John

6 Wen da Main Pries guys an da police guys see Jesus, dey make big noise, an dey yell, “Kill da buggah on top one pos! Kill da buggah on top one pos!” Pilate tell, “You guys take him an kill um on top one pos! I no find notting bad he wen do dat I gotta punish him.” 16 Den Pilate turn ova Jesus fo da army guys kill um on top one pos. So da army guys take charge a Jesus. 17 He carry da pos dey going use fo kill um outside da town, da place dey call “Da Skull Place,” an da Jews call um “Golgota,” dea language. 18 Ova dea dey nail Jesus to da pos. Same ting fo two odda guys, one on top one pos on da lef side, da odda one on top anodda pos on da right side, an Jesus in da middo. 23 Wen da soldiers had nail Jesus to da pos, dey take his clothes an split um in four piles, one pile fo ery soldier. An dey wen take da clothes he wea undaneat, but it neva have one seam cuz dey wen weave um from top to bottom. 24 So dey tell each odda, “Mo betta we no rip um, but we go throw dice fo see who gettum.” Dis wen happen fo make da scripcha come tru, “Dey split up my clothes wit each odda, an dey throw dice fo gettum.” So dass wat da soldiers wen do.