Jehovah Proteck Jehoshafat

Jehoshafat, da king fo Judah, had get rid of all da Baal altars an idols inside da land. He wen like erybody fo kno wat Jehovah’s rules wuz. So he send out da Levi guys an princes fo teach um to all da peopo.

Da peopo dat live close by Judah wuz sked fo attack dem cuz dey wen kno Jehovah wuz backing his peopo up. Dey even wen bring presents fo King Jehoshafat. But den da guys from Moab, Ammon, an Seir side wen come fo fight Judah. Jehoshafat wen kno he had need Jehovah fo help him. So right away he had call togedda all da guys, wahines an kids fo come Jerusalem. He wen pray in fron all of dem: ‘We no can win witout yoa help Jehovah. Try tell us wat fo do, cuz we donno!’

Jehovah wen ansa da praya: ‘No be sked. I goin help you. Stan yoa groun an trus me, an watch how I goin get you outa dis.’ So how Jehovah had save dem from dis trouble?

Da nex morning, Jehoshafat wen pick singas an tell dem fo go in fron da army. Dey wen march from Jerusalem to da Tekoa boonies fo fight ova dea.

On da way dea da singas wuz belting out good tings to Jehovah. All dat time, Jehovah wuz fighting fo his peopo. He wen throw off da Ammon an Moab guys, so dat dey wen start fo turn on each odda an wipe each odda out. All of dem wen mahke. But Jehovah wen make shua dat da soliders, da prieses an da Judah peopo wuz safe. Wen all da neighba countries close by had hea wat Jehovah wen do, dey wen kno fo shua Jehovah wuz protecking his guys. How Jehovah save his peopo? In all kine ways. He no need humans fo help him.