Witnesses Fo Jehovah Get Rules Fo Dating?

Witnesses Fo Jehovah believe da tings da Bible tell goin help us make choices dat make God happy an stay good fo us. (Isaiah 48:17, 18) We neva make up dese rules an truts, but we do live by um. Try see how some of dese conneck to dating.a

• One marriage suppose to las foeva. (Matthew 19:6) Witnesses Fo Jehovah take dating serious cuz dass da firs step fo get married.

• Dating stay ony fo dose old enuff fo get married. Dese ones had pass da time wen you young an ony tink bout sex.​—1 Fo Da Corint Peopo 7:36.

• Peopo dat date should be free fo get marry. Jus cuz someone get one legal divorce, dat no mean dey free fo get marry again in God’s eyes. Da Bible tell dat you can ony get divorce cuz somebody wen fool aroun.​—Matthew 19:9.

• Da Bible tell dat Christians who like get married gotta choose somebody dat believe da same stuff. (1  Fo Da Corint Peop 7:​39) Witnesses Fo Jehovah believe dis mean not jus somebody who respeck yoa beliefs, but somebody who stay baptize an do wat God tell. (2 Fo Da Corint Peopo 6:14) God wen tell his peopo fo ony marry da peopo dat worship Him. (Da Start 24:3; Malakai 2:11) Odda guys dat study marriage tell dat following dis iz good fo do.b

• Children gotta lissen to dea parents. (Smart Guys 1:8; Fo Da Colosse Peopo 3:20) Kids dat still live at home gotta lissen to dea parents rules about dating. Dis can be how old dey gotta be fo start dating an wat tings dey can do.

• Witnesses use da Bible fo help dem choose if dey goin date an who dey goin date. Dis match up wit da Bible trut, “erybody gotta take kea dea own kuleana.” (Fo Da Galatia Peopo 6:5, NWT) Still yet, plenny ask fo advice from solid braddahs an sistahs dat like help dem.​—Smart Guys 1:5.

• Plenny tings peopo do wen dey date actually stay one mayjah sin. Fo exampo, da Bible tell us fo no do pilau kine sex. Dis not ony talking about having sex, but even odda pilau tings between peopo dat no stay married, like playing wit anodda persons private pahts or having oral or anal sex. (1 Fo Da Corint Peopo 6:9-11) Even doin tings dat make you like have sex, almos to da point dat you do um, God no like dat. (Fo Da Galatia Peopo 5:19-21) Da Bible tell us fo no even talk story about pilau kine tings.​—Fo Da Colosse Peopo 3:8.

• Da way we feel inside no stay right all da time. (Jeremiah 17:9) It can make somebody do someting dey kno iz bad. Fo no let dea feelings take ova, couples dass dating gotta make shua dey no stay alone in one place dey could fool aroun. Would be good fo dem go out in one group wit solid peopo or wit somebody dey trus fo watch ova dem. (Smart Guys 28:26) Single Christians dat like get married gotta kno dat dating websites can be dangerous, speshly wen you start fo get feelings fo somebody you donno.​—Songs Fo God 26:4.