka ajaytsik Salmo 62:8 ani ki tʼilmáchtsik kʼal tin kwentaj jechéˈ:
A ejtowal ka tʼajaˈ i oláb xi ti tolmiy ki utey más kʼal na Jehová. ¿Janti a ejtowal ka tʼajaˈ?
Ka ajaytsik Salmo 1:2 ani ki tʼilmáchtsik kʼal tin kwentaj jechéˈ:
Max ka exóbnaˈ más alwaˈ an Biblia neˈech ti tolmiy kit utey más kʼal na Jehová. ¿Janti a ejtowal ka tʼajaˈ?
¿Janéy a ejtowal ka tʼajaˈ abal ka exbay más alwaˈ an Biblia? Abal ka chuˈuw xowaˈ a ejtowal ka tʼajaˈ, ka chuˈutsik an VIDEO. Tayíl ki tʼilmáchtsik kʼal tin kwentaj jechéˈ:
Kʼal xowaˈ a chuˈuw ban video, ¿janéy teye a ejtowal ka tʼajaˈ?
¿Kʼal janéy tin kwentaj a léˈ ka exóbnaˈ más?
5. Ka chalpay xanti más ka tʼójontsi na Jehová
Ka tʼajaˈ kʼeˈet xanéy más abal ka tʼójontsi na Jehová neˈech ti tolmiy ki utey más kʼal jajáˈ. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼom alwaˈtalábtsik in bachʼuw na Cameron kom kʼale ti tʼójontsix píl?
Yab ejtal i ejtowal ku kʼale tu óltsix píl i bitsow. Por ejtal i ejtowal ki tʼójontsi más na Jehová. Ka ajaytsik Proverbios 21:5 ani ki tʼilmáchtsik xanti más a ejtowal ka tʼójontsi na Jehová...
... ban junkuntaláb.
... ban óltsixtaláb.
¿Janti in ejtowal ti tolmiy jechéˈ i takʼixtaláb kʼal an Biblia abal ka bajaw ka tʼajaˈ xowaˈ a chalpayámal abal ka tʼójontsi más na Jehová?
Xowaˈ a ejtowal ka tʼajaˈ
Ka tʼajaˈ i olábtsik abal ka kʼakʼnaˈ más na Jehová ani ti utuw kʼal jajáˈ.
Ka ajay kidhat an Biblia.
Ka exlaˈ ani ka watʼnaˈ i kʼij kʼal an kidháblábtsik ban junkuntaláb.
Ka kóˈoy jun i exóbal kʼal an Biblia.
Ka tʼajaˈ ta precursor auxiliar o regular.
Max i kwitól, ka tʼajaˈ an chápláb abal ka bajaw ta tolmix okʼnom.
6. ¡Ki kʼwajay kʼijidh abal echʼekʼij!
Ka ajaytsik Salmo 22:26 ani ki tʼilmáchtsik kʼal tin kwentaj jechéˈ:
¿Janéy koˈol ka tʼajaˈ abal ki kʼwajay kʼijidh jechéˈ i kʼij ani abal echʼekʼij?
XOWAˈ I EXOBNÁMICH
Ka ojontsi ka chápnaˈ abal ki utey más kʼal na Jehová ani ka chalpay xanti más a ejtowal ka tʼójontsi. ¡Anchanáˈ neˈech ki kʼwajay kʼijidh abal echʼekʼij!
Ki chalpay xowaˈ i exobnámal
¿Jantʼó ta belál abal na Jehová neˈech ti tolmiy abal ka tʼójontsi kʼal i lujattaláb?
¿Janéy a ejtowal ka tʼajaˈ abal na jaˈúbtalábil kʼal na Jehová ka kʼwajay más chapik?
¿Jantʼó ti lej exbadh ka chalpay janéy más a ejtowal ka tʼajaˈ abal ka tʼójontsi na Jehová?
KA EXLAˈ JUN XATAˈ MÁS
Na Jehová in kulbetnál tʼajat abal echʼekʼij ki tʼójontsi ani ki koˈontsi ti belomtaláb.
Juntsikíl awich ki kʼibdhaˈ an kulbétaláb. ¿Janéy i ejtowal ki tʼajaˈ abal ku kʼwajay juní kulbél?
Xowaˈ u tʼajaˈ abal ku tʼójontsi juní na Jehová kʼal i kulbétaláb (5:25)
¿Janéy yejat ka tʼajaˈ abal ka tʼójontsi más na Jehová ani ka bajaw xowaˈ a chalpayámal ka tʼajaˈ?
«Ki chuˈuw xowaˈ i ejtowal ki tʼajaˈ abal ki kʼakʼnaˈ na Jehová» (La Atalaya, 15 de julio de 2004)
Ka chuˈuw jantʼó ti lej exbadh abal tatáˈ ka exóbnaˈ alwaˈ an Biblia ani ka tʼajaˈ ti kwentaj xowaˈ in ulal.