Da Army Guy An Da Litto Girl

Had one litto Israel girl dat wuz kidnap from her ohana by da Syria army. Dey wen take her far away from her home, an now she wuz one slave girl to da wife of one army leada, Naaman. Da litto girl wen worship Jehovah even tho da peopo aroun her neva.

Now dis guy Naaman, had one real bad skin disease. He wuz soa all da time. Da litto girl wen feel bad an wen like help him. She tell Naaman’s wife: ‘I kno one guy dat can help yoa husban. Back wea I from in Israel, get one prophet named Elisha. Fo shua, he can make yoa husban come all good again.’

Naaman’s wife wen go tell Naaman wat da litto girl had say. He wuz down fo try watevas, so he wen go Israel fo go Elisha’s house. Naaman wen tink Elisha wuz goin treat him like he wuz somebody importan. But Elisha neva even talk to him face to face. He jus had sen out one messenja guy fo tell him: ‘Go wash yoaself seven times in da Jordan Riva. Den you goin come all good again.’

Naaman wuz bum out. He tell: ‘I wen tink dis prophet wuz goin call out to his God, wave his hands all ova me, an jus make me come all betta. But no! He tell me fo go jump in some riva in Israel. We get way moa betta rivas back in Syria. How come I no can jus go dea?’ Naaman wen get huhu, an wen leave Elisha’s house.

Naaman’s worka guys wen help him fo tink strait. Dey tell him: ‘Eh boss, we kno you would do anyting fo feel betta. Wat dis prophet tell you fo do iz ony manini. Try go chance um!’ Naaman lissen dem. He wen go to da Jordan Riva an wen go unda da watta seven times. Afta da seventh time, Naaman wen come up out of da watta all betta. He wuz so tankful, an he wen go back to Elisha fo tell him mahalos. Naaman tell: ‘Now I kno fo shua dat Jehovah iz da ony tru God.’ Ho, how you tink da litto Israel girl wen feel wen Naaman had come back all betta?