How Come Jesus Stay Call God’s Boy?

Da Bible’s ansa

Plenny times da Bible call Jesus “God Boy.” (John 1:49) Dis show dat all life come from God, an he wen make eryting, even Jesus. (Songs Fo God 36:9; Jesus Show 4:11) Da Bible no teach dat God had one kid da same way humans make kids.

Da Bible call da angels “God’s boys” too. (Da Start 6:2, New World Translation) An da Bible tell dat da firs man, Adam, “he God boy.” (Luke 3:38) But cuz Jesus wuz da firs ting God wen make an da ony one he wen make by himself, da Bible tell dat Jesus iz God’s numba one boy.

• Jesus wen live heaven befoa he wuz born on eart?

• Wat Jesus wen do befoa he wen come to eart?

Jesus wen live heaven befoa he wuz born on eart?

Yup. Jesus wuz one spirit in heaven befoa he wuz born on eart. Jesus wen tell, “I come down from da sky.”—John 6:38; 8:23.

God wen make Jesus befoa he wen make anyting else. Da Bible tell dis about Jesus:

• “He . . . da firs one God wen make befoa eryting else.”—Fo Da Colosse Peopo 1:15, NWT.

• He da one Jehovah wen make “firs befoa he wen make eryting else.”—Smart Guys 8:22, NWT.

Jesus wen make da prophecy come tru dat tell “he stay from befo time, long time awready.”—Micah 5:2; Matthew 2:4-6.

Wat Jesus wen do befoa he wen come to eart?

He had one mayjah kuleana in heaven. Jesus wen talk about dis wen he had pray, “Faddah . . . from befo da time wen we wen make da world, I wen stay awesome jalike you.”—John 17:5.

He wen help his Faddah make eryting else. Jesus wuz “right dea . . . working nex to Da One In Charge.” (Smart Guys 8:30) Da Bible tell, “eryting God like make . . . Jesus wen do da work.”—Fo Da Colosse Peopo 1:16.

God wen use Jesus fo make eryting else, like da angels an da universe. (Jesus Show 5:11) Da way God an Jesus wen work togedda stay jalike how one architeck work wit one builda. Da architeck draw da design an da builda make um.

He wuz da Word. Befoa he wen come to eart, da Bible call Jesus “da Word.” (John 1:1, NWT) Dis mean dat God wen use his Boy fo tell da angels wat dey needed fo kno.

Look like Jesus wuz da one who had talk fo God to peopo on top da eart too. God probly wen use Jesus az da Word fo tell Adam an Eve wat fo do in da Eden garden. (Da Start 2:16, 17) Could be dat Jesus wuz da angel who wen show da Israel peopo wea fo go in da boonies, an wuz his voice dat dey had fo lissen to.—Outa Egypt 23:20-23.a