LIVE JALIKE JESUS
Make Ready Now Fo One Medical Kine Emergency
How come gotta make ready? Medical kine emergencies o endin up in da hospital can happen just lidat an outa no wea. Dass why az good fo make ready an use all da stuff dat Jehovah give fo help us, so if sometin lidat wuz fo happen, you can get da bestes kine healt kea out dea. Wen you do dat, you show respeck fo life an wat Jehovah tell about blood.—Jesus Guys 15:28, 29.
Wat kine tings you can do fo make ready?
You can fill out one durable power of attorney (DPA) card, an wen you fill um out, take yoa time an pray about um.a You can get one DPA card if you one baptized preacha, an one Identity Card (ic) fo all yoa keiki dat stay unda 18 from da bradda who take kea da books an stuff fo yoa local hui.
If you hapai, aks yoa eldas fo one copy of Information for Expectant Mothers (S-401). Dis goin help you fo make good kine choices wen come to medical stuffs dat might happen wen you stay hapai o givin birt.
If you gotta have one surgery o sometin else medical wea blood come up o you gotta stay in da hospital, let yoa eldas know befo dat happen. An let da hospital know dat you like one Witnesses Fo Jehovah minista come visit you.
How da eldas kokua? Dey can help you fill out yoa DPA card. But, wen come to medical kine stuff, da eldas not goin choose fo you o tell you wat dey tink about stuff dat you gotta choose fo yoaself. (Rome 14:12; Gal 6:5) Wen you tell yoa eldas dat you goin thru sometin medical wea blood might come up, right away dey goin let da Hospital Liaison Committee (HLC) know fo you.
How da HLC kokua? Da braddas on top da HLC stay trained fo help da hospital an da court guys fo undastand wat we believe az Witnesses Fo Jehovah wen come to blood. Dey can go ova diffren kine medical ways wit yoa docta so you no need take blood. An if gotta, dey can help you find one docta who goin like work wit you.
WATCH UM DA VIDEO HOW FO CHOOSE WAT FO DO WEN COME TO BLOOD, AN DEN ANSA DIS QUESTION:
Wat you wen learn from dis video dat kokua you fo make ready fo one medical kine emergency wen blood come up?
a Lesson 39 in da You Can Live Good Foeva! book can kokua you fo choose wat fo do wen come to medical kine stuff an blood come up.