We Can Have Full On Trus Befo Da World Come Pau

Pretty soon, Jehovah goin stop givin peopo in dis world chance. False religion goin get smash, an one bunch of govaments goin go agains God’s peopo, an Jehovah goin wipe out all da bad peopo at Armageddon. Us guys no can wait fo dese mayjah, awesome tings fo happen.

Fo shua, we donno ery single ting dat goin happen wen da big trouble come. Like, we donno wen goin start. We donno wat goin make da govaments go agains all da religions. We donno how long dis attack on God’s peopo goin las, o even how dey goin do um. An we donno exackly how Jehovah goin wipe out all da bad peopo at Armageddon.

But, we do know dat da Bible give us erytin we need fo stay solid an no be sked fo wat stay comin in da future. Like, we know we stay livin at da time “befo da world goin come pau.” (2 Tim 3:1) We know dat wen da govaments attack all da religions, God goin make dat time “mo short” so da one an ony fo real religion no goin come wipe out. (Mat 24:22) We know dat Jehovah goin get his peopo outa trouble. (2 Pet 2:9) We even know da One Jehovah goin use fo wipe out da bad peopo an save da uku plenny peopo at Armageddon. An dat One fo shua get da mana fo do dis, an erytime do wass right.​—Jesus Show 19:11, 15, 16.

Da stuffs dat goin happen in da future, goin make peopo feel like dey goin “pass out cuz dey so sked.” But wen we read an tink hard about how Jehovah wen save his peopo befo time, an wat he tell goin happen bumbye, we can “stan up tall an look up,” cuz we goin full on trus dat Jehovah goin save us.​—Luk 21:26, 28.