Letta From Jesus Luna Guys

Aloha Braddahs an Sistahs:

Us Witnesses Fo Jehovah, we love God’s Word, da Bible. We kno fo shua dat eryting it tell stay right on wen come to history, it help us live one good way, an show proof dat Jehovah love erybody on eart. (Songs Fo God 119:105; Luke 1:3; 1 From John 4:19) We really like help odda peopo learn da supa good Bible truts dat stay in God’s Word. Dass why we supa happy fo give you guys dis book, “Wat You Can Learn From Da Bible Stories.” We like tell you a litto bit about um.

We wen make dis book mostly fo da keiki. But, you can use um fo help da olda guys who like learn da Bible too. An since da Bible iz one book for erybody, fo shua goin be good fo all of us go ova wat we can learn from um, cuz dat goin help us be fo real kine happy.

Dis book wen use da stories from da Bible fo tell about wen God had make da firs ohana, an wat wen happen afta dat. We wen try oua bes fo make shua dat dese Bible stories iz clear an simpo, an az much az can, in da right order.

But dis book no jus tell Bible stories. Da words an pichas wuz made fo bring da stories to life an show da feelings of da peopo we stay reading about.

Dis book help us fo see how da Bible iz one book about peopo—da guys who lissen Jehovah an da guys dat neva. An it helps us fo learn from dea exampos. (Fo Da Rome Peopo 15:4; 1 Fo Da Corint Peopo 10:⁠6) Dis book get 14 pahts. Da start of each paht tell us wat some of da main tings we goin learn in dea.

If you one maddah or faddah, go read da story wit yoa keiki an talk about da pichas. Den you guys can read da scripchas wea da story stay. Help yoa keiki undastan wat dey read in da Bible wit da stories in da book. You can do um da same way wen you trying fo help one olda guy too.

We hope dis book help all da guys who get one good heart dat like get fo kno God—young an makule—fo learn from da Bible an use um in dea life. Cuz doin dat, dey can worship him an be paht of his loving ohana.