YOUNGA GUYS LIKE KNOW
How Come Good Fo Pray?
Somebody wen aks teens in America if dey pule. Ony 80 percent tell dey do, but ony half of dem pray ery day. Garanz some of dem tink: ’Iz praya jus sometin dat help yoa mind, o iz sometin moa den dat?’
Praya? Wat iz dat?
Praya iz one real way you can talk to da One who had make erytin. Try tink how unreal dat iz! Jehovah iz way bigga an betta den all humans in all kine ways, but he no stay far away from all us guys. (Jesus Guys Wat Dey Wen Do 17:27) Da Bible even tell dat you can do sometin unreal: come close to God, an he goin come close to you.”—From James 4:8.
How you can come close to God?
One way iz go pule—Az how you can walaau wit God.
Anodda way iz study da Bible—Az how God “walaau” back to you.
Wen you pray an study da Bible an talk story wit God lidat, dass goin help you come one tight fren wit God.
‘Wen you walaau wit da Mos Importan One, Jehovah, brah dass one of da bestes tings us humans can do.’—Jeremy.
‘Wen I pule to Jehovah an tell him how I really stay feelin, make me feel moa tight to him.’—Miranda.
God hearin me, o wat?
Even if you tink God iz fo real—an you pray to him—can be small kine hard fo trus dat he stay lissenin. Still yet, da Bible tell dat Jehovah iz da one dat lissen wen us guys pray. (Songs Fo God 65:2) He even tell he like take kea us an lissen all oua pilikias. How come? “Cuz he get one big heart fo you.”—1 From Peter 5:7.
Try tink about dis: You spend plenny time talkin story wit yoa good frens? Same ting, you can do dat wit God. Jus like how us make time fo talk story wit oua frens, da Bible tell: make time fo talk to God erytime. (1 Fo Da Tessalonika Peopo 5:17) An make shua fo use his name, Jehovah.—Psalm 86:5-7; 88:9.
‘Wen I pray, iz jus between me an my Fadda in heaven ony. Wen I pray to him I jus let um all out.’—Moises.
‘I talk about deep tings wit Jehovah, jus like I stay do wit my madda o one of my tight frens.’—Karen.
Wat kine stuff I can pray about?
Da Bible tell: “eryting dat happen, pray bout um, an go aks God fo do wateva you guys like him fo do. An same time, no foget tell him, “Mahalo plenny!””—Fo Da Philippi Peopo 4:6.
Dat mean you can pray about all yoa pilikia? Can! Da Bible tell: “All da stuff dat bodda you guys, turn um ova to Da One In Charge. He goin make shua you can handle.”—Songs Fo God 55:22.
Wen you pray to God, moa betta you talk about odda stuff den jus yoa problems. ‘I would be one junk fren if I ony aks Jehovah fo help an stuff I like all da time. I tink I should tell Jehovah mahalo fo a lot of tings firs.’ Az wat one young wahine named Chantelle wen say.
Try tink about dis: Wat kine stuff in yoa life you stay tankful fo? You can tink of three tings today fo tell Jehovah mahalo fo?
‘Even small kine stuff, like seein one beautiful flowa, can make us like pray to Jehovah an tell him mahalo fo um.’—Anita.
‘Tink real good about sometin Jehovah had make dat trip you out, o one Bible verse dat hit yoa heart, an den tell Jehovah mahalo fo um.’—Brian.