Jehovah Wen Pick Joshua

Afta he wen lead Israel fo long time, Moses wuz about fo mahke. Jehovah wen tell him: ‘You not da one who goin bring da Israel guys to Da Promise Land. But I goin let you see um.’ Den Moses wen ask Jehovah fo choose one new leada fo take kea da peopo. Jehovah tell um: ‘Go by Joshua an tell him dat he da one.’

Moses had tell da peopo he wuz goin mahke an dat Jehovah wen pick Joshua fo bring dem to Da Promise Land. Den Moses wen tell Joshua: ‘No be sked. Jehovah goin help you.’ Right afta dat, Moses wen go up Mount Nebo. Ova dea, Jehovah had show him da land dat He wen promise to Abraham, Isaac, an Jacob. Moses wuz 120 years ol wen he had mahke.

Jehovah wen tell Joshua: ‘Go across da Jordan Riva an go Canaan. I goin help you jus like I wen help Moses. Make shua you read my Rules ery day, an do wat I tell you fo do. No be sked an be brave.’

Joshua wen sen two spies fo check out Jericho, one big town. In da nex story, we goin learn moa about wat had happen ova dea. Wen da two spies come back, dey wen say wuz one good time fo go Canaan. Da nex day, Joshua wen tell da nation fo break down camp. Den he wen make da prieses dat carry Da Box go in fron erybody to da Jordan Riva. Da riva wuz flooding. But right wen da prieses feets touch da wattah, boom, da wattah wen stop flowing! Da prieses stan right in da middo of da riva an all da Israel peopo walk ova to da odda side. You tink dis miracle had remind dem of wat Jehovah wen do at da Red Sea?

Ho, afta all dat time, finally da Israel guys wen make um to Da Promise Land! Dey could build houses an big kine towns. Dey could plant all kine stuffs. Da land, ery place get plenny milk an honey.