God Feel Fo You?

WAT GOD WEN MAKE TEACH US

Somebody dat feel fo oddas try fo put demselfs in somebody else’s slippas fo undastan wat dey goin tru an how dey feel. Dr. Rick Hansen, who study plenny about mental-healt, tell dat “we wuz all made fo be able fo feel fo oddas.”

TRY TINK: How come ony humans can feel fo oddas? Da Bible tell dat God wen make humans jalike him. (Da Start 1:26) Cuz we made like him, we can copy how he stay an try fo show his good kine qualities. So wen we feel fo oddas an try fo help dem, we stay copying Jehovah God, da One dat wen make us.—Smart Guys 14:31.

WAT DA BIBLE TEACH US ABOUT HOW GOD FEEL FO US

God feel fo us an he hate fo see us suffa. Da Israel peopo from long time ago wen suffa az slaves in Egypt an den dey wen spen 40 years in da boonies an had real hard time. Da Bible tell how God wen feel fo dem, “Erytime his peopo suffa, he suffa too.” (Isaiah 63:9) Can see dat God neva jus kno wat dey wuz goin tru, he wen feel dea pain too. He tell, “I know how plenny dey suffa.” (Outa Egypt 3:7) “Da one dat hurt you guys . . . poke da middo a [my] eye,” God tell.” (Zekariah 2:8) Wen oddas hurt us, it make Jehovah’s heart soa.

Maybe we tink we not good enuff or deserve fo have God feel fo us. But da Bible help us fo see, “God mo big den how us guys feel inside. He know eryting bout us guys!” (1 From John 3:19, 20) God kno us moa betta den we kno ouaself. He kno eryting we goin tru, how we tink, an how we feel. He feel fo us.

Da Scripchas help us kno fo shua

• “Den you guys goin call, an Da One In Charge goin hear dat an do someting. You guys goin yell fo help, an he goin tell, ‘I stay right hea!’”—ISAIAH 58:9.

• ““Cuz me, I know da plans dat I stay make fo you guys. I goin make eryting come good fo you guys, an not bad. I goin make good kine stuff happen to you guys bumbye, da good kine stuff you stay wait fo.” Dass da message from Da One In Charge! Wen you guys call out to me fo me come help you, an pray to me, den I goin lissen you guys.””—JEREMIAH 29:11, 12.

• “Put my tears inside yoa watta bag . . . Fo shua all dis stay inside yoa book.”—SONGS FO GOD 56:8.

GOD SEES, UNDASTANS, AN FEEL FO US

You tink knowing dat God feel fo us can help us get tru hard times? Try look wat wen happen to Maria:

“I wen feel like life no wuz fair an I had real hard time afta I had lose my 18 year old boy afta his two year fight wit cancer. I wuz so mad wit Jehovah cuz he neva step in an make him betta!

“Six years layta, I wen tell one fren from da congregation dat I wen feel like Jehovah neva love me. She wen lissen to me talk fo hours, den she wen share one scripcha wit me dat wen touch my heart. It wuz 1 From John 3:19, 20, dat tell, “God mo big den how us guys feel inside. He know eryting bout us guys!” She wen help me fo see dat Jehovah undastans oua pain.

“But still yet, it wuz hard fo me cuz I wuz still mad! Den I had read Songs Fo God 94:19, dat tell, “Wen I tink bout tings dat bodda me plenny, you make me feel shua notting bad goin happen.” I wen feel like dese scripchas wuz written jus fo me! An ova time I wen feel moa betta cuz I wen talk to Jehovah about eryting I wuz goin tru, an I know dat he lissen an undastan me.””

Iz so good fo kno dat God undastans an feel fo us! But den, how come get so much suffaring? Dis God’s way fo punish us fo da bad tings we do? God goin do anyting fo stop all da suffaring? We goin ansa dese tings in da res of dis magazine.