Gabriel Go See Mary

Now Elizabet wuz six monts hapai wen da angel Gabriel wen go see one wahine name Mary, who wuz family wit Elizabet. Mary wen live in Nazaret town in Galilee, an wuz engaged to one carpenta name Joseph. Da angel Gabriel tell, ‘Aloha Mary, Jehovah wen pick you.’ But she neva undastan wat Gabriel wen mean by dat, so he tell her, ‘You goin come hapai an born one boy, an you goin name him Jesus. He goin come one King an his Govament goin rule foeva.’

Mary tell, ‘How I can come hapai, I neva sleep wit one guy?’ Gabriel say, ‘Notting too hahd fo Jehovah. God goin use his spesho spirit an you goin have one boy. You kno yoa ohana Elizabet, she hapai too.’ Den Mary tell, ‘I one worka fo Jehovah. Do to me like you wen tell.’

Mary wen go to one town in da hills fo visit Elizabet. Wen Mary tell aloha to her, Elizabet feel da bebe jump in her opu. Da spesho spirit make Elizabet tell, ‘Ho Mary, Jehovah wen bless you. Iz so spesho fo have da maddah of da Messiah in my house.’ Den Mary say, ‘I like tell how awesome Jehovah stay. Cuz dass how I feel inside.’ Mary wen stay Elizabet house fo three monts. Den she go back home to Nazaret.

Wen Joseph find out dat Mary wuz hapai but no wuz from him, he neva like marry her anymoa. But one angel wen go visit him in one dream an tell, ‘No be sked fo marry her. Mary neva do notting wrong.’ So Joseph marry her.