AJUMTALÁB 51
Janti i ejtowal ki kulbédhaˈ na Jehová kʼal ni káwintal
Tam ti na Jehová tu tʼajaˈ tu pidhaˈ jun i chʼejwalixtaláb: tu tʼajaˈ abal ki ejto ku káwin. ¿In tʼajál ti kwentaj na Jehová janti i éynál jechéˈ i chʼejwalixtaláb? ¡Anchanáˈ! (Ka ajay Santiago 1:26). Jaxtám, ¿janti i ejtowal ki éynaˈ ni káwintal abal ki kulbédhaˈ na Jehová?
1. ¿Janti i ejtowal ki éynaˈ alwaˈ jechéˈ i chʼejwalixtaláb xi tu pidhámal na Jehová?
An Tʼokat Dhutslab in ulal: «Ki pákábédháxintsik ani ki púbédhántsínxintsik ta itsích jún ani jún» (1 Tesalonicenses 5:11). ¿A exlál jun xitaˈ xin yejentsal i tolmixtaláb? ¿A ejtowal ka tʼajaˈ jun xataˈ abal kin achʼaˈ más kʼijidh? Ka utsaˈ jachanˈ i atikláb abal a kʼanidhál tʼajat. Aníl jeye a ejtowal ka tʼiltsi xowaˈ alwaˈ in tʼajál. ¿A chalpayal jun i pejats kʼal an Biblia xin ejtowal kin tolmiy abal ka kanatbé? Waˈach yan i pejats xi a ejtowal ka éynaˈ. Aníl jeye yab ka ukʼtsi abal koˈol ka koˈoy ti kwentaj janéy a ulal ani janti ta ulal jun i káw. Jaxtám echʼekʼij ka chápnantsi ki káwin kʼal i chaˈattaláb ani kʼanidhomtaláb (Proverbios 15:1).
2. ¿Janti yab in tomnál ku tʼilmách?
An Tʼokat Dhutslab in ulal: «Yab ka ulutsik i tʼilab xi yab alwaˈ» (ka ajay Efesios 4:29). Jechéˈ in léˈ kin uluw abal yab koˈol ku tʼilmách kʼal i atʼax káw nibal ki uluw abal ki yajbédhaˈ. Aníl jeye yab i tʼilál xowaˈ yab in tomnál, nibal i atʼax tʼilál xi kʼeˈet (ka ajay Proverbios 16:28).
3. ¿Janéy neˈech tu tolmiy abal ku káwin alwaˈ?
Kʼal xowaˈ i ulal i xalkʼál janéy i chalpayal ani i achʼál (Lukas 6:45). Jaxtám echʼekʼij koˈol ki chápnantsi ki chalpay xowaˈ alwaˈ ani xowaˈ tʼokat, xowaˈ in tejwaˈmedhál i kʼakʼnaxtaláb ani kʼanidhomtaláb (Filipenses 4:8). Abal ki ejto ki tʼajaˈ, koˈol ki takuy alwaˈ kʼal xanéy neˈech ku kʼijidhbé ani ki chalpay alwaˈ jitaˈ neˈech ki jaˈúbnaˈ (Proverbios 13:20). Aníl jeye koˈol ki chalpay okʼox xanti neˈech ku káwin. Ani ki chalpay max xowaˈ neˈech ki uluw neˈech kin tolmiytsik xi kʼeˈet o neˈech kin yajbédhaˈ. An Tʼokat Dhutslab in ulal: «Xitaˈ u tʼilom ani yab in chalpayal okʼox xanti neˈech ka káwin u yajbédhax jelti jun i machét, pero in káwintal jitaˈ chalpadh in jeldhál jun i yajal» (Proverbios 12:18).
ABAL KI EXÓBNAˈ MÁS
Ki chuˈuw janti koˈol ku káwin abal ki kanatbédhaˈ xi kʼeˈet ani ki kulbédhaˈ na Jehová.
4.Ka chalpay alwaˈ xanti neˈech ki káwin
Ejtal i ulal jun i káw xi tayíl i léˈ max yabak i ulúmal (Santiago 3:2). Ka ajaytsik Gálatas 5:22, 23 ani ki tʼilmáchtsik kʼal tin kwentaj jechéˈ:
Abal ki káwin xanti in tomnál, ¿jantʼom alwaˈtaláb neˈech ka kontsi na Jehová abal ti pidhaˈ? ¿Janti neˈech ti tolmiy jechéˈ i alwaˈtalábtsik?
Ka ajaytsik 1 Korintios 15:33 ani ki tʼilmáchtsik kʼal tin kwentaj jechéˈ:
¿In ejtowal ti tolmiy o ti chʼilkʼoy kʼal xowaˈ yab alwaˈ na juniktsik ani kʼal xowaˈ i kʼijidhbél? ¿Janti?
¿Janéy in ejtowal kin tʼajaˈ abal ku káwin alwaˈ o ku atʼax káwin?
Ka ajaytsik Eclesiastés 3:1, 7 ani ki tʼilmáchtsik kʼal tin kwentaj jechéˈ:
¿Jowkʼi tin tomnál ki jilkʼon chamamadh ani ka aytsi tayíl abal ki káwin?
5. Ku tʼilmách alwaˈ tin kwentaj xi kʼeˈet
¿Janéy i ejtowal ki tʼajaˈ abal yab ki atʼax tʼilaˈ xi kʼeˈet nibal ki uluw i káw xu yajbédhax? Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼó tin léˈak an kidhábláb kin jalkʼuy xanti tu káw?
¿Janéy in tʼajaˈ abal ka jalkʼun?
Ka ajaytsik Eclesiastés 7:16 ani ki tʼilmáchtsik kʼal tin kwentaj jechéˈ:
¿Janéy koˈol ki tʼajaˈ ti kwentaj max i achʼál i léˈ ki atʼax tʼilaˈ jun xitaˈ?
Ka ajaytsik Eclesiastés 7:21, 22 ani ki tʼilmáchtsik kʼal tin kwentaj jechéˈ:
¿In ejtowal ti tolmiy jechéˈ i pejats kʼal an Biblia abal yab ki chakuy tam jun xitaˈ ti utsaˈ jun xataˈ xi yab ka kulbetnaˈ? ¿Jantʼókʼi?
6. Ka tawnaˈ kʼal i kʼanidhomtaláb na yaníl
Na Jehová in léˈ abal ki tawnaˈ ni yaníl kʼal i kʼanidhomtaláb. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy neˈech ti tolmiy abal ka tawnaˈ kʼal i kʼanidhomtaláb na yaníl?
Ka ajaytsik Efesios 4:31, 32 ani ki tʼilmáchtsik kʼal tin kwentaj jechéˈ:
¿Janti koˈol ki káwin abal ki kʼwajay kulbél kʼal na yaníl?
Na Jehová in utsálak na Jesús abal in kʼanidhál. Ka ajaytsik Mateo 17:5 ani ki tʼilmáchtsik kʼal tin kwentaj jechéˈ:
¿Janti a ejtowal ka chʼilbay na Jehová tam ki tʼilmách kʼal na yaníl?
Ka utsaˈ echʼekʼij xi kʼeˈet abal i kulbél kʼal xowaˈ in tʼajál alwaˈ.
XOWAˈ JUNTSIK IN ULAL: «Nanáˈ u ulal xowaˈ u chalpayal. Ani yab u kwentaj max xi kʼeˈettsik yab in kulbetnál».
¿A chalpayal teye anchanáˈ? ¿Jantʼókʼi?
XOWAˈ I EXOBNÁMICH
Kʼal xowaˈ ki uluw in ejtowal kin kulbédhaˈ o kin tʼeˈpindhaˈ xi kʼeˈet. Jaxtám yejat ki chalpay alwaˈ janéy neˈech ki uluw, jowkʼi ti neˈech ki uluw ani janti neˈech ki uluw jun i káw.
Ki chalpay xowaˈ i exobnámal
¿Janti neˈech ka éynaˈ na káwintal abal ka tolmiy xi kʼeˈettsik?
¿Janti yab in tomnál ku tʼilmách?
¿Janéy neˈech tu tolmiy abal ku káwin echʼekʼij kʼal i kʼanidhomtaláb ani alwaˈtaláb?
KA EXLAˈ JUN XATAˈ MÁS
¿Janéy neˈech tu tolmiy abal ku tʼilmách kʼal i kʼanidhomtaláb?
Janéy neˈech ti tolmiy abal yab ki atʼax tʼilmách.
«¿Jantʼó ti yab alwaˈ ki atʼax tʼilmách?» (Artículo de jw.org)
Janéy a ejtowal ka tʼajaˈ abal yab ka tʼilaˈ xi kʼeˈet.
Ka ajay janti ti tolmiyat jun i inik kʼal na Jehová abal kin jilaˈ ti atʼax tʼilom.
«U tʼajaˈ ti kwentaj janéy kʼwajatak u tʼajál tu xeˈchintal» (La Atalaya, 1 de agosto de 2013)