LESSON 51

How You Can Make Jehovah Happy Wit Da Way You Talk?

Printed Edition

Jehovah wen make us so we can talk. Dass one awesome gif from him. He kea about da way we use dat gif o wat? Fo shua! (Read um From James 1:26.) So how we can make Jehovah happy wit da way we talk?

1. How we can use Jehovah’s gif in one good kine way?

Da Bible tell us fo “give each odda good kine words, an help each odda come mo solid inside.” (1 Fo Da Tessalonika Peopo 5:11) You know anybody who need good kine words? Wat you can do fo make dem feel betta? Tell dem you kea about dem. Maybe you can tell um wat you like about dem. You can tink of one scripcha dat can make dem feel good? Get plenny scripchas you can use. An no foget, how you say someting is jus az importan az wat you say. So den, always try fo talk in one nice kine way.—Smart Guys 15:1.

2. How we not suppose to talk?

Da Bible tell: “No go talk pilau kine stuff notting.” (Read um Fo Da Efesus Peopo 4:29.) Dis mean dat we no goin use bad kine words, o say someting dass not nice, o rude fo hurt somebody’s feelings. An we gotta stay away from talking stink an no bulai about somebody.—Read um Smart Guys 16:28.

3. Wat goin help us talk in one way dat goin make oddas feel good inside?

Plenny times, wat we talk about show oddas how we really feel an wat we tink about. (Luke 6:45) So we gotta learn fo tink about tings dat stay pono, no stay pilau, wat you get love an aloha fo, an tings dass good. (Fo Da Philippi Peopo 4:8) Fo tink about dese tings, we gotta be akamai about wat we choose fo do fo fun an who oua frenz stay. (Smart Guys 13:20) We can even stop fo take time fo tink about wat fo say befoa we say um. Try tink how oddas goin feel about wat you tell. Da Bible tell: “Some peopo talk, but dey no tink firs. Az jalike dey stab you wit one knife. But da peopo dat know wat fo do erytime, wen dey talk, make peopo feel mo betta.”—Smart Guys 12:18.

DIG MOA DEEP

Learn how fo talk in one way dat make Jehovah happy an make oddas feel good inside.

4. Control how you talk

Goin get times we goin tell someting we wish we neva. (From James 3:2) Read um Fo Da Galatia Peopo 5:22, 23 an den talk story about dese questions:

Which tings you can pray fo dat can help you control how you talk? How dese tings can help you?

Read um 1 Fo Da Corint Peopo 15:33, an den talk story about dis question:

How yoa frenz an wat you choose fo do fo fun can change da way you talk?

Picha: Tings dat make one husban talk pilau to his wife. 1. He listen to angry music. 2. He all fired up watching one boxing match on TV wit his fren. — Wat can change da way you talk?

Picha: Tings dat make one husban talk nice kine to his wife. 1. He read da Bible. 2. Him an his wife talk wit one fren at da Meeting Place. — Wat can change da way you talk?

Read um Da Teacha 3:1, 7, an den talk story about dis question:

Wen can be smart fo no say notting, o wait fo layta fo say someting?

5. Tell good kine tings about oddas

How we can no hurt oddas o say mean kine tings? Watch um da VIDEO, an den talk story about da questions afta.

VIDEO: Tell “Ony Good Kine Stuff Dat Goin Help Peopo Come Moa Strong Inside” (4:07)

In dis video, how come da braddah wanted fo change da way he talk about oddas?
Wat he wen do fo change?

Read um Da Teacha 7:16, an den talk story about dis question:

Wat we gotta rememba wen we really like talk stink about somebody?

Read um Da Teacha 7:21, 22, an den talk story about dis question:

How dese verses can help you fo no get huhu wen somebody talk stink about you?

6. Talk nice to yoa ohana

Jehovah like us fo talk nice wit oua ohana, wit love an aloha. Watch um da VIDEO, an den talk story about da question afta.

VIDEO: Love An Respeck Bring Da Ohana Togedda (3:08)

Wat goin help you fo talk nice kine to yoa ohana?

Read um Fo Da Efesus Peopo 4:31, 32, an den talk story about dis question:

How we can talk to oua ohana in one way dat make dem feel good inside?

Jehovah wen say how he wen feel about his Boy, Jesus. Read um Matthew 17:5, an den talk story about dis question:

How you can copy Jehovah in da way you talk to yoa ohana?

One maddah telling her daughtah good job afta she pau make one drawing. — Look fo times wea you can give oddas good kine words

WAT SOME PEOPO TELL: “I say wateva I tink. If odda peopo no like wat I tell, dass dea problem.”

You feel da same way o wat? How come?

WAT WE WEN TALK ABOUT

Wat we tell can help o hurt peopo. We gotta tink good about wat we say, wen we say um, an how we say um.

Wat You Wen Learn

Wat some ways you can help oddas by da way you talk?
Wat kine talk you like stay away from?
Wat can help us fo always talk in one nice kine way an make oddas feel good inside?

Wen da lesson pau:

Someting Fo Do

Dis week, try tell somebody in yoa ohana o in da local hui wat you love about dem.

Wat else you like do:

Wat else you like do

LEARN SOME MOA

Wat can help us fo talk in one way da make oddas feel good inside?

Develop the Tongue of the Wise Ones (8:04)

Try learn wat can help you fo no talk pilau.

“Is Cursing Really That Bad?” (Web article)

Try look how you can stay away from da trap of talking stink about oddas.

How Can I Stop the Gossip? (2:36)

Try look how Jehovah wen help one man who had hard time fo stop swearing.

“I Began to Think Seriously About Where My Life Was Headed” (The Watchtower, August 1, 2013)