Wat God Wen Do At Da Red Sea

Right wen Pharaoh wen hea dat da Israel guys had leave Egypt, he wen change his mind about letting dem go. He wen tell his warriors, ‘Get all my war wagons ready, an we go afta dem! We neva shoulda let um go.’ Him an his guys wen start fo go afta da Israel guys.

Jehovah wen show his peopo wea fo go, using one cloud day time an fiyah nite time. He wen lead dem to da Red Sea an told um fo set up camp.

Den da Israel peopo wen see Pharaoh an his army wuz coming behind dem. Dey wuz stuck between da Egypt army an da Red Sea. Dey wen yell to Moses, ‘We goin mahke! Moa betta you wen leave us in Egypt.’ But Moses tell, ‘No be sked. Try wait an see how Jehovah goin save us.’ Moses had trus in Jehovah fo real kine, aah?

Jehovah wen tell da Israel guys fo break down dea camp. Dat nite, Jehovah wen move da cloud an put um between da Egypt guys an da Israel guys. Egypt side, wuz ony dark. But Israel side, had light.

Jehovah wen tell Moses fo put his hand ova da sea. Den Jehovah wen make one strong wind blow da whole nite. Da sea wen split in two, an had one trail of dry groun fo follow down da middo. Da millions of Israel guys wen walk on da dry groun between da two walls of watta fo get to da odda side.

Pharaoh’s army wen follow da Israel guys on da dry groun too. But den Jehovah wen make all da army guys come all confused. Da wheels wen start fo fall off da war wagons. Da army guys wen yell, ‘We gotta get outa hea! Jehovah stay fighting fo dem!’

Jehovah wen tell Moses, ‘Hold out yoa hand ova da sea.’ Right den an dea, da walls of watta wen wipe out da Egypt army. Pharaoh an all his guys wen mahke. None of dem wen live.

On da odda side of da sea, da mangus crowd of peopo wen sing out loud to Jehovah, “I like make one song fo Da One In Charge, cuz he awesome! He wen throw da horses an da guys dat ride um inside da sea.” Wen da peopo had sing, da wahine wen dance an play da tammorines. Erybody wuz supa happy dat now dey stay free.