No Give Up, Jalike Peter

1. How Peter wen reack wen he wen see all da fish dey wen catch?

PETER was fishing all night an neva catch notting. Funny tho, Jesus wen tell um, “Go out wea stay deep an lay yoa nets.” (Luk 5:4) Peter wen figga no way dey was going catch anyting, but still yet, he wen do um. Dey started fo catch so much fish dat da nets wen rip open. Peter an da guys working wit him, wen “blow dea mind” wen dey saw dis miracle Jesus wen do. Peter wen tell, “Eh, Boss, go way from me, cuz I one guy dat stay do bad kine stuff!” (Luk 5:​6-9) Peter wen feel like he neva deserve fo be aroun Jesus.

2. How come az good fo learn about Peter?

² Peter was “one guy dat stay do bad kine stuff.” Da Bible tell dat sometimes he wen say an do tings he wen feel bad about afta. You feel lidat sometimes? Get someting about da way you ack dat you trying fo fix? O you trying fo get ova someting you struggle wit fo long time awready? If dass you, you can feel betta from studying about Peter. How come? Try tink, all da mistakes Peter wen make, Jehovah coulda lef um outa da Bible. But he put um inside dea so dat we could learn someting from um. (2 Tim 3:16, 17) Wen we learn about da tings Peter had hard time wit an how he wen feel jalike us, we see dat Jehovah no expeck us fo be perfeck. He like us keep trying an no give up even if we struggle.

3. Why we gotta keep trying an no give up?

³ Why we gotta keep trying an no give up? Get one saying dat practice make perfeck. Try tink, would take one musician long time fo masta da guitar. Wen he learning, he going play da wrong chords choke times. But if he keep practicing, he going come betta. Even afta he come real good at playing da guitar, he still going mess up sometimes, but he not going give up. He going keep trying fo get betta. Same ting wit us, even if we tink we doing good wit da stuff we struggle wit, we might jam up again. But we still not going give up working on um. All us say an do tings dat layta on we feel bad about. But if we no give up Jehovah going keep helping us fo get betta an betta. (1 Pet 5:10) We go look how Peter wen keep trying an neva give up. Da pity Jesus wen show him even if he wen jam up sometimes can help us no stop serving Jehovah.

PETER’S STRUGGLES AN BLESSINGS

4. In Luke 5:6-10, wat Peter wen say about himself, but how Jesus wen show trus in him?

⁴ Da Bible no say wat Peter was tinking about wen he sed, “I one guy dat stay do bad kine stuff.” (Read um Luke 5:6-10.) But he probly wen make some mayjah mistakes. Jesus wen know dat Peter was sked, maybe cuz Peter wen feel he no was good enuff. But Jesus wen know dat Peter could stay faithful. So Jesus wen tell Peter, “no sked.” Cuz Jesus wen show trus in Peter, dat wen change his life. Peter an his braddah Andrew wen walk away from dea fishing business fo follow Jesus full-time. Cuz dey wen do dat, Jehovah wen bless dem unreal.​—Mar 1:16-18.

5. Cuz Peter neva let da way he wen feel about himself hold him back from following Jesus, wat kine blessings he wen get?

⁵ Peter wen see some awesome tings cuz he wen follow Jesus. He wen see Jesus make da sick come good, hemo da demons, an even make da dead come alive.b (Mat 8:​14-17; Mar 5:​37, 41, 42) Jehovah wen also let Peter see one picha inside his head about Jesus ruling God’s Govament in da future, someting he neva wen foget. (Mar 9:​1-8; 2 Pet 1:​16-18) Peter neva woulda seen all dat if he neva follow Jesus. He musta been so happy he neva let da way he feel about himself cause him fo miss out on all dese unreal blessings!

6. How we know wen take time fo Peter get ova his struggles wit himself?

⁶ Even wit all da unreal tings dat Peter wen see an hea, he still wen struggle wit himself. Try look some exampos. Wen Jesus wen tell how he was going suffa an mahke like how da Bible wen tell, Peter wen say no ways dat was going happen. (Mar 8:31-33) Plenny times Peter an da odda aposals wen argue about who da numba one guy was. (Mar 9:33, 34) Da night befoa Jesus wen mahke, Peter neva tink an jus wen cut off one guys ear. (John 18:10) Dat same night, Peter was so sked dat three times he wen tell he neva know his fren Jesus. (Mar 14:66-72) Cuz of dat Peter wen cry real hard.​—Mat 26:75.

7. Afta Jesus wen come back alive, wat chance Peter wen get?

⁷ Peter was all bum out, but Jesus neva give up on him. Afta Jesus wen come back alive, he wen give Peter chance fo show dat he still wen love him. Jesus wen invite Peter fo take kea his sheeps. (John 21:15-17) Peter was ready fo do wat Jesus wen tell um. An so he was one of da firs guys fo be pick fo go heaven by God’s spesho spirit in Jerusalem at Pentacost.

8. Wat mayjah mistake Peter had make in Antiok?

⁸ Even afta he wen get pick fo go heaven, Peter still had fo struggle wit himself. In 36 C.E., God wen sen Peter fo go see Cornelius, who wasn’t one Jew. Ova dea God wen pick Cornelius fo go heaven. Dat wen show dat “God treat erybody same same,” an dat guys who no was Jews could be part of da Christian hui. (Jesus Guys 10:34, 44, 45) Afta dat, Peter wen do someting he neva woulda did befoa. He wen start fo go eat wit da guys dat no was Jews. (Gal 2:12) But den some of da Jew Christians wen feel like he wasn’t suppose to eat wit dem. Wen some of da guys dat wen feel lidat wen come Antiok, Peter wen stop eating wit da braddahs dat no was Jews, cuz he was sked of dose Jew Christians. Da aposal Paul wen see wat Peter wen do an wen correck um in front erybody. (Gal 2:13, 14) Even tho Peter wen make dis mistake, he neva give up. Wat wen help him?

WAT WEN HELP PETER FO KEEP GOING?

9. How John 6:68, 69 show Peter was loyal?

⁹ Peter was loyal an he neva let notting stop him from following Jesus. He wen show dat one time wen Jesus wen say someting dat his followas neva undastand. (Read um John 6:68, 69.) Plenny of dem wen bag from Jesus witout waiting fo him explain wat he wen mean. But not Peter. He wen know dat Jesus was da ony one dat could tell “how fo live to da max foeva.”

10. How Jesus wen show he trus Peter? (Go look da picha.)

¹⁰ Jesus neva give up on Peter. On da las night dat he was alive on da earth, Jesus wen know dat Peter an da odda aposals was going dig out on him. Still yet, Jesus wen trus dat Peter was going come back to him an stick wit him, an he wen let um know dat. (Luk 22:31, 32) Jesus knew dat his “guys like do da right ting, but . . . [his] guys no stay strong inside.” (Mar 14:38) But even afta Peter wen make like he neva know Jesus, Jesus neva give up on him. Afta Jesus wen come back alive, he wen visit Peter wen he was by himself. (Mar 16:7; Luk 24:34; 1 Cor 15:5) Ho dat musta made Peter feel so good afta bein all bum out!

11. How Jesus wen show Peter dat Jehovah would malama him?

¹¹ Jesus wen show Peter dat Jehovah going malama him. Afta Jesus wen come back alive he wen give Peter an da aposals anodda unreal miracle fo catch choke plenny fish again. (John 21:4-6) Dis miracle wen make um clear dat az ony easy fo Jehovah give um wat he need. Maybe Peter wen rememba wat Jesus wen say about making “God’s govament . . . da mos importan” ting, den he going give you all da stuff you need. (Mat 6:33) All dis wen help Peter make preaching, not his business fo go fish, da main ting in his life. He wen show courage an preach on Pentecost 33 C.E., an dis wen help tousands of guys come into da trut. (Jesus Guys 2:14, 37-41) Afta dat, he wen help da Samaria peopo an da guys who no was Jews fo learn about an follow Christ. (Jesus Guys 8:14-17; 10:44-48) Jehovah wen use Peter in one mean kine way fo bring all kine peopo into his hui.

WHAT WE LEARN?

12. Wat we learn from Peter if we struggle inside fo long time?

¹² Jehovah can help us fo no give up. Can be hard fo keep going, speshly wen inside we get struggles, an we deal wit um long time. Sometimes we tink dat da stuff we struggle wit is moa hard den wat Peter wen go thru. But Jehovah can make us strong so dat we no give up. (Songs 94:17-19) One exampo of dat is one braddah who wen live like one mahu fo long time befoa he wen learn da trut. He wen make up his mind fo change his life an leave all dat behind. But still yet, sometimes he wen struggle wit wanting fo do wrong stuff. Wat wen help him fo no give up an keep going? He wen explain um lidis, “Jehovah give us da strength . . . an wit His spesho spirit, I wen learn I can live da way Jehovah like me live. An no matta I not perfeck, Jehovah still use me an make me strong.”

13. From Jesus Guys 4:13, 29, 31, how we can copy Peter? (Go look da picha.)

¹³ We wen see dat Peter wen make some mayjah mistakes cuz he was sked of peopo. But afta Peter wen pray fo courage, he no was sked fo talk. (Read um Jesus Guys 4:13, 29, 31.) Us too can get ova bein sked. Try look wat wen happen to Horst, one young braddah who live Nazi Germany World War II time. Moa den one time, he wen cave to da presha in school fo say “Heil Hitler!” Radda den scold him, Horst’s parents wen pray wit him an wen ask Jehovah fo give um courage. Wit his parents help an trus in Jehovah, Horst wen get da strength fo stand up to da presha. Layta on he wen say, “Jehovah neva dig out on me.”c

14. How da eldas can kokua da guys who feel all bum out?

¹⁴ Jehovah an Jesus not going give up on us. Afta Peter had bag out on Jesus, he had fo make one hard choice in his life. He was going give up, o keep going an follow Jesus? Jesus wen pray to Jehovah dat Peter no give up an lose his faith. Jesus wen tell Peter dat he wen pray fo him, an he let um know dat he trus dat he was going make his braddahs come strong. (Luk 22:31, 32) It musta made Peter feel so good wen he had rememba wat Jesus sed. Wen we gotta make hard choices in oua life, Jehovah might use da braddahs fo give us wat we need fo stay faithful. (Efe 4:8, 11) One braddah who was one elda fo long time name Paul, wen try kokua da braddahs lidat. He wen ask dem fo tink about how Jehovah wen bring dem to da trut in da firs place. Den he let dem know dat Jehovah going stick wit dem, love dem, an he not going give up on dem. Layta on he wen say, “I seen Jehovah help plenny guys who was all bum out fo no give up an keep going.”

15. How wat wen happen to Peter an Horst show dat Matthew 6:33 is true?

¹⁵ Jalike how Jehovah wen give Peter an da aposals eryting dey wen need, if we make da ministry da main ting in oua life, Jehovah going do da same fo us. (Mat 6:33) Afta World War II was pau, Horst, da braddah we we talk about befoa, wen tink about pioneering. But he was so broke, he neva tink he could make nuff money fo take kea himself an still yet pionea. So wat he wen do? He wen try tes Jehovah out fo see if He really would take kea him, an he wen spend da whole week of da circuit ovaseah visit out in field service. Wen da week was pau, ony shock he was wen da circuit ovaseah wen give um one envelope an neva tell um who was from. Had nuff money inside um fo him pionea fo few months. Horst wen look at dis az one gif from Jehovah letting him know dat He was going take kea him. Fo da res of his life he wen make serving Jehovah da main ting.—Mal 3:10.

16. Why we should look at wat Peter wen write an wen do?

¹⁶ Even tho Peter wen tell Jesus fo go away from him, Peter musta been so happy Jesus neva lissen an dig out on him. Jesus wen keep training Peter fo be one solid aposal an one unreal exampo fo Christians follow. All dat training stay inside da Bible so all us can learn importan lessons from um. Peter wen share some of dose lessons an odda stuffs inside his lettas he wen send to da huis in da firs century. Da nex lesson going talk about some of dose remindas from dose lettas an how we can follow um today.