Be Humbo Wen Get Tings You Donno

1. How Jehovah wen make us, an why?

JEHOVAH wen make us so we can tink, learn new tings, undastan stuff, an use wat we learn. How come he wen make us lidat? So wen we serve Him, we can make good choices from wat we learn in da Bible.​—Smart Guys 2:1-5; Rome 12:1, NWT.

2. (a) Wat we gotta kno about ouaselfs? (Fo Da Rome Peopo 11:33, 34) (Go look da picha.) (b) Why iz good fo undastan dat we no need kno eryting?

² Even tho we can learn plenny, ony get so much we do kno. (Read um Fo Da Rome Peopo 11:33, 34.) Tink about Job. Jehovah wen ask him a bunch of questions dat wen help him undastan he neva kno eryting. Dat wen humbo Job an correck da way he wuz tinking. (Job 42:3-6) Iz good fo us undastan dat we donno eryting too. Dat goin help us stay humbo an trus dat Jehovah goin always tell us wat we need fo kno so we can make good choices.​—Smart Guys 2:6.

3. Wat we goin talk about in dis lesson?

³ In dis lesson, we goin talk about tings we donno an why dat can make um hahd fo us sometimes. An we goin talk about why iz good we donno some stuff. Dass goin help us fo trus dat Jehovah, da One who “perfeck an know eryting,” goin tell us wat we really need fo kno.​—Job 37:16.

WE DONNO WEN DA END GOIN COME

4. From wat Matthew 24:36 tell, wass one ting we donno?

⁴ Read um Matthew 24:36. We donno wen da end goin come. Even Jesus, wen he wuz on top da eart, neva kno da “day o da time.”a He wen tell his aposals dat Jehovah da One who get da right fo tell wen tings goin happen. (Jesus Guys 1:6, 7) Jehovah wen set da time awready fo wen da end goin come, but iz not up to us fo try figga out wen dat goin be.

5. Cuz we donno wen da end goin come, how dat can affeck us?

⁵ From wat Jesus wen tell, we donno how long we gotta wait fo da end come. An cuz of dat, we could lose fight, speshly if we wuz waiting long time awready. Or we might get hahd time hang in dea cuz oua family or oddas make anykine to us. (2 Pet 3:3, 4) On da odda hand, maybe we tink dat if we kno wen da end goin come, we would be moa patient an able fo hando wen odda guys make fun of us.

6. How come iz good we donno wen da end goin come?

⁶ Cuz Jehovah no tell us wen da end goin come, we get da chance fo show dat we serve him cuz we love an trus him. We like serve Jehovah foeva, not ony til dis world pau. So no tink too much about wen da end goin come. Moa betta fo tink about da good tings dat goin happen bumbye. Dat way we goin come moa close to Jehovah an we goin do eryting we can fo make him happy.​—2 Pet 3:11, 12, NWT.

7. Wat we kno?

⁷ Moa betta fo tink about da tings we do kno, like how da las days wen start in 1914. In da Bible, Jehovah wen give us plenny prophecies dat show dat. An he also wen tell us how da world wuz goin be from dat time. Cuz all dese prophecies wen come tru, we kno fo shua dat Jehovah’s “day stay nea.” (Zef 1:14) Anodda ting we kno iz wat work Jehovah like us do, an dass fo tell da “Good Kine Stuff bout . . . God.” (Mat 24:14) Dis stay goin on in about 240 countries an in moa den 1,000 languages. We no need kno da “day o da time” fo go all out an preach.

WE DONNO HOW JEHOVAH GOIN HELP US

8. “Wat God stay do,” wat dat mean? (Da Teacha 11:5)

⁸ We no always kno “wat God stay do.” (Read um Da Teacha 11:5.) Da words “wat God stay do” iz talking about wat Jehovah goin make happen or let happen. We donno fo shua why Jehovah let tings happen or how he goin help us. (Songs 37:5) Da Bible compare not knowing wat God stay do, to not knowing how one bebe grow inside da maddah. Even science guys no can figga dat out. Same lidat, we no can undastan how Jehovah goin do tings.

9. Cuz we donno how Jehovah goin help us, wat we could start fo tink?

⁹ Wen we donno how Jehovah goin help us, dat might make us hold back from doin moa fo him. Like giving up certain tings fo do moa fo preach, or even moving to one place wea need help. Or maybe we tinking dat Jehovah not happy wit us cuz we neva get fo do some of da stuff we wanted fo do fo him. Or could be we working hahd fo Jehovah but we neva see anyting good happen yet. Or maybe we getting hahd time wen we doin stuff fo Jehovah.

10. Wen we donno wat Jehovah goin do, wat dat can help us work on?

¹⁰ Cuz we donno exackly wat Jehovah goin do, dat can help us work on coming moa humbo an kno dat we no can do eryting on oua own. Dat help us fo see dat Jehovah always kno wass bes fo us. (Isa 55:8, 9) An we learn fo trus dat he goin take kea eryting. Wen good tings happen working fo Jehovah, we give all da credit to him. (Songs 127:1; 1 Cor 3:7) Even if tings no turn out da way we expeck, we gotta rememba dat Jehovah still stay in full control. (Isa 26:12) We jus gotta keep doin oua paht, an trus dat Jehovah goin do his paht. We kno fo shua Jehovah goin direck us, even tho he no do um tru one miracle like he wen do befoa time.​—Jesus Guys 16:6-10.

11. Wat tings we kno about Jehovah dat can help us?

¹¹ Try tink about wat we do kno about Jehovah. He always show love, he fair, an he get plenny smarts. We kno dat Jehovah love us cuz of wat we do fo Him an oua braddahs an sistahs. An we kno dat he goin bless da guys dat stick to him.​—Heb 11:6.

WE DONNO WAT GOIN HAPPEN TOMORROW

12. Wat From James 4:13, 14 say we donno?

¹² Read um From James 4:13, 14. Da trut iz, we donno wat oua life goin be like tomorrow. Cuz now days, da “tings you no expeck can happen to anybody at any time.” (Teacha 9:11) Cuz of dat, we donno if oua plans goin work out or if we goin be alive fo see um work out.

13. Wen we donno eryting dat goin happen in da future, how dat make us feel?

¹³ Cuz we donno exackly wat goin happen tomorrow, can be hahd fo hang in dea. Like wen we worry plenny about wat could happen, dat can bum us out. Ova nite oua life can change an bad tings can happen. Dat can make us sad an all stress out. An wen tings happen da way we no expeck, we can lose fight an come sick.​—Smart Guys 13:12.

14. Wat we gotta kno an do fo be happy? (Go look da pichas.)

¹⁴ No matta wat we go tru in oua life, we can show dat we serve Jehovah cuz we love him. Da Bible show dat we shouldn’t expeck Jehovah fo proteck us from all da bad tings dat happen, an he no plan out eryting dat happen in oua life. Jehovah kno dat we no need kno eryting about da future fo be happy. But we goin be happy if we lissen to him an go to him fo help. (Jer 10:23, NWT.) Wen we do dat, we goin be jus like da Bible writa James who wen tell, “If az wat Da One In Charge like, we goin stay alive, an do dis ting an dat ting.”​—Jam 4:15.

15. Wat we kno about da future?

¹⁵ We donno wat goin happen eryday, but we kno dat Jehovah wen promise us dat we can live foeva. An we kno dat Jehovah no can lie an nobody can stop him from doin wat he promise. (Titus 1:2) Ony him can tell, “From da start, I da One stay tell how da end goin come.” He wen do dat in da pas, an he goin do um in da future too. (Isa 46:10) We kno dat garanz notting can stop Jehovah from loving us. (Rome 8:35-39) He goin help us by making us strong enuff fo hando wateva we gotta go tru, an he goin bless us.​—Jer 17:7, 8. 

WE NO CAN REALLY UNDASTAN HOW GOOD JEHOVAH KNO US

16. Wat Jehovah kno about us, an how dat make us feel? (Songs Fo God 139:1-6)

¹⁶ Read um Songs Fo God 139:1-6. Oua Mayka kno eryting about us. He kno da way we tink an feel an how come we feel lidat. He even kno all da stuff we say an do an how come we do um. King David wen say dat Jehovah always ready fo help us. Dass so unreal dat da Mos Highes, da One who wen make eryting, kea dat much about us! David wen tell, “Da way you know me, blow my mind! You know me mo betta den I know me!”​—Songs 139:6.

17. Why can be hahd fo us believe dat Jehovah kno us real good?

¹⁷ Maybe da way we wen grow up, wat wen happen in oua family, or odda stuff dat we used to believe, make um hahd fo us tink dat Jehovah kea about us. Or maybe we had do stuff dat wuz so bad in da pas, an we feel like Jehovah no like kno us. Even David wen feel lidat. (Songs 38:18, 21) Or maybe somebody who trying fo make God happy an change dea lifestyle might tink, “If God really kno me, how come he like me change da way I live if da way I stay living feel so natural to me?”

18. Why iz good fo us trus dat Jehovah kno us betta den we kno ouaselfs? (Go look da pichas.)

¹⁸ We can learn fo trus dat Jehovah kno us betta den we kno ouaself an dat he can see da good tings in us dat we no can see. Even tho he see all da tings dass wrong wit us an he undastan how come we feel an ack da way we do, he still love us. (Rome 7:15) Wen we undastan how Jehovah see da good in us, dat goin help us fo be strong enuff fo keep serving Jehovah da way he like, an we goin be happy doin um.

19. Wat we kno fo shua about Jehovah?

¹⁹ We kno dat garanz Jehovah always show love. (1 John 4:8) He show his love tru wat he tell us fo do, cuz eryting he tell us fo do iz good fo us. We kno Jehovah like us live foeva. He wen give us da ransom so dat can happen. An cuz of da ransom, even tho we make mistakes, we kno fo shua dat we can still live da way Jehovah like. (Rome 7:24, 25) An we kno dat “God mo big den how us guys feel inside.” (1 John 3:19, 20) Jehovah kno eryting about us, an he kno dat we can do wat he like us do.

20. Wat goin help us fo no stress out about wat we donno?

²⁰ Jehovah no hold back from telling us eryting we really gotta kno. So no need stress out about wat we donno. Focus on da stuff dass real importan. Wen we do dat, we show we humbo an we trus Jehovah. (Job 36:4) Even tho get some stuff we donno now, Jehovah goin keep teaching us new tings foeva. We no can wait fo keep learning new tings about oua awesome God, Jehovah!​—Teacha 3:11, NWT.