AJUMTALÁB 54
Nin tʼojlábil an «tʼojontsix xi lujat ani chalpadh»
Na Kristo «kʼwajat jelti nin ókʼ an belomtsik» (Efesios 5:23). Na Kristo kʼwajat tuwaˈ walkʼiˈ ani xoˈ ta kʼitsáj in éynál an «tʼojontsix xi lujat ani chalpadh» abal kin beletnaˈ nin aykóliltsik xi kʼwajat techéˈ ti Chabál (ka ajay Mateo 24:45). Jechéˈ i «tʼojontsix xi lujat ani chalpadh» bijidh kʼal na Jesús ani pidhnék ti awiltaláb, ani in chápnantsaltsik abal kin beletnaˈ an kidháblábtsik. ¿Jitaˈ jaˈich jechéˈ xi tʼojontsix? ¿Janti tu beletnál?
1. ¿Jitaˈ jaˈich an «tʼojontsix xi lujat ani chalpadh»?
Na Jehová echʼekʼij in éynámal jun i inik o jun i bukeˈ i atiklábtsik abal kin beletnaˈ nin bitsówil (Malaquías 2:7; Hebreos 1:1). Anchanˈ jelti tam ti chemech na Jesús, an abatwáletsik ani an okʼnomtsik xi ti Jerusalén jaˈich xin beletnaˈ an junkuntalábtsik (Hechos 15:2). Anchanˈ xan tu tʼajnalak ti wejeˈ, xoˈ ta kʼitsáj waˈach jun i Kweneˈ i Okʼlektsik kʼal an óltsixtsik kʼal a Jehová xin pidhnál i okʼtsixtaláb ani in beletnál an tʼojláb kʼal an ólnaxtaláb. Jechéˈ i kweneˈ jaˈich «xu jilnal punkʼudh kʼal nin ajátik [na Jesús]» abal kin tʼajaˈ jechéˈ i tʼojláb (Mateo 24:45a). Ejtal an kidháblábtsik xi kʼwajat ti tʼojnal kʼal an Kweneˈ i Okʼlektsik takudhtsik kʼal an tʼokat chápláb ani tam ka chemechtsik u kʼaleltsik ti takʼix kʼal na Jesús tuwaˈ walkʼiˈ.
2. ¿Jantʼom okʼtsixtalábtsik tu pidhál an tʼojontsix xi lujat ani chalpadh?
Na Jesús in uluw abal an tʼojontsix xi lujat ani chalpadh neˈech kin kóˈoy an punkʼuntsixtaláb «abal kin kʼapundhaˈ [an belomtsik] xanti yejat» (Mateo 24:45b). Anchanˈ xanti an kʼapnél tu tolmiyal ku kʼwajay likat ani ejat, an okʼtsixtalábtsik xi tál kʼal na Jehová xi káldhats ban Tʼokat Dhutslab aníl jeye tu tolmiyal abal ki ojontsi ki tʼojontsi na Jehová ani ki tʼajaˈ an tʼojláb xi jajáˈ tu punkʼuntsámal (1 Timoteo 4:6). Jechéˈ i okʼtsixtalábtsik xi káldhats kʼal an Biblia i bachʼwal kʼal an publicaciones, an junkuntalábtsik, an videos ani an púlek junkuntalábtsik. Ejtal jechéˈ i tolmixtalábtsik tu tolmiyal ki exbay xowaˈ na Jehová in léˈ ki tʼajaˈ ani tu tolmiyal ku utey más kʼal jajáˈ.
ABAL KI EXÓBNAˈ MÁS
Ki exóbnaˈ jantʼó ti yejentsal an «tʼojontsix xi lujat ani chalpadh», xi jaˈich an Kweneˈ i Okʼlektsik.
An Kweneˈ i Okʼlektsik in pidhnál i tolmixtaláb ani óltsixtaláb abal kin chapikmédhantsi nin belomtal an óltsixtsik kʼal a Jehová tin pubél an chabál.
3. Nin bitsówil na Jehová koˈol ka kʼwajay tʼojojodh alwaˈ
Na Jesús in tolmiyal an Kweneˈ i Okʼlektsik abal kin tʼajaˈ an tʼojláb xin tʼajál an óltsixtsik kʼal a Jehová. Ban jidhtal siglo anchanˈ jeye tu tʼajnal wiˈik. Ka chuˈutsik an VIDEO.
Ka ajaytsik 1 Korintios 14:33, 40 ani ki tʼilmáchtsik kʼal tin kwentaj jechéˈ:
Kʼal xowaˈ i ajay ban versículos, ¿in léˈ na Jehová abal nin bitsówil ka kʼwajay tʼojojodh alwaˈ abal ka tʼojon xanti in tomnál? ¿Jantʼó ta chalpayal anchanˈ?
4. An tʼojontsix xi lujat in tʼojojoyal an ólnaxtaláb
Ti wejeˈ an okʼox belomtsik in chuˈtalak kʼal yan in exbádh an óltsixtaláb. Ka ajaytsik Hechos 8:14, 25 ani ki tʼilmáchtsik kʼal tin kwentaj jechéˈ:
Ban okʼox siglo, ¿jitaˈ in okʼnálak an óltsixtaláb?
¿Janéy in tʼajaˈ na Pedro ani na Juan kʼal xowaˈ utsan kin tʼajaˈ kʼal an abatwáletsik?
Ki ólnaˈ an alwaˈ tʼilab jaˈich an tʼojláb xi más uluts xin tʼojojoyal an Kweneˈ i Okʼlektsik. Ka chuˈutsik an VIDEO.
Na Jesús in uluw abal lej exbadh ki ólnaˈ an alwaˈ tʼilab. Ka ajaytsik Markos 13:10 ani ki tʼilmáchtsik kʼal tin kwentaj jechéˈ:
¿Jantʼó ti lej exbadh abal an Kweneˈ i Okʼlektsik ka ólná an alwaˈ tʼilab?
¿Jantʼó ti yejentsal abal «an tʼojontsix xi lujat ani chalpadh» kin tʼojojoy an óltsixtaláb tin pubél an chabál?
5. An tʼojontsix xi lujat tu pidhál i óltsixtaláb
An Kweneˈ i Okʼlektsik in pidhnál i óltsixtaláb tin pubél an chabál. Ka chuˈuw janti in tʼajálak an Kweneˈ i Okʼlektsik ti wejeˈ. Ka ajaytsik Hechos 15:1, 2 ani ki tʼilmáchtsik kʼal tin kwentaj jechéˈ:
¿Jantʼó ti káwlíxin juntsik i belomtsik ban okʼox siglo?
¿Jonti in elaˈtsik an tolmixtaláb na Pablo, ani na Bernabé ani kʼeˈet i belomtsik abal kin lejkiytsik xowaˈ in tamu?
Ka ajaytsik Hechos 15:12-18 ani 23-29, ani ki tʼilmáchtsik kʼal tin kwentaj jechéˈ:
¿Janéy in tʼajaˈ an Kweneˈ i Okʼlektsik xi ti okʼox siglo abal ka tolmiyattsik kʼal an Okʼoxláb abal kin choˈóbnaˈtsik janéy kin tʼajaˈ? (Ka chuˈutsik an versículos 12, 15 ani 28).
Ka ajaytsik Hechos 15:30, 31 ani 16:4, 5, ani ki tʼilmáchtsik kʼal tin kwentaj jechéˈ:
¿Janéy in achʼaˈtsik an okʼox belomtsik tam tin bachʼuw an takʼixtalábtsik xin abnaˈ an kweneˈ i Okʼlektsik?
¿Jantʼó ti choˈób abal na Jehová in lábtʼajaˈ jechéˈ i belomtsik kom tʼajxin ti kwentaj?
Ka ajaytsik 2 Timoteo 3:16 ani Santiago 1:5, ani ki tʼilmáchtsik kʼal tin kwentaj jechéˈ:
Xoˈ ta kʼitsáj an Kweneˈ i Okʼlektsik tam neˈech kin takuy xowaˈ neˈech kin tʼajaˈtsik, ¿janéy in tʼajál abal kin bachʼuw an tolmixtaláb xin yejentsal?
XOWAˈ JUNTSIK IN ULAL: «Ki tʼajaˈ ti kwentaj xowaˈ in ulal an Kweneˈ i Okʼlektsik jaˈich jelti max i tʼajál ti kwentaj in tʼilábil i iniktsik».
¿Jantʼó ta belál abal na Jesús kʼwajat in tolmiyal an Kweneˈ i Okʼlektsik?
XOWAˈ I EXOBNÁMICH
An Kweneˈ i Okʼlektsik jaˈich «an tʼojontsix xi lujat ani chalpadh» xi na Jesús in takwyámal. Jechéˈ i tʼojontsix in pidhál i óltsixtaláb an belomtsik xi tin pubél an chabál abal kin chapikmédhantsi tin belomtal.
Ki chalpay xowaˈ i exobnámal
¿Jitaˈ in takuy an «tʼojontsix xi lujat ani chalpadh»?
¿Janti tu beletnál an Kweneˈ i Okʼlektsik?
¿A belál abal an Kweneˈ i Okʼlektsik jaˈich «an tʼojontsix xi lujat ani chalpadh»?
KA EXLAˈ JUN XATAˈ MÁS
Ka exóbnaˈ janti tu tʼojojonal an Kweneˈ i Okʼlektsik abal kin tʼajaˈ nin tʼojlábil.
«¿Janéy jaˈich an Kweneˈ i Okʼlektsik kʼal an Óltsixtsik kʼal a Jehová?» (Artículo de jw.org)
Ki chuˈuw janéy in tʼajál an Kweneˈ i Okʼlektsik abal an óltsixtaláb xi tu pidhál kin uluw an tsubaxtaláb.
¿Janéy in chalpayal an Kweneˈ i Okʼlektsik kʼal tin kwentaj an tʼojláb xi punkʼuntsidh kʼal na Jesús?
¿Janti tu xalkʼanal ban junkuntalábtsik ani ban pulek junkuntalábtsik abal na Jehová in tolmiyal an Kweneˈ i Okʼlektsik?