AJUMTALÁB 52
Jantʼó ti koˈol ki kóˈoy ti kwentaj janti tu xeketlinal
Ejtal u tʼojojonal ani u xeketlinal xanti kulbetnál. Ani neˈech ki kulbédhaˈ na Jehová max ki tʼajaˈ ti kwentaj an takʼixtalábtsik xi tu óltsal an Biblia kʼal xanti koˈol ku xeketlin. Ki exóbnaˈ juntsik i takʼixtaláb xi tu pidhál.
1. ¿Jantʼom takʼixtalábtsik koˈol ki tʼajaˈ ti kwentaj abal ki choˈóbnaˈ janti koˈol ku xeketlin?
Xitaˈ in kʼakʼnál na Jehová koˈol ka xeketlin «in lujtalkʼi xan ti yejat yab ka kʼudhkʼumlin abalkʼi ka telan kʼal an atiklábtsik» ani kin xalkʼaˈ i chalpadhtaláb. Aníl jeye koˈol ka xeˈchin tʼojojodh alwaˈ ani yab ka xeˈchin kʼutlidh, anchanáˈ neˈech kin tejwaˈmédhaˈ abal in kʼakʼnál an Okʼoxláb (1 Timoteo 2:9, 10). Ba jechéˈ i pejats kʼal an Biblia i káldhál chéˈ i takʼixtaláb. 1) Koˈol ku kʼudhkʼumlin tin «lujtalkʼi xan ti yejat». Anchanˈ xanti ta chuˈúmal tin bitsówil na Jehová an kidháblábtsik u xeketlinal xanti tin kulbetnál, por xanti tu tʼojojonaltsik in xalkʼál abal in kʼakʼnál na Jehová. 2) Yab u kʼudhkʼumlinal «abalkʼi ka telan kʼal an atiklábtsik» yab i éynál i kʼudhkʼum xi tunutsik tʼajat, nibal xi tinat juntʼakʼi. 3) I tejwaˈmedhál i chalpadhtaláb tam ki takuy alwaˈ i kʼudhkʼúmil ani yab ki éynaˈ jun i kʼudhkʼum kom i chuˈtal abal xi más in éynál. 4) Xanti tu tʼojojonal ani u xeketlinal koˈol kin xalkʼaˈ abal i kʼakʼnál an Okʼoxláb, ani anchanáˈ an atiklábtsik neˈech jeye kin chuˈuw (1 Korintios 10:31).
2. ¿Janéy in chalpayal an kidháblabtsik kʼal xanti tu xeketlinal?
Ejtal i ejtowal ki takuy xanti i léˈ ku xeketlin. Por koˈol ki tʼajaˈ ti kwentaj janéy neˈech kin chalpay xi kʼeˈettsik. I chápnantsal abal yab ki waltsi nin chalápil kʼal xanti tu kʼudhkʼumlinal. An Tʼokat Dhutslab tu takʼyal ki tʼajaˈ jechéˈ: «yejat ki tʼajaˈ xowaˈ in kulbetnál ni at kidháb ani anchanˈ ki tolmiy ka belmách más» (ka ajaytsik Romanos 15:1, 2).
3. ¿Janti i ejtowal ki tolmiy xi kʼeˈet kin exlaˈ na Jehová max u kʼudhkʼumlinal alwaˈ?
Echʼekʼij i chápnantsal ku xeketlin alwaˈ xanti tin tomnál. Por i lej tʼajál ti kwentaj janti tu xeketlinal tam u kʼalel ban junkuntaláb ani tam u kʼalel tu óltsix. I léˈ abal an atiklábtsik kin chuˈuw abal u neˈech tʼojojodh alwaˈ ani kin bachʼuw an alwaˈ tʼilab xi óltsal. Ani kʼal xanti tu xeketlinal kin tolmiy an atiklábtsik abal kin exóbnaˈ tin kwentaj an Okʼoxláb, ani kin chuˈutsik kej «an okʼtsixtaláb tin kwenta na Dios ni loˈóxil, labidh tʼajat» (Tito 2:10).
ABAL KI EXÓBNAˈ MÁS
Ki exóbnaˈ janéy i ejtowal ki tʼajaˈ abal ku xeketlin xanti tin tomnál ani kin kulbetnaˈ na Jehová.
Kʼal xanti tu xeketlinal i tejwaˈmédhál max i kʼakʼnál an atiklábtsik xin koˈol i awiltaláb. Na Jehová in tʼajál ti kwentaj xowaˈ i koˈol ti itsích, por in tʼajál jeye ti kwentaj xanti tu xeketlinal kom anchanˈ i tejwaˈmédhál max i kʼakʼnál.
4. Tam u xeketlinal alwaˈ i kʼakʼnál na Jehová
¿Jantʼókʼi ti lej tʼajál ti kwentaj janti tu xeketlinal? Ka ajaytsik Salmo 47:2 ani ki tʼilmáchtsik kʼal tin kwentaj jechéˈ:
¿Janti koˈol ku xeketlin max i choˈób abal i tʼojontsal na Jehová?
¿A chalpayal abal jaˈich lej exbadh ki tʼajaˈ ti kwentaj janti tu neˈech xeketlidh tam u kʼalel ban junkuntaláb ani tam u kʼalel tu óltsix? ¿Jantʼókʼi ta chalpayal anchanˈ?
5. Xowaˈ i ejtowal ki tʼajaˈ abal ku tʼojojon alwaˈ ani ki takuy alwaˈ ni kʼudhkʼúmil
Abal ku kʼudhkʼumlin alwaˈ yab i yejentsal ki chʼaˈay i kʼudhkʼum xi kʼajbidh tʼajat. Tokot koˈol ka kʼwajay tʼokat ani yab ka kʼwajay mitʼsats. Ka ajaytsik 1 Korintios 10:24 ani 1 Timoteo 2:9, 10. Ani tayíl ki tʼilmáchtsik jantʼó ti yab in tomnál ki éynaˈ i kʼudhkʼum xi...
... yab in tomnál o kʼutlidh.
... xi lej tinat, dhadhat ani tunúl.
Wawáˈ yabich u kʼwajat takʼidh kʼal nin takʼixtal na Moisés, por tu óltsal janéy in chalpayal na Jehová kʼal tin kwentaj jun xataˈ. Ka ajaytsik Deuteronomio 22:5 ani ki tʼilmáchtsik kʼal tin kwentaj jechéˈ:
¿Jantʼó ti jun i inik yab koˈol ka tʼojojon nibal ka xeketlin abal ka xalkʼan jelti jun i uxum, ani jantʼó ti jun i uxum yab koˈol ka tʼojojon nibal ka kʼudhkʼumlin abal ka xalkʼan jelti jun i inik?
Ka ajaytsik 1 Korintios 10:32, 33 ani 1 Juan 2:15, 16, ani ki tʼilmáchtsik kʼal tin kwentaj jechéˈ:
Koˈol ki tʼajaˈ ti kwentaj max an atiklábtsik xonti tu kʼwajíl o an kidháblábtsik ban junkuntaláb yab in kulbetnál xanti tu kʼudhkʼumlinal, ¿Jantʼókʼi?
¿Janti tin kulbetnáltsik ka xeketlin ani ka tʼojojon an atiklábtsik xonti ta kʼwajíl?
¿A chalpayal abal xanti tu xeketlinaltsik yab in tomnál ka xeketlin jun i óltsix kʼal a Jehová? ¿Jantʼókʼi ta chalpayal anchanˈ?
I ejtowal ku xeketlin ani ku tʼojojon xanti i kulbetnál ani ki kulbédhaˈ na Jehová.
XOWAˈ JUNTSIK IN ULAL: «Nanáˈ in xeketlinal xanti tu léˈ».
¿Jayéchkʼi teye a chalpayal? ¿Jantʼókʼi?
XOWAˈ I EXOBNÁMICH
Tam i takwyal alwaˈ xanti neˈech ku xeketlin i kʼakʼnál na Jehová ani an atiklábtsik.
Ki chalpay xowaˈ i exobnámal
¿Jantʼó tin tʼajál ti kwentaj na Jehová janti tu xeketlinal ani tu tʼojojonal?
¿Jowaˈ jaˈich juntsik i takʼixtaláb xi neˈech tu tolmiy abal ki choˈóbnaˈ xanti koˈol ku xeketlin?
¿I ejtowal ki tolmiy an atiklábtsik abal kin exlaˈ na Jehová max ku kʼudhkʼumlin alwaˈ? ¿Janti?
KA EXLAˈ JUN XATAˈ MÁS
Ka chuˈuw janéy in tʼajál kin chalpay xi kʼeˈet an kʼudhkʼumtsik xi a éynál.
«¿Janéy in chalpayal xi kʼeˈettsik kʼal xanti tu kʼudhkʼumlinal?» (Artículo de jw.org)
Ka chuˈuw jantʼó ti koˈol ka chalpay alwaˈ max a léˈ ka tʼajaˈ jun i tatuaje.
«¿Alwaˈ abal ku kʼwajbaˈ jun i tatuaje?» (Artículo de jw.org)
Ka exóbnaˈ más i takʼixtalábtsik xi neˈech ti tolmiy abal ki kʼudhkʼumlin alwaˈ.
«¿In pidhál i kʼakʼnaxtaláb na Jehová kʼal xanti tu xeketlinal?» (La Atalaya, septiembre de 2016)
¿Janéy in tʼajaˈ jun i mímláb abal yab kin tʼajaˈ lej watʼats ti kwentaj janti tu kʼudhkʼumlinal xi kʼeˈet?
«Yab u kulbetnálak xanti tu kʼudhkʼumlinal xi kʼeˈet» (¡Despertad!, 22 de diciembre de 2003)