LESSON 13
How False Religion Bulai About God
God erytime get love an aloha fo erybody. Dass how he stay. So how come da religions dat tell dey rep him do plenny pilau kine stuffs? Wat dey tell an wat dey do bulai about God. Dass why az all false religion dat. How dey bulai about him? How he feel about um? An wat he goin do about um?
1. How false religion bulai about God by wat dey teach?
False religion “wen throw out da true stuffs from God, an keep da bulaia kine stuff.” (Fo Da Rome Peopo 1:25) Try tink, mos religions neva teach dea guys wat God’s name stay. Da Bible tell gotta use God’s name. (Fo Da Rome Peopo 10:13, 14) Some religious leada guys tell wen someting bad happen, az God’s fault dat. But dass one bulai. God neva da one dat make bad stuffs happen. (Read um From James 1:13.) Religious kine bulais make um hard fo peopo love God. Dass sad, aah?
2. How false religion bulai about God by da stuff dey do?
Da way false religion treat peopo an da way Jehovah treat peopo, not da same. Da Bible tell dat all da bad kine stuff false religion wen do az “real plenny, jalike dey stack up to da sky.” (Jesus Show 18:5) Fo long time awready, religions wen make niele in wat da govaments do, back um up in wars, tell az ok fo kill choke peopo, an even kill peopo demselfs. Some religious leada guys, dey greedy buggahs. Dey like be rich so dey tell dea guys fo give dem kala. Da kine stuffs dat dey do show dat dey no even know God, so how dey get da right fo rep him?—Read um 1 From John 4:8.
3. How God feel about false religion?
If da kine tings false religion wen do make you all nutz, how you tink Jehovah feel? Jehovah, he love peopo but he stay real huhu wit da religious leada guys who bulai about him an who make any kine to dea guys. He promise dat false religion goin come wipe out an “nobody goin eva see um no moa!” (Jesus Show 18:21) Pretty soon, God goin make um so dat all false religion goin be pau.—Jesus Show 18:8.
DIG MOA DEEP
Us go look moa about how God feel about false religion. Learn some moa about wat dey wen do an how come az good fo keep getting fo know Jehovah even tho dey wen do dis kine stuff.
4. God no like all kine religion
Plenny peopo believe dea religion az jalike plenny diffren roads but all dem take you to God. Dass true o wat? Read um Matthew 7:13, 14, an den talk story about dis question:
Wat da Bible tell about da road dat take you to life?
Play um da VIDEO, an den talk story about da question afta.
Da Bible tell dat get plenny religions dat pono wit God o wat?
5. False religion no show da same kine love an aloha jalike God
Religions bulai about God in plenny diffren kine ways. One way dey wen show dis is dat dey stay wrap up in wars. Fo see one of da ways, play um da VIDEO. An den talk story about da questions afta.
Wat plenny churches wen do wen had World War II?
How you feel about wat dey wen do?
Read um John 13:34, 35 an 17:16. Den talk story about dese questions:
How you tink Jehovah feel wen religions stay wrap up in war?
Plenny bad tings dat wen happen, dass cuz of false religion. Wat kine ways you wen see dat show false religion no moa da same kine love an aloha jalike God?
False religion no moa da same kine love an aloha jalike God
6. God like help peopo dig out from false religion
Read um Jesus Show 18:4,a an den talk story about dis question:
How make you feel inside fo know dat God like help da peopo dat false religion wen bulai?
7. Keep on learning about da true God
False religion goin change da way you tink about God o wat? Try tink about one boy. His faddah real akamai but he no like lissen wat da faddah try fo tell um. Da boy move out an live one jam up life. Da faddah no like all da tings da boy stay doing. How come no make sense fo blame da faddah fo da jam up life da boy live?
Make sense fo blame Jehovah an stop learning about him cuz of wat false religion wen do o wat?
WAT SOME PEOPO TELL: “I no kea about God cuz religion da one dat make all da problems.”
You feel lidat o wat?
Da stuffs false religion wen do, dat goin change how we tink about Jehovah o wat?
WAT WE WEN TALK ABOUT
False religion wen bulai about God by da bulai tings dey tell an da pilau tings dey do. God goin wipe out false religion.
Wat You Wen Learn
How you feel about wat false religion wen teach an how dey wen ack?
How Jehovah feel about false religion?
Wat God goin do to false religion?
LEARN SOME MOA
Mos religions do two tings dat God no like.
“Religions Dey All Da Same? Dey All Bring You To God?” (Web article)
How come Jehovah like us worship him togedda wit odda peopo?
One pries neva like da tings his religion was doing. But he neva give up trying fo learn da trut about God.
Fo long time awready, religions tell bulais dat make like God is mean an no kea. Find out da trut about three of dose bulais.
“Bulais Dat Make Um Hard Fo Love God” (Da Place Fo Watch From, Novemba 1, 2013)