How Fo Kokua Afta One Disasta

Nowdays, get moa an moa natural kine disastas. Wen one disasta hit, da kokua fo dose ova dea gotta be setup in one good kine way so dat erytin go smooth. Dass why, da Jesus’ Luna Guys wen make um so every branch get one Disasta Kokua Departmen.

Wen da braddas who take kea dis departmen hea about one disasta, right den an dea dey get a hold of da eldas ova dea fo see wat kine kokua da braddas an sistas need. If erytin stay moa buss up den da local braddas can hando, da branch goin sen out braddas an give dem da kuleana fo be in charge of da kokua. Sometimes, dese braddas might aks fo guys who like help o even aks fo certain kine stuffs. O maybe dey gotta buy an give out stuffs da guys ova dea need.

Get choke good tings dat come out wen we do um lidis. Like, not goin have double work o make tings harda. An not goin wase money o odda kine stuffs dat can happen sometimes wen da braddas try fo do hando um on dea own.

Da braddas dat da branch wen pick can figga out how much kala need an how much guys goin need fo da kokua. Dey can get fo know da local govament guys cuz sometimes dey can help us get da disasta kokua moa fasta. So no try fo go on yoa own fo colleck money, send stuffs fo kokua, o even go wea da disasta stay unless dey aks you.

But fo reals, wen one disasta hit, we like kokua. (Heb 13:16) Ony choke love an aloha we get fo oua braddas an sistas! So wat us can do? Da mos importan ting iz pray fo da guys who wen get hit by da disasta an fo da guys dat kokua dem. Anodda ting we can do fo kokua iz give oua monies to da worldwide work fo God’s hui. Da branch guys know how fo use da monies in da bestes kine way cuz dey follow wat da Jesus’ Luna Guys tell. If we like help in person kine, den fill out one Local Design/​Construction Volunteer Application (DC-50).

WATCH UM DA VIDEO, FLOODS DAT WEN BUSS UP BRAZIL, AN DEN ANSA DIS QUESTION:

Wat you wen like about da disasta kokua Witnesses Fo Jehovah wen give in Brazil afta da floods in 2020?