Wen Jesus Wuz Young

Joseph an Mary wen live Nazaret town wit Jesus an dea odda kids. Joseph wen take kea of his ohana by working az one carpenta, an he wen teach dem about Jehovah an his Rules. Da ohana wen go da synagogue on da regula fo worship. An ery year dey go to Jerusalem fo da Passova.

Wen Jesus wuz 12 years ol, his ohana make da long trip to Jerusalem like dey do ery year. Da town wuz packed wit peopo who had come fo celebrate da Passova. Afta dat wuz pau, Joseph an Mary start fo head home, an dey wen tink Jesus wuz wit dem. But wen dey check wit all dea ohana, dey no could find him.

So dey wen go back to Jerusalem, an fo 3 days dey wuz looking fo dea boy. Da las place dey wen check wuz Da Tempo. Ova dea, he wuz sitting wit da Jew teachas, lissening to dem, an asking dem stuff. Da Jew teachas wen see dat Jesus wuz so akamai, dey wen start fo ask him questions. His ansas wen blow dea minds. Dey could see dat he wen undastan Jehovah’s Rules real good.

Wen Joseph an Mary find Jesus, Mary tell, ‘My boy, we wuz looking all ova fo you. We wuz so worried! Wea you wuz?’ Jesus tell, ‘You neva kno I wuz goin be in my faddah’s house?’

Jesus wen go back home to Nazaret wit his parents. Joseph wen teach him how fo be one carpenta. Wat kine guy you tink Jesus wuz wen he wuz young? Az he get olda, he come moa an moa smart. Jehovah an da peopo love him even moa.