LESSON 15
Why Moa Betta fo Keep Goin?
1. If you study steady kine, how tings goin be lookin fo you?
Garanz, evryting you wen awready learn from da Bible bout Jehovah, wen make you moa tight wit him. (Numba 1 From Peter 2:2) No pau yet, da moa you study, da moa tight you come wit Jehovah. Dats supa importan, fo get da life dat stay to da max foeva.—Read John 17:3; From Jude 21.
Da moa stuff we learn bout God, da moa tight we come wit him. Dis make us feel sorry bout da bad kine stuffs we used to do befoa. So, we no do um no moa. (Fo Da Hebrew Peopo 11:1, 6) Dats wen life come moa betta an our faith stay solid! Wen we trus God, dat make him happy wit us.—Read Jesus Guys 3:19.
2. How wat you wen learn, can help oddas?
You can be bes frens wit Jehovah
Fo shua you like go tell peopo bout da good kine stuff you learn from da Bible. Da Bible, keep studyin um, goin make um duck soup fo you explain your faith an tell all da good kine tings God like evrybody kno.—Read Fo Da Rome Peopo 10:13-15.
Firs ting, you goin like share wat you had learn wit your frens an family. Jus rememba, make nice, actions speak louda den words. No go ack all tantaran, jus cuz you kno da trut. No go tell um, “ah your church, poho,” only tell um bout da good kine stuff.—Read Numba 2 Fo Timoty 2:24, 25.
3. Can come tight wit Jehovah, o wat?
Get moa close to Jehovah, by readin da Bible. Fo shua he goin be happy wit you. Is spesho fo be part of Jehovah’s ohana! Can be tight wit Jehovah!—Read Numba 2 Fo Da Corint Peopo 6:18.
4. Wat gotta do, fo keep goin?
Da moa you use God’s Word, da moa betta your life goin be. Try go ask da Witnesses fo Jehovah fo study da Bible, wit da book, What Can the Bible Teach Us? Tings goin only be lookin up fo you, wen you stick wit um.—Read Numba 1 Fo Timoty 4:15, 16, Fo Da Rome Peopo 12:2.
Jehovah he da happy God, all good tings come from him. You can come moa close to him by cruzin wit his peopo. (Fo Da Hebrew Peopo 10:24, 25) Jus no give up, try do good kine stuffs fo make Jehovah happy. Den automatic, you can get da life dat stay to da max foeva. Da bes ting you can do, is fo come moa close wit Jehovah.—Read Fo Titus 1:2.