Da Watchtower LIBRARY ONLINE

Hawai’i Pidgin

ijwbq article 157
Wat Da Bible Tell About Natural Disastas?

Ansas to Questions bout da Bible

ijwbq article 157

One ohana looking at all da houses wea dey live dat wen get wipe out by one natural disasta

Wat Da Bible Tell About Natural Disastas?

Wat Da Bible Tell

God no make da natural disastas dat happen today, but he kea real plenny about da guys who stay get hit by um. Natural disastas iz one a da tings dat make us suffa dat God’s Govament goin hemo. Until den, God always goin be dea fo help da guys who get hit by natural disastas.—2 Fo Da Corint Peopo 1:3.

How we kno fo shua dat God not using natural disastas fo punish us?

Natural disastas not da same az how wen God had use natural kine forces befoa, like da Bible tell.

Natural disastas can kill an hurt anybody. But wen God had use natural kine forces fo hemo da bad guys, wuz ony dem dat wen get wacked. Like wen God wen wipe out Sodom an Gomorrah, he wen make shua da good guy Lot an his two daughtahs had live. (Da Start 19:29, 30) God could read da hearts of all da guys back den an ony wen kill da guys he knew wuz bad.—Da Start 18:23-32; 1 Samuel 16:7.
Mos time natural disastas hit wit litto o no warning. On da odda hand, God wen warn da bad guys befoa wiping dem out wit natural kine forces. Da guys who wen lissen to da warnings had get chance fo live.—Da Start 7:1-5; Matthew 24:38, 39.
Some stuffs peopo had do wen cause natural disastas. How dat? Cuz dey wen mess up da eart by buildin stuffs in places wea get plenny eartquakes, floods, an supa bad wedda. (Jesus Show 11:18) Not God’s fault cuz peopo wen make stupid kine choices.—Smart Guys 19:3.

Natural disastas show we living in da time befoa da world come pau?

You kno dat! Bible prophecies tell dat probly goin get natural disastas in da time befoa da world “going pau.” (Matthew 24:3, NWT; 2 Timoty 3:1) Fo exampo, Jesus had tell dis bout da time we stay live: “Plenny peopo no goin get notting fo eat. Plenny diffren places, da groun goin shake hard plenny.” (Matthew 24:7) Pretty soon, God goin hemo all da stuff dat make us soa an suffa, even natural disastas.—Jesus Show 21:3, 4.

How God kokua da guys dat get hit by natural disastas?

God kokua dem wit his Word, da Bible. Da Bible tell dat fo shua God kea bout us an dat he suffa wen we suffa. (Isaiah 63:9; 1 Peter 5:6, 7) Da Bible even tell about God’s promise wen natural disastas goin be all pau.—Check out “Scripchas dat help guys feel betta afta one natural disasta hit.”
God use da braddahs an sistahs fo help dem. God uses da guys who worship him on da eart fo copy wat Jesus wen do. Da Bible wen tell befoa time dat Jesus would “help da peopo dat feel all bum out” an all da guys “dat stay sad inside” feel betta. (Isaiah 61:1, 2) Erybody who worship God try fo do da same ting.—John 13:15.

An God use his worshipas too, fo help da guys who get hit by natural disastas by giving um da stuffs dey need fo live.—Jesus Guys 11:28-30; Fo Da Galatia Peopo 6:10.

Witnesses Fo Jehovah fix up one house in Puerto Rico — Witnesses Fo Jehovah kokua peopo in Puerto Rico wit da tings dey need afta one hurricane.

Can da Bible help us make ready fo one natural disasta?

Yessah. Even if da Bible not one how fo make ready fo one natural disasta book, get Bible truts inside um dat can kokua us. Lidis:

Make one plan befoa one disasta. Da Bible tell, “Da akamai kine peopo see Someting bad goin happen, An dey go hide.” (Smart Guys 22:3) Goin be smart fo make one emergency plan befoa one disasta hit. Like making one go-bag ready an practicing wit yoa ohana wat fo do an wea fo go if one disasta hit.
Life moa importan den da tings we get. Da Bible tell, “Wen we wen born, we neva bring notting inside da world, an wen we mahke, we no goin take notting outside da world.” (1 Timoty 6:7, 8) If one disasta come, we gotta be ready fo leave oua home an all oua stuffs. Iz good fo rememba dat oua life stay moa importan den da stuffs we get.—Matthew 6:25, NWT.

Scripchas dat help guys feel betta afta one natural disasta hit

Da Start 18:25: “No can be dat you goin wipe um all out . . . If you kill da peopo dat do da right ting, same time you kill da bad peopo, den dat mean you tink dey not diffren . . . No can be! You da Judge fo all da peopo inside da world.”

Wat Dat Mean: God always do da right ting. Iz not his fault wen good peopo mahke cuz a one natural disasta.

Songs 46:1, 2: “God, he jalike one place Fo us guys go hide. He make us guys stay strong Fo notting bad happen. Wen get all kine trouble, God stay ready Fo help us guys plenny. Dass how come us guys no stay sked, No matta get earthquake An da mountains fall down An broke into small pieces An fall down inside da ocean.”

Wat Dat Mean: No matta wat stay goin on, we can trus dat God goin help us.

Isaiah 63:9: “Erytime his peopo suffa, he suffa too.”

Wat Dat Mean: God get pity. He feel fo us wen we suffa.

John 5:28, 29, NWT: “Da time goin come wen all da mahke guys goin hear [Jesus] voice. An dey going come outa dea graves.”

Wat Dat Mean: We get da hope fo see oua love ones again dat wen mahke, cuz God goin give Jesus da powa fo bring dem back to life.

Numba 1 From Peter 5:6, 7: “So den erybody, tink bout da powa God get an no get big head . . . Let God take kea all da stuff dat bodda you guys cuz he get one big heart fo you guys.”

Wat Dat Mean: God see all da stuff we goin tru an he like us pray to him about all da tings dat worry us.

Jesus Show 21:4, NWT: “[God] going wipe away all da tears from dea eyes, an nobody going mahke no moa, stay sad inside, o cry, o suffa no moa. All dose tings dat wen happen befoa going be pau.”

Wat Dat Mean: God goin hemo eryting dat make us suffa an even natural disastas.