One Promise To Jehovah

Aroun two monts afta dey wen leave Egypt, da Israel peopo wen come Mount Sinai an make camp ova dea. Jehovah wen call Moses fo come up da mountain. Up dea, God wen say: ‘I had save da Israel guys. If dey lissen me an do wat I tell, dey goin come my spesho peopo.’ So Moses had go back down da mountain an tell da peopo wat Jehovah had say. How dey wen reack? Dey tell: ‘Eryting Jehovah say, we goin do um!’

So, Moses wen go back up da mountain again. Den Jehovah tell um: ‘I goin talk to you in three days. So tell da peopo dat dey betta not come up da mountain.’ Moses wen go down an tell da Israel peopo fo make ready fo hea wat Jehovah goin say.

Three days layta, da Israel peopo wen see lightning an one dark cloud ova da mountain. Same time, dey wen hea tunda an one horn blow. Den Jehovah wen come down da mountain in one fiyah. Da whole mountain wen shake plenny an had smoke erywea. Da horn got louda an louda. Da Israel peopo wuz so sked dey wuz shaking. Den Jehovah tell: ‘I Jehovah. No go worship any odda gods.’

Moses wen go back up da mountain. Ova dea, Jehovah wen give da rules on how fo ack an worship him. Moses wen write um down an den read um to da Israel peopo. Den da peopo say: ‘We goin do eryting Jehovah tell us fo do.’ Dis wuz one promise dey had make wit God. So wat, you tink dey wuz goin keep dea promise?