Jehovah Wen Sen Jeremiah Fo Preach

Jehovah pick Jeremiah fo be his prophet fo da Judah peopo. He tell him fo preach to da peopo an warn dem dey gotta stop doin pilau tings. Jeremiah tell Jehovah: ‘But how can, I ony one young guy! I donno how fo talk to da peopo.’ Jehovah tell him: ‘No sked. I goin give you da words fo say. I goin be dea wit you.’

Jehovah tell Jeremiah fo get all da eldas togedda, an smash one clay jar right in fron of dem, an tell: ‘You see dat clay jar, dass how Jerusalem goin be.’ Wen Jeremiah wen do wat Jehovah tell, da eldas got all mad. Pashhur, one pries guy, buss up Jeremiah an throw him in some wooden shackles. Da whole night, Jeremiah no could move. Ony da nex morning, Pashhur let him out. Jeremiah tell: ‘I had it awready. I not goin go preach anymoa.’ You tink he wen really give up? Nope. Afta Jeremiah had tink about it some moa, he tell: ‘Wat Jehovah tell stay like one fiyah dat burn inside me. I no can stop preaching.’ So Jeremiah keep warning da peopo.

Some years layta, Judah had one new king. Da prieses an da fake prophets wen hate wat Jeremiah wuz preaching. Dey tell da princes: ‘Dis guy gotta mahke! Jus kill him awready!’ Jeremiah tell: ‘If you kill me, you goin kill one guy dat neva do notting wrong. Da tings I tell come from Jehovah, not me.’ Afta da princes hea dat, dey tell: ‘No moa one reason fo kill him.’

Cuz Jeremiah no stop preaching, da princes come all wild. Dey go ask da king fo kill Jeremiah. Da king wen tell dat dey can do wateva dey like to him. So dey grab Jeremiah an throw him into one deep watta hole dass full of mud, hoping he goin mahke in dea. Jeremiah start fo sink deep into da mud.

But den, Ebed-melech, one of da palace guys tell da king: ‘Da prince guys wen throw Jeremiah in one watta hole! If we do notting, he goin mahke!’ Da king tell Ebed-melech fo take 30 guys wit him an pull Jeremiah outa da hole. Jeremiah neva let notting stop him from preaching. We like copy him, yeah?